Faia moliaga o se taule’ale’a i le taumafai lea e fa’ao’o le oti i se tama’ita’i

Tusia Deidre Tautua-Fanene ,

81 Hits

O le taule’ale’a lea o lo’o tu’ua’ia i lona tatuiina i le masina na se’i mavae atu nei ua molia nei i le moliaga o le taumafai e fa’ao’o oti.

O lea fa’amaoniga sa auala mai i le So’oupu ale Matagaluega a le Ofisa o Leoleo, Auapa’au Logoitino Filipo.

O lenei taule’ale’a sa faia aloa’ia ona moliaga i le Aso Lua. 

I le masina na se’I mavae atu nei sa taofia fa’atasi le na a’afia ma le o lo’o molia i le Tupua Tamasese Meaole i Moto’otua.

Sa fa’ao’olima ai le o lo’o molia i le na a’afia e ala i lona fa’aaogaina o se tama’i naifi e ala i lona tatui ina lea o le na a’afia a’o le’i toe a’afia ai lava o ia.

I se saunoaga a se tasi o molimau o lea fa’alavelave o le o lo’o molia e le’i ma iloa po’o fea na sau mai ai.

“O le na a’afia e faigaluega i se matagalauega a le malo o lo’o i luga o le A.C.C.

“Ou te iloa sa fa’atalitali lava e lea ali’i le na a’afia e usu mai i le galuega ona o le fa’alavelave na tupu sa tula’i mai pe a ma le ta o le 8 i le taeao.”

Ina ua fa’atopetope atu le mamalu o le atunu’u e fesoaosani i le na a’afia sa sola ese lea taule’ale’a ma tamo’e loa aga’i i Mulivai.

“Sa alu ma le atoa i le auala laupapa o lo’o i Muliva ina ua tuliina e se tasi o ave ta’avale la’upasese.

“Sa oso i lalo o le auala laupapa o lo’o i Mulivai ma aga’i loa i totonu o se tasi o paipa tele o lo’o i lalo o le auala laupapa lea.

 “Ae ina ua oatu ai tagata sa mauaina ai o lo’o mau mai le naifi i lona fatafata.

 “Sa aga’i atu i ai leoleo ma le ta’avale a le falema’i ma aveina ai loa laua I le falema’i.”

Sa Saunoa fo’i Auapa’au o lea ali’i o lo’o fa’amoemoe e tula’i i luma o le fa’amasinoga maualuga i se taimi o le masina a sau nei.

Sa fesiligia pe aisea ua umi ai ona tuu lea mataupu sa ta’ua e Auapa’au sa fa’atali i le taimi e malosi ai le o lo’o molia ona o ona moliaga tugā.

 “Pau lava la’u tala o lea ua molia le o lo’o a’afia ae e ono i ai nisi moliaga i luma atu,” o lana saunoaga lea.

“Ae aua e te fesiligia pe aisea ua umi ai .

“Sa fa’atali lava i le foma’i mo se taimi talafeagai e faia uma ai tulaga nei.”

© Samoa Observer 2016

Developed by Samoa Observer in Apia