Fa’amuamua le fanau

Tusia Seia Soloi ,

111 Hits

Faamanuiaga Faamuamua.

Faamanuiaga Faamuamua.

Tataou te galulue mo tatou fanau.

O le talitonuga lena o Faamanuiaga Faamuamua 35 tausaga mai le afioaga o Tuana’i.

O le tinā lea e to’aono ona alo ma o lana galuega o le fa’atauina lea o fualaauaina ma fua o lana fa’aeleeleaga.

O nisi taimi e lelei lava, a’o isi taimi e ai lava si faigata ae e fiafia lava ia i soo se seleni lava e nate maua.

Ae o le itu e pitosili ona fiafia i ai lea tina o lona mafaia lea ona fai so’o se mea lava.

E pei o le tele o isi tinā o le latou matafaioi o le aveina lea ma le pikiina o le fanau mai i le aoga i aso uma.

“E na o le matou aiga e faigaluega auā le tausiaina o matou.

“O Lona totogi e alu lea i le totogiina o pili aoga o tamaiti, totogiina o le pili o le suavai, ma fesoasoani ai i le fa’atauina o meaai i lea aso ma lea aso.”

Sa saunoa foi Faamanuiaga o ia o se tasi e telē lona talitonuga i le lelei o le aoaoina o tamaiti o se tasi lea itu e fa’aitiitia ai le mativa.

“O la’u fanau uma lava e to’aono e ao’oga uma lava.

“E mo’i lava o lo’o tau atia’e le matou aiga ae o le ma’ua matafaioi muamua lea o le aveina lea o le ma fanau i le aoga ina ia maua se latou lumana’I manuia.

“Talosia ia ae matutua ane mauya ni latou lumana’i lelei nai lo o maua.”

Sa ta’ua e Faamanuiaga o le totogi o si ona to’alua e $200tala i le vaiaso.

“Ae e pei lava o le emo o le mata le alu.

“O le tau o le soifuaga ua fai lava si taugata ma e matou te taumafai lava ina ia fa’ataunu’uina mea uma lava e ao ona fa’amuamua.

“Ae le’o aofia ai fa’alavelave i aso uma.

“E le mafai e lena totogi ona fai uma mea e ao ona fai i aso uma pe a o’o lava ina saputu mai fa’alavelave ma mea fai a le ekalesia.

“O le ala lena e matou te fa’alagolago tele ai i le matou fa’atoaga ma fualaauaina e faatu ina ia maua mai sesi alagā seleni auāeafai a le fanau I lea aso ma lea aso.”

O le olaga I totonu o le nu’u o lo’o filemu uma lava mea uma.

“Pau lava si a’u tu’ualalo i le malō ina ia mafai ona fai a matou auala, suavai ma le eletise.

“Na o matou lava le aiga  lo’o mamao ese mai lava i isi aiga.

O le talitonuga o Faamanuiaga o a lava faigata o loo feagai ma le tagata e tatau lava ona latou suea ni mea e ao ona faamalosiau ai i latou e galulue ma le malosi aua aiga, nuu, ma ekalesia.

“O a’u lava ia o la’u fanau o lo’u malosiaga lea.

“Fa’amuamua le fanau ma o latou manaoga ona tatou vaaia o se lumana’i lelei.”

© Samoa Observer 2016

Developed by Samoa Observer in Apia