Fa’amuamua le Atua ma ia ola i se olaga faigofie

Tusia Aruna Lolani ma Fetalai Tuilulu’u ,

104 Hits

Faifaatoaga: Salesa Peleti mai  Fasito’o.

Faifaatoaga: Salesa Peleti mai Fasito’o.

Ua tele suiga o le olaga ae a faapea e te fia ola i se olaga saogalemu, ia e ola i se olaga faigofie ma ia faamuamua le Atua.

O le talitonuga lea a Salesa Peleti mai Fasitoo sa faaalia ile Fofoga o Samoa.

E 36 le matua o lona soifua ma o ia o se faifaatoaga galue malosi.

“O a’u ou te lei faigaluega muamua i se kamupani,” o le tala lea ile Fofoga o Samoa.

“O lau a ia galuega o le tapenaina o le fanua ma fai mea toto.

“E lelei a la le fai ole galuega ile taeao po ao lei malosi le la, aua e manaia ai foi lou oe galue.

Sa amatalia galuega a Salesa ile ta ole fitu.

“O a’u o se faifa’ato’aga ma ou te faataua lava lena olaga faapea foi lou aiga.

“E faigofie a le olaga faifaatoaga ia.”

Sa taua e Salesa, e fai lona toalua ma e tasi le laua tama teine ma o loo nonofo nei laua i Vailele.

Na mafua ona sau Salesa i Fasitoo ona o le fesoasoani i lona tuafafine aua o loo feagai o ia ma gasegase o le tino.

“Ia o lau galuega a la lea e fai, talu lava ona ou taunuu mai iinei.

“E taua uma a nei mea ia ita aua o mea uma ia o lo’o tausi ai lota aiga.

“E ave lava le faamuamua ile aiga ma e faamuamua foi ma faatauaina le Atua i o matou olaga aua foi o ia e saogalemu ai mea uma.”

E taua lava le ola ifo o tamaiti e malamalama i le olaga ma le taumafai o latou matua e galue aua se latou lelei mo le lumanai.

“O aiga a e taua ma o iinei e tatau ona aoaoina atu ai le fanau ina ia matutua ifo, e iloa le mea e tatau ona fai.

“E tatau foi ona aoaoina le fanau e faamuamua le Atua ma faatauaina foi o ia.

“Aua a e tusa lava pe e te atamai, ae a misi le Atua ma lou olaga, e leai se aoga.”

© Samoa Observer 2016

Developed by Samoa Observer in Apia