Manatu o le Fa’atonu - O faiga-filifiliga lava

175 Hits

Tusia - Marj Moore

Fa'aliliu - Maiava

 

O tulaga ua masani ai nisi atunu’u i Europa, pe a o’o i mea nei o fa’aipoipoga, e mo’omia le tama’ita’i o le a fa’aipoipo,  ia iai “se mea-tuai mai aso anamua, o se mea-fou, po’o se mea fo’i e nono mai se tasi” i le aso e fa’aipoipo ai.

E leai se ‘ese’esega o lea masani ma le lisi-‘umi o suafa o sui-tauva a le HRPP lea sa fa’alauiloaina i le Sunday Samoa ananafi (Fepuari 07).

I lea lisi ‘umi e silia i le 120 suafa o iai, o lo’o iai fo’i ma igoa ‘tuai’ – tagata ua matutua soifua ma ua leva isi o tautua; o lo’o iai le vaega fou e le’i leva tele, e tau le-iloa e le atunu’u; o lo’o iai ma le vaega “feosoosofa’i – tama sa i isi vaega a ua liua le vai-o-sina ma o-‘ese, fa’apea fo’i le vaega “felanulanua’i” – latou e oso ai le ‘ino’ino ma le le-fiafia ona ua mamafa avega ma fa’afafa o fa’aletonu na afua mai ai ae ua toe aliali mai fo’i.   

O le lima tausaga e le o se taimi pu’upu’u ma ua tatou va’aia le tele o mea ua faia, atoa fo’i ma mea ua matua leaga-faia i totonu o lea taimi. 

E iai fo’i la nisi o sui-tauva, e le mafai ona lisi i lalo o se vaega e tasi. 

A’o le fiafiaga sili, e le o ni tama-sese e ono oti ai tatou. 

O latou ia, e tau maua ai se fa’amoemoe lelei, ona e latou te manatua le autu o le filifilia o latou, o le tautuaina lea o tagata lautele fa’apea le atunu’u aoao ma mafai ona fa’apea ane, o le manuia o le atunu’u, e fa’alagolago i a latou galuega fai.   

O lo’o iai fo’i ma suafa o sui, e tele lo latou tomai ma agava’a e mafai ona suia maualuga ai tulaga o felafolagoa’iga i mata’upu anoa; i latou e iai tomai fa’apitoa e mautinoa e tele so latou sao i mata’upu ‘ese’ese ma fa’alagolago fo’i iai nisi ina ia fa’aali ma le lototetele finagalo moni ma fa’amaoni, e aunoa ma se fefe pe fa’aitu’au.

Ae talu ai ona o le to’atele o le ‘au-palota, e mafuli i tua i afio’aga ma alalafaga o le atunu’u nei, ua fa’alogoina so’o ai lava i le tala fa’apea, o le mafuaga lea e le popole ai lava le Malo i manatu ma lagona o tagata i Apia, e ui o se fa’ai’uga fa’avalevalea tele lea fa’aalia.

A o le mea malie la i le matou polokalame o le Talanoa i Ala, na fa’aalia ai finagalo o nisi e to’aono, i se tasi e avea ma Palemia pe a le toe avanoa Tuila’epa. E to’atolu e manana’o e fa’aauau pea fuafuaga sa fa’ata’oto, ia avea ai Fonotoe ma Palemia; e to’alua e manana’o ia Fiame Naomi Mata’afa ona o mafuaga o aia-tutusa ae maise ona tupu’aga a’o le to’atasi la o lo’o naunau lava, ia tumau ai pea Tuila’epa se’ia vala’au mai Luga.

Afai ae manumalo sui-fa’atutu o le HRPP i Faiga Palota, o le tatalo ma lo matou fa’anaunauga, ia lotoa ma tutu-fa’atasi e fa’aali o latou finagalo moni, o latou talitonuga ma malamalama fa’aleTagata, ae soia le tosoa le igoa o le vaega fa’aUpufai, aua e mautinoa lava, o le mea sese lea e le tatau ona toe faia. 

O le tatalo fo’i lea e una’ia ai latou uma ta’ito’atasi, o se atunu’u e iai tagata, ae le na o fale-tetele, ma teugatupe tetele e fa’aalu i poloketi ae silasila ane mo le fa’alelei o le soifua o tagata Samoa, lea e matua maulalo tele i nei taimi. 

A ua fa’ailoa fo’i e le Vaega a le Tautua, ua latalata i le 80 a latou sui-tauva, lea o le a fa’ailoa fa’alaua’itele mai i le Aso 19 o Fepuari, pe a fa’ailoa mai la latou fuafuaga mo faiga-palota (le manifeso).   

Ua manino mai, e to’atele lava le atunu’u o lo’o lagolagoina le HRPP.

Mata o se ata lea e ta’u mai ai, e to’agaogao lava nisi e talitonu e lua itu o se tala ma e ao lava ona fa’amalamalama itu uma ia pe o se finau maua’i pea mo se suiga talu le tele o fa’ai’uga sese sa faia i tausaga ua mavae atu, ae toe taumafai e punipuni mulimuli ane? 

Atonu o le tele nisi mea e ono fa’aalia ma nisi tala e toe fai, pe a maua mai le lisi o sui-fa’atutu a le Vaega a le Tautua, lea toe 11 aso o’o iai.    

© Samoa Observer 2016

Developed by Samoa Observer in Apia