Mo’omia ni pasi e femalagaa’i ai

Tusia Sarafina Sanerivi ,

136 Hits

 Sekolasitika Pela, 23 tausaga mai le afioaga o Saleimoa.

Sekolasitika Pela, 23 tausaga mai le afioaga o Saleimoa.

O le finagalo o le tina ia Sekolasitika Pela, 23 mai le afioaga o Saleimoa, o lo’o sologa lelei pea olaga i Samoa nei. 

Ae peita’i na ia fa’ailoa mai i le Fofoga o Samoa, na pau lava o le fa’afitauli o lo’o feagai ai nei ma le latou nu’u, o le leai lea o ni pasi e o’o atu i tua i le mea o lo’o alala ai. 

“Na’o le fa’alua lava ona o’o mai le pasi i tua nei,” o le fa’aaliga lea e Sekolasitika. 

“E na’o le taeao lava ma le afiafi. Ae le fa’apea foi o aso uma e ui mai ai le pasi i tua nei. O le fa’afitauli, e fai lava si maomao o le savali atu i le aai aemaise foi o le leai o ni pasi e fealuai i tua nei. 

“Ia a o’o la ina tuput fa’afuase’i se fa’alavelave po’o se ma’i e umi lava se taimi e fa’atali ai se fesoasoani. 

“A o’o foi  la ina oso fa’afuasei se mai, e leai lava se vave e ono ave ai se tagata i le falema’i ona o le leai oni ta’avale poo ni pasi e oo mai i tua nei.”

Na ia ta’ua foi, ua fai lava sina leva talu ona feagai le latou pitonu’u ma lenei fa’afitauli. 

“O lea fa’ato’a lua tausaga talu ona fealuai mai le pasi i tua nei. Ae pei foi ona fai atu, e le faapea o aso uma e oso mai ai le pasi i tua nei. 

“Ae o le to’atele lava o tagata, e savavali lava i tai i le muga la ma le pefu o le auala. E fa’apena foi la nai fanau aoga. 

“E pei o le fa’afitauli tele lava lena o lo’o feagai ai ma si o matou nu’u nei.”

Na ia ta’ua foi, o le olaga i le nu’u e ese le faigofie. 

“E fa’amoemoe lava i fa’atoaga ma mea fafaga. E tau le alu lava se tupe e fa’atau mai ai ni alaisa aua o lo’o iai lava ma’umaga a aiga ta’itasi. 

“O le matou aiga foi, e faigaluega uma lava lo’u tama ma lo’u tina aua le tausiaina o le matou aiga. 

“A’o le to’atele lava e fa’alagolago i fua o fa’atoaga aua le tausiga o aiga ma fanau.”

© Samoa Observer 2016

Developed by Samoa Observer in Apia