LAUGA - “O le Mana ma le faatonuga”

Tusia Petaia Setu ,

286 Hits

Po ua iai ea se mea ua faigata i le Atua? Ioe, e mafaia e le Atua mea uma lava pe a finagalo lava ia iai. Afai la o lea, o ai la e mafai ona tu ma tetee atu i le Atua? E fuā i galuega lelei o le faaolataga?

O vaipanoa uma ia o le olaga tapuai faa Iutaia ua faama’i pipisi i le lalolagi kerisiano, ua uma ona a’oa’o mai ai lo tatou Alii Faaola (Luka.21:17). A ua tatou iloa, e le taumāsina le tagata ma le Atua.

Ua loka e faifeau o le lotu Iutaia le au aposetolo i le falepuipui! O le mutaaga lea o le malosi o le tagata. Ae fai mai Luka, “ua to mai puipui o le fale e le agelu a le Alii i le po, ua na taitai ia te i latou i fafo, ma faapea atu, Ina ō ia outou, inā tutū i le malumalu ma tautala atu i le nuu i upu uma lava o lenei olataga.”

Silasila lelei Samoa i le pito lea. O ’i o loo alia’e matamata tetele ai le faafiapoto ma le faavalevalea nauā o le tele o le ituaiga lea (ositaulaga ma le faresaio) ua le na o Iutaia, a o Samoa foi.

Ua latou faasa ona fai o nisi lotu e tapuai saoloto ai tagata i le Atua. Ua le eseese ma le ma’i leaga lele e maua ai isi lotu e toe sui loa le lotu e te tapuai ai i le Atua, fai mai loa ua auleaga lava sea tagata, ma ua le maua e ia faamanuiaga  o le faaolataga! O manatu na ole pouliuli o loo faapagotaina ai pea ia ituaiga tagata lotu.

Ua tapisa i le faaolataga, ae matua le malamalama ai lava i le faaolataga a Iesu Keriso i le lalolagi. Samoa, e le faatagaina e le Atua lea ituaiga manatu. E ā Iutaia e loka ma faamata’u le au aposetolo, ae ā le Atua e tatala ma faasaoloto. O le Mana ma le Faatonuga, e le taofia e se poto. O ’e vaivai atu ai ma oe i le valea lea? Tatou te manana’o loa tatou te ‘I am’ i mea uma lava, ona oti foi lea o mea uma lava. Ua pogisa ai le vaai i le mea moni ma le alofa faaola ua valaauina ai i tatou e le Alii.

 O le afio mai o le Agaga Paia, o le fesoasoani Sili ua finagalo ai le Atua mo tatou. O le Mana e mafai ai mea uma o le galuega faaola o le talalelei a Iesu Keriso. E tautala atu ai ma faasoa le Upu Moni i tagata uma. E mafuta ai i tatalo ma viiviiga i le Alii. E asiasi atu ai  i ē o puapuagatia ma fia maua lau faamalosi’au. E faamafanafana ai i tagata ma faamalōlō i ma’i. E alofa atu i e matitiva ma fafaga  i e  ua matelāina. E faasaoloto ai i e ua saisaitia i tigā ma faafitauli eseese o  le olaga.

O galuega lelei ia e mafai ona fai, ona o le Mana o le Agaga Paia. Ua le o se mana faamălie ai lou mănava, ma e pule faasaolo solo ai i mea uma lava, e leai. E le o se mana e soli ai tagata.

E le fau fale, ae fau agaga. A silasila i le lesoni nei, o ‘i o loo ua fiva ai toeaiina, ona ua faatupuina ma faaopoopoina pea le toatele o le nuu e mulimuli i le Upu moni. Ona sesē ai lea o le tōfa, ma i’u ai i le mā (f.24). 

O le faatonuga, o le feau o le tami nei faifai pea. O le faatonuga, ō i le malumalu! Tautala atu i le nuu i upu uma lava o lenei olataga. E a, e ese ni upu o fai i le malumalu? O fai ai ni polokiki? Poo fai ma fale ’ote o le au faitaulaga ma taufaamata’u ai i tagata? O fai ai suegā tupe ma suega tala? Se ā la e fiva ai pe afai o le faatonuga lea mai le Agaga o le Atua i nisi tagata ua latou lagonaina le feau o le alofa tunoa o le Atua? O ai na te taofia le finagalo pule o le Atua?

O le faatonuga tuu sa’o mo oe ma tatou uma. Tautala i lou aiga, i lau fanau, i tagata uma. Tautala i le mea moni ma le sa’o. Tautala i le manino ma le malamalama. Tautala i le saolotoga ma le alofa. Tautala i upu uma na aumai e le Agaga. Upu o le olataga. Ioe, upu e mălie ai le gālala. E māmā ai le mamafa. Upu e sa’o ai le mānava ma mālōlōina ai le agaga. Auā o nei aso, ua le nāmalelāina. E le o ni la’ei o le tagata, a o le faaolaina o le agaga. O ai na te faamaopopoa lou aiga? E fua mai i fea le lelei faatino o galuega ma le auaunaga a tagata? E fofō faapefea le le fefaamalamalamaa’i i le feau ma le galuega a le Atua? A o lē fea itu aso e te tautala ai i le sa’o? 

Samoa e, o ala o tagata e le gata i le faigata ae umi nauā. Auā o ala e taamimilo solo ma aafia ai le tele o tagata ina seia faamălie le ola e tasi. Ae faauta i le faatonuga a le Alii, tautala atu i le nuu i upu o le ola.

Pau a lea. Ia sa’o le gutu sa’o le upu. O iinā o loo taoto ai ma maopoopoga. E tausili ai tagata i le loto mălie. E te malamalama ai i le faamoemoe o le Atua mo oe ma tagata uma.

E te lagonaina ai o oe o le auauna ua valaauina mo le ola saoloto ma le ola manuia o nisi tagata. Fai mai Iesu, Inā ō ia…. E afua atu i le asō. O nei lava. Ae le na o se malumalu foi e mafai ona tu ai ma folafola le alofa o le Atua. Uso, e malumalu mea uma. Poo le uafu, o le malumalu, poo le maketi, ua malumalu, o fea lava e te tautala atu ai ma aoao atu le faaolataga a le Alii, o le malumalu lena. O fea e maua ai tagata, o lena. Auā o le malumalu sili lava, o oe, ma a’u, ma tagata uma.

Le ekalesia e, e tasi lava lau feau, o le faaolaina o tagata. Ia e iloa,  o oe o le ‘ave feau’, ae le o se faamasino o le feau. O oe e te tatalo ma lagolago i nisi uso o loo ua galulue e atiina’e nisi vaega o le toe fuataiina o le ola faaleagaga o tagata. Ae le o le tausolomua o oe i le faaleaga ma lamalama le ola atia’e mo le manuia faaleagaga o le fanau o le talalelei.

O se galuega ua faasino mai e le Agaga o le Atua e fai, e le mafai ona tuua, e fai lava. E leai se tagata na te mafaia ona taofi. E le mafai e se malosi faafitafita, poo se pulega faa alii ma faipule, poo se pule faale malo ona taofi. Ia o fea nei la le malu o leoleoga a fitafita ma loka u’amea ma filifili sa loka ai le au aposetolo? Ua i’u i le māmāsagia ma ua taumanatu pe tua i ni a lea valea! (F.24).

Ua faapea le fautuaga a se tasi faiaoga o le au faresaio e viia e le nuu, “Tuu pea ia ia te i latou; auā afai e mai tagata lena sauniga ma lena galuega, e faaumatia ia; ae afai ua tupu mai le Atua, tou te le mafai ona faaumatia, ne’i iloa ua outou fai taua i le Atua.” (f.38,39). Ne’i e fai taua i le Atua na faia oe. O le faatonuga e mai le Atua, o lona faatinoga, o tā’ua. Ia manatua, o le ekalesia ua faatumuina e le Agaga, o le ekalesia lena e galue faale agaga ma tautua i la le agaga. Toe vaai iai. Vaai lelei iai. O iai tatou i le laina lena pe leai?

Le atunuu e, Samoa, o le Mana ma le Faatonuga mai le Atua mo oe ma tatou uma tai toatasi. O le Mana e tia’i ai le fefe ma le palaai. O le faatonuga e laveaiina ma faaolaina ai se agaga. O le Mana e manino ma malamalama ai mea uma; o le faatonuga e saoloto ma manuia ai tagata uma. O le Mana e gatasi ai maupuepue; ea ai vanu, sa’o ai pioga. O le faatonuga e mā’ona ai le mativa, e mălie ai le le tagolima, e mapu ai le tigaina.

Le au faatuatua e, e afua nei manuia ma nei lelei uma lava mai luga o le satauro o Keriso. Ua tulolo le malosi o le lalolagi, a ua auauna mea uma i Lē na manumalo a’ia’i i le lalolagi. Fai mai Luka, “Ua faalogo ai le au aposetolo, ona latou ulufale lea i le malumalu i le tafa o ata, ma a’oa’o ai (f.21).”

E le mafaia i so tatou poto poo se malosi faale-tagata. A o le Mana ma le Faatonuga mai le Agaga.

Amene

7737063/7783782

E-mail: petaiasetu@gmail.com

© Samoa Observer 2016

Developed by Samoa Observer in Apia