Manuia tele le 25 Tausaga Yazaki!

Tusia Ilia L. Likou ma Fa’aliliu e Maiava ,

209 Hits

Lealailepule Rimoni ‘Aiafi, Fe'esago George Fepulea'i, Afoa Va'ai Kolone ma Tuala Farani Chan Tung sa ‘auai i le Aso Fanau o le Yazaki Eds Samoa i Vaitele.

Lealailepule Rimoni ‘Aiafi, Fe'esago George Fepulea'i, Afoa Va'ai Kolone ma Tuala Farani Chan Tung sa ‘auai i le Aso Fanau o le Yazaki Eds Samoa i Vaitele.

 O ananafi na fa’amanatu ai le atoaga o le 25 Tausaga o le kamupani tuma’oti, le kamupani e aupito to’atele ona tagata faigaluega i le atunu’u, Le Yazaki Ed Samoa.

Sa ‘auai le Afioga a le Ali’i Palemia, Tuila’epa Sa’ilele Malielegaoi, o Minisita ma Minsita Lagolago ae maise malo ‘ese’ese ma le anoano o le ‘au- vala’aulia, i lea aso fa’amanatu na faia lava i Vaitele.

“’Ou te fa’amalo i le Yazaki ona o le loto-tetele e ‘aumai la tou fa’alapotopotoga e fa’atu i Samoa nei,” o le saunoaga lea a Tuila’epa.l

“’Ou te tatalo, ia avea tulaga lelei ua ‘ausia e la outou kamupani, o se vaega taua aua tonu-fai, mo le lumana’i manuia o le Yazaki Samoa… fa’afetai tele mo le iai i Samoa nei, i lenei 25 tausaga.”

Na ta’ua e Tuila’epa, ua lauiloa le Yazaki Samoa i le lalolagi atoa, i le lelei-tapena o ana oloa ma o se mea e ao ona mitamita ai, o ia o se ta’ita’i.

Sa momoli fo’i le fa’afetai a Tuila’epa, i tamali’i Samoa sa tele lo latou sao-aoga i le fa’atuina o le Yazaki i Samoa nei. O latou ia e aofia ai Fe’esago George Fepulea’i, o Afoa Kolone Vaai ma Tuala Farani Chan Tung.

“O le Afioga a Fe’esaga, sa galue punoua’i i le fa’atosinaina mai o pisinisi i totonu o Samoa,” o lana fa’aaliga lea. 

Nisi o le Aufaigaluega a Yazaki.
Nisi o le Aufaigaluega a Yazaki.

“Sa ia fa’ailoa mai ia a’u i le telefoni i lea taimi, o le a o-‘ese le Yazaki ma Ausetalia ma Niu Sila ona latou te le-gafatia le tau i na atunu’u.

“Sa ia taumafai malosi fo’i i le pulega i Ausetalia, ina ia o’o mai ma asiasi mai i Samoa, ma le fa’amoemoe e ono suiga ai se nofoaga ae filifilia Samoa nei.

“Na vavave lava a matou gaioiga (le Kapeneta), ma o le tasi lea o fa’ai’uga aupito vave tele na faia e le Kapeneta.”   

Na fa’afetaia fo’i ma ‘ave le fa’amalo a le Sui o le kamupani fai-ta’avale mai Ausetalia (le Toyota Motor Corporation, Ausetalia), o Roy Borg, mo le Yazaki Samoa. 

 “Manatua e fa’aauau pea on mulimulita’i i mana’oga ma tulaga lelei o le fa’atinoga o galuega, o ‘auala ma le gasologa o vaega ‘ese’ese, o vaega e fa’atonutonu ai ma siaki lelei galuega ae maise le asiasia o  tulaga aupito lelei ma mo’omia o galuega fa’atino,” o lana fa’aaliga lea.

“O a tou fa’atinoga fa’atasi ma le lelei atoatoa o le mafaufau i galuega, ua ‘ou matua talitonu ai, o le a fa’aauau ai pea ona si’itia la tou ‘au’aunaga. Malo lava!”

O le tausaga e 1991, na fa’atuina ai le Yazaki i Samoa nei.

© Samoa Observer 2016

Developed by Samoa Observer in Apia