Fa’afotu a Manu’alesagalala i Toamua

08 February 2016, 12:00AM

Ripotia e Pai Mulitalo Ale 

Fa’aliliu e Maiava

 

O le taeao o le Aso Lulu talu ai, na fa’ae’e ai e le Aiga Sa-Manu’a ma le Afio’aga o Toamua, le suafa Manu’alesagalala ia Sopo Sua.

O Manu’alesagalala Sopo e papaa’ao i Amerika Samoa peita’i o le a taliu mai i Samoa nei, e tausi lona aiga, ma tautua i le nu’u, le itumalo ma le Ekalesia. 

Ua silia i le sefulu tausaga o avanoa le nofoa o Tavita, ina ua tu’umalo le Susuga a Manu’alesagalala Keresoma Tuano Lula i le 2005.

Ua tele taimi sa fili-tagaga ai le tofa ma le moe a Sa-Manu’a, e to’atele fo’i suli ma feoi o le suafa sa fa’atutu mai e vaega ‘ese’ese o le aiga e tau’avea le suafa a ua ‘autasi ai ia Sopo Su’a, e ta’ita’ia le aiga ma fa’apa’iaina ai lana nofo i le vaiaso talu ai. 

Na amata lea sauniga mamalu ma le matagofie, i le sauniga lotu e fa’afetaia ai Le Atua ona o Lana ta’ita’iga ma Lona Alofa ua taunu’u filemu ai le fa’amoemoe o le Aiga. O fa’afeagaiga-taulagi lava e to’atolu a ‘Ale ma ‘Ulu ma Aiga, le Gafa o A’atoe, le Itulua o Satunumafono ma le Tofa a le Va’a’ulu, sa fa’apa’iaina fa’atasi le nofo fou. 

O le Tofa a le Igoā-matua, o ‘Ulu Vaomalo ‘Ulu Kini sa fa’apa’iaina le nofo i tulaga masani fa’aleAganu’u, e fa’amanuina i lona tula’i e ta’ita’i le Aiga ma fa’amalosi’au fo’i i fuafuaga mo le ag’i i luma. Sa tima’i fo’i i tulaga-fa’aTa’ita’i ae maise le fa’atinoina o fa’ai’uga-fai, ia faia ma le alofa i le Aiga, le nu’u ma le Ekalesia. 

O Manu’alesagalala Sopo, o le alo o Su’a Solovi ma Agali’i Man’ua Lula-Su’a ua fai-i-lagi le folauga. 

08 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>