Faigata le olaga
O lenei vaitau ua le mafai lava e le fa’atoaga ma le galueina o fanua ona foi’a le faigata o le olaga ua iai nei.
Na saunoa le tamā i a Luaiufi Ropati, mai le afioaga o Vaitele-Fou, ua le’o toe malosi se tupe maua mai lana fa’atoaga pinati aemaise lana fa’atoaga fualaau’aina aua le tausia’ina o lana aiga.
O Luaiufi e to’afitu ona alo ma o lo’o aumau le to’alua i Amerika, ma le isi to’alima o lo’o iai pea iinei i Samoa.
E talitonu Luaiufi o le tau o oloa ua iai nei ua matua taugata lava.
“Ou te talitonu o le olaga ua tatou iai nei i Samoa ua matua faigata lava ona o le taugata lea o le tau o le soifuaga ua tatou iai nei.
“Ua faigata lava ona o le taugata tele o le soifuaga fa’atusa atu i le tupe maua a tagata o lo’o faapena ona maua mai i galuega aemaise fanau.
“Ou te iloa foi o le to’atele lava o nisi ua iai nei ua toe foi lava i tua i le toe galue’ina lea o latou fanau aemaise fa’atoaga aua le tausiga o aiga.”
Na saunoa Luaiufi Ropati o le fa’afitauli lava o lo’o feagai nei ma ia o le le lava lea o sana seleni.
“O la’u fa’atoaga pinati aemaise la’u fa’atoaga fualaau ’aina o lo’o iai o lo’o maua ai sina a’u seleni aua le tausia’ina lea o le matou aiga.
“O la’u fanau teine to’alua o lo’o matou nonofo ai nei i Samoa ua fai aiga uma, ma o la ta’ito’alua o lo’o faigaluega uma foi.
“Ou te le fa’amoemoe tele i tupe maua mai ta’ito’alua a la’u fanau teine ona ou te iloa o lo’o feagai foi latou ma le tausiga o le latou tama’i aiga laiti, ae ou te fa’amoemoe pea i la’u fa’atoaga pinati ma la’u fualaau’aina mo maua ma si o’u to’alua, ma le fanau laiti.
“E le tele se seleni e maua mai la’u fa’atoaga pinati aemaise le fualaau’aina, ae o le a lava le seleni e maua mai, e talia ma le fiafia.
“E fua lava le seleni maua mai i le leleima le tele o le fa’atauga, ae o le tupe maua masani lava ia e masani ona maua o le $150 I le vaiaso.”
Na fa’aalia foi e Luaiufi Ropati lona agaga fiafia ua iai i le tau lea ua iai Samoa.
“E tele lava le sao o le tau I la’u fa’atoaga, o le tele o le timuga, o le lelei foi lea o le fua lelei mai o pinati aemaise fualaau’aina.”