Taugata tele le soifuaga i Samoa
O le finagalo o le tama ia Ata Kalolo mai le afioaga o Lea’uava’a, ua mata’ua’i taugata lava le soifuaga i Samoa i lenei vaitau.
Na ia fa’ailoa mai i le Fofoga o Samoa, o le tulaga e fa’anoanoa ai, ona o le to’atele o aiga e le’o lava la latou fa’asoa.
“O lenei vaitaimi ua tele lava ina fa’alogoina pea le mamalu i le mamalu o le atunu’u le faitioina lea o le taugata o le soifuaga ua iai nei.
“Ma oute lagolagoina lelei lenei tulaga. Ona foi o le taimi nei pe a fa’atusatua atu i aso ua mavae, e fiu e fa’asoa se $100, ae o le taimi lenei, ua tutusa lava le $100 ma le $10.
“Ae o le tulaga e fa’anoanoa ai, o le taugata o le soifuaga, ae e le’o lava seleni e maua e nai o tatou tagata. E le tutusa uma tagata, ma ua tatou iloa lava e ese’ese uma foi aiga.
“O nisi e tele a latou tupe, ae tele foi lava nai aiga o lo’o lima vaivai.”
Ae peita’i na ta’ua e Ata, a nofoa’i ai le tagata ma lē ola sogasogā e atili ai lava ona faigata.
“O le agaga a lea ia te a’u i le taimi lenei, ou te alu lava e faigaluega ma foi mai fai le ma’umaga e fesoasoani foi i mea e fai. “Aua o le isi lea mea o lo’o alu tele iai a tatou tupe, o le meaai. O le ala lea o lo’o fa’amalosi ai lava e fai uma mea e lua, e maua ai sina fa’amama avega.
“Aua e maua mai lava meaai mai le lauelele, ae fa’amoemoe laia i le tupe e maua mai le totogi e fa’atinoina ai isi tulaga, pei o le totogiina o pili ma fai ai isi tulaga i totonu o aiga.
“E pei ona tau mai foi i lenei taeao, o lea foi e agai atu e asia le ma’umaga ma aumai ni meamata mo le aso Sa a taeao ona fai ai foi lea o se malologa e toe fa’asauni ai mo le galuega nanei.
“O le taimi lenei, o lo’o ou aveta’avale toe sikulati.
“O le mea le iai, e tutusa lava aso uma lava. E sui lava le tausaga ae o lo’o tumau lava le olaga. Na’o le fuainumera lava o lo’o sui, ae o lo’o tutusa lava mea e fai. O le olaga lava lea ua masani mai ai le Samoa latou ia, o le galue lava aua se manuia o aiga ma fanau.
“Ae ua taugata lava le soifuaga i lenei vaitau.”