O le fua e te lulu, e te toe selesele foi

Tusia Vatapuia Maiava ma Sarafina Sanerivi ,

163 Hits

 Le tina ia Fale Soma mai le afioaga o Malie.

Le tina ia Fale Soma mai le afioaga o Malie.

“E leai lava se mea e maua ma le filemu i le olaga nei.”

O le finagalo lea o le tina ia Fale Soma, e 52 tausaga mai le afioaga o Malie. 

Na fa’alia e Fale, o le olaga lenei, a fia manuia le tagata, e tatau lava ona galue ma fa’amaoni e faia so’o se mea e maua ai le manuia o aiga ma fanau. 

“O le fua lava e te luluina e te toe seleseleina foi,” o le fa’aaliga lea a le tina ia Fale. 

“A le afu le muāulu e le mafai foi ona maua se mea lelei. O si o matou aiga, e fa’aaoga lava le upu lea, a mana’o i se mea, e tatau lava ona galue ma tinoū iai. 

“A mana’o i le tupe, e tatau ona galue ina ia maua. Aua e le fa’apea e sau le tupe e su’e oe. E tatau ona tatou taufai galulue ma taufai saili lava.”

O le tina ia Fale ma lona aiga, e fa’amoemoe tele i lauele’ele mo le atina’eina o lona aiga. 

“O le laufanua lava o lo’o fa’amoemoe iai si o matou aiga. E faigaluega uma foi le to’atele o le fanau, ma e fesoasoani tele foi iai ma’ua ma le tama o le aiga i le faiga o feau. 

“E fa’aaoga tatau lava le laufanua na foai mai e le Atua e fai ai fa’atoaga ma atina’e aua le manuia o aiga. 

“E pei foi la o le taeao lenei, o lea fa’atoa uma mai le veleina o le togā pinati ma fa’amama ese le vao. 

“O le pinati lava ma isi fuala’au aina o lo’o fesoasoani tele i mea e fai i totonu o le matou aiga.”

Na ta’ua e Fale, ua silia nei ma le tolu tausaga talu ona latou fa’atinoina le atina’e lea o le pinati. 

“Ua tele lava le aoga o lenei atina’e i si o matou aiga. Telē lava le fesoasoani e maua mai ai. E ui lava ina faigata le fa’atinoina ma le faiga, ae e suamalie lava le fa’aiuga pe a oo ina selesele fua o le fa’atoaga.

“E ta’itolu lava masina ma vele le togā pinati. A oo la ina fa’atau fua, e maua lava e $3,000 tala, ia na’o le $150 lava e fa’aalu i le faiga o le pinati, ae o isi tupe uma e alu i mea e fai i totonu o le aiga.”

© Samoa Observer 2016

Developed by Samoa Observer in Apia