Fa’aitiitia tupe maua i le Maketi Fou

By Vatapuia Maiava ma Ilia L Likou 07 October 2016, 12:00AM

Na fa’ailoa e Pauli Logo Fa’asolo o Salelologa le telē o le ‘ese’esega ua i ai nei le tupe maua o lana pisinisi talu ona si’itia i le Maketi Fou o lo’o ua i ai nei.

O le pisinisi a Pauli na amata mai lava i le Maketi tuai lea sa i ai muamua ma o le taimi lenei o lo’o  ua fa’aauau atu lava i le Maketi Fou.

 “Ia ua silia ma le selau tausaga talu ona ou faia lenei pisinisi, o le fa’atauina atu lea o oloa nei e pei ona i ai nei.

 “Sa ou amata mai lava a’o i ai le maketi tuai ma o lo’u  iloa i ai, o lo’o ua fai lava si fa’afaigata o lo’o ua feagai  nei ma a’u.

 “Ia o lo’u ia iloa i ai ua mamao tele mai i uta nei le maketi fou lenei ma ua avea ma fa’afitauli ma afea gatā e le to’atele.

 “O le uiga lea o la’u tala e sili mamao le tulaga sa i ai muamua le maketi  muamua ona o le tele o tagata fa’atau i aso uma.

Na ia ta’ua o le isi itu o lo’o ua va’aia o le tele lea o tagata ua fai a latou pisinisi.

 “Ia o lo’o fa’alagolago lava le tupe maua i oloa o lo’o fa’atauina atu.

 “E tele lava se tupe fa’aalu ona e le gata ina ou alu fa’atau mai oloa nei, ia ae tatau lava ona alu le oloa ae toe fa’atau mai isi oloa.

 “Ia o le poto lava ma taumafai ia i ai sina tupe fa’asili, ia ma ua faigata lava ona o le tulaga e pei ona ua si’i mai ai i le maketi lenei.

 “O le maketi tuai ia na seāseā tele ni pisinisi fa’apenei ia ae o lea ua tele lava le suiga, ua to’atele lava le ‘au fai pisinisi.

 “Ia o nei ia e ta ane le lima ua leai ma ni tagata o toe feoa’i e le pei o Apia o le taimi lena o lo’o to’atele lava tagata.

“Ia ua tele ina paū le tupe maua e pei ona ua i ai nei, ia pe laititi lava sina tupe maua ia o le $100.

O fa’afitauli na ia fa’ailoa, na ia fa’aalia o le a le avea lea ma itu e solomuli ai le ola e taumafai e atia’e pea lana pisinisi.

“Ia o le taumafai lava i so’o se itu e mana’omia le fa’aleleia, ma ia aua ne’i fiu gofie aua e ono avea ma fa’afitauli e le mafai ona fōfō pe a fa’atu’utu’u ai.

By Vatapuia Maiava ma Ilia L Likou 07 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>