Aga’i le Asosi a Tusitala Samoa (JAWS) e fa’atulaga le Fono a Tusitala

By Fa’aliliu e Maiava 07 July 2016, 12:00AM

Ua amata fa’agasolo nei tapenaga a le Pulega o le Asosi a Tusitala Samoa (JAWS) mo le fa’atuina o se Fono mo Tusitala, e fa’ato’ai iai ma su’esu’eina faitioga ma fa’asea mai le lautele, e uiga i tusitusiga ma ripoti e fa’asalalauina.

I lana ulua’i fonotaga i le vaiaso nei, ua tonu ai i le Pulega e fa’alauiloa atu i tusitala ma vaega fa’asalalau fa’apea fo’i sui o le atunu’u e fia ‘avea ma sui o lea Fono a Tusitala. 

O lea fa’aaliga mo sui e fia ‘auai, o le fa’amautuina lava lea o le fa’atinoina o faiga-malamalama ma fa’ailoa tino atu le fa’agasologa o le filifilia o sui mo le Fono.

Tele fautuaga mo le vave tofia o se Fono le-tumau talu ai, le fa’asalalau lata mai nei o le tala i le maliu o Jeanine Tuivaiki i le itulau pito i luma o le Samoa Observer. Ae na ta’ua e le Pulega a le Asosi o Tusitala a Samoa, o le tulaga lena ua aga’i nei iai, aua lava le fa’amalosia o le Tulafono o le Fono a Tusitala 2015. E ui fo’i i le fia vave fa’atuina o sea Fono, ae taua lava 

Na fa’aalia e le Peresetene o le Asosi o Tusitala a Samoa, o Apulu Lance Polu, e le o se galuega faigofie. E tele feuiuia’iga ma galuega e ao ona fa’atino aua le fa’atuina o le Fono a Tusitala, o vaega ‘ese’ese e mo’omia mo galuega ae maise o seleni e fa’aalu peita’i o lo’o talotalo ia faia o se fa’ai’uga i se taimi vave pe a tali atu nisi e pei ona vala’aulia. 

O le Fono a Tusitala, o se finagalo na laga’ia e le Asosi o Tusitala a Samoa, e avea o se vaega e fa’atonutonuina galuega fa’aTusitala ma fa’amautuina fo’i le tausisia o tulaga mo’omia ma aga-masani fa’aTusitala. 

O lea mafaufauga na tosina mai ai fesoasoani tau-tupe mai le vaega e ta’ua o le Thompson Foundation i Uelese ma o le su’esu’ega ma le ripoti na faia mulimuli ane ai, sa avea ma mafuaga o le mau talanoaga ma feutaga’iga sa faia i Samoa nei ma taunu’u ai lava i le pasia o le Tulafono Tau Fa’aofi mo le Fono a Tusitala, lea na pasia e le Palemene i le tausaga talu ai. 

O lea lava finagalo sa fa’amaonia ma una’i malosi e le Malo, talu ai le tele o isi atugaluga ma fa’aletonu sa laga muamua fo’i, i le ‘auala na tusia ai ma fa’asalalauina nisi o tala i taimi  ua mavae.

O le Fono a Tusitala e tofia e le Komiti o Pulega a le Asosi o Tusitala a Samoa ma o le a ta’ita’ifono ai se loia e le i lalo ifo o le lima tausaga o avea ma loia po’o se fa’amasino fo’i, ma e leai sona so’otaga tu’usa’o ma le Asosi.

O isi sui o le Fono e aofia ai le to’alima o sui mai vaega fa’asalalau ma le isi to’alima o sui mai le atunu’u lautele.  

By Fa’aliliu e Maiava 07 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>