O LA’U TALA FO’I

123 Hits

1. Matauina i le itulau i luma o le Samoa Observer ananafi se ulutala fai mai-“ua faailoa atu e le Palemia ia i latou o loo nofoia Sogi-ina ia o ese..”! Fai mai o se tusi e “faatula’iese ai i latou”ua tuuina atu ai le 30 aso e tula’iese ai……ma ua tatau ona latou tula’iese nei loa!

E mafua ona fai mai Tuilaepa-“o loo latou nonofo solitulafono i Sogi.”Ua uma ona tuuina atu ia i latou le avanoa e o ese ai- ae latou teena.Fai mai la le Palemia- e leai la se isi avanoa e toe tuuina atu ia i latou!

O lea la ua aliali mai-o le pogai o le faatula’iese o ia tagata mai Sogi-ona o le feagaiga lea na saini ai Samoa i Niu Ioka e uiga i suiga o le Tau ! O le popolega la e faasino i le itu tau tsunami ma le suiga o le Tau.

O le fesili la-aisea ua faamalosia ai tagata o Sogi ina ia tula’iese, ae faapefea Mulinuu ma le Taulaga atoa o Apia? Ae o le fesili taua lava-“Na faapefea ona nofoia e ia tagata Sogi? O le uiga o le fesili-o le pule a ai na faanonofo ai ia tagata i Sogi-ae o a ni aiaiga o lo latou nonofo ai?

Afai o loo nonofo ai i se faiga faa-solitulafono-aisea la na le aveeseai e le Malo o Niu Sila a’o ona pulea Samoa? Aisea na le aveesea ai ia tagata ina ua tulai mai le MaloTuto’atasi o Samoa i le 1962 i le taimi o Fiame Mataafa Faumuina Mulinuu II, Tupua Tamasese ma isi Palemia-ae o lea faatoa lote i le taimi nei? 

Ailoga la o se mafuaga tau le Suiga o le Tau-ua mafua ai ona faamalosia ia tagata ina ia tuua Sogi-a ua fia tausaga o nonofo ai ma maliliu ai o latou matua?

Faamata e le o le Uafu fou i Vaiusu lea ua pogai ai-poo se kamupani mai fafo o loo fia faaaogaina lea vaega-eleele? O le mea mata’utia la-o lea faatoa iloa nei -o loo nonofo solitulafono ia tagata i Sogi, ae ua fia tausaga o nonofo ai-ae o lea ua fai mai e o ese! O le a sou taofi? 

2. Matauina foi i Tala Fou se ulutala fai mai ua siitia e se a’oga le gagana Peretania-o lona uiga pe a toe faaupu-ua faataua le aoaoina o le gagana Peretania-ma e leai foi se tio i lea tulaga-ona o le gagana Peretania lava ia-e mo fafo-ma e foliga mai o le a fai foi se Aso Faapitoa mo lea faamoemoe. Ia-ailoga e i ai se mafuaga e tatau ai ona tatou faaseā i lea itu?

O le matau la i lea tulaga-e peiseai e le manuia lea mea o le faataua o se gagana mai fafo-ae le amana’ia le gagana Samoa! Afai la o le a faataua le gagana Peretania e se a’oga-o le fesili la-a faapefea le gagana Samoa? 

A faapefea le Tulafono o le Gagana Samoa lea ua uma ona pasia e le Palemene-ae leai se mea o faia i le gagana Samoa?

Afai la ua uma ona fai le Tualafono mo le Gagana Samoa-ae le o mafai ona faatino-o lona uiga-ua maumau le taimi o le Palemene na fai ai lea Tulafono- ae le o faatinoina! Afai la e le o mafai ona faatino le tapenaga ma le a’oa’oina o le Gagana Samoa-ia manatua la-o lea ua aoaoina foi i Samoa nei le gagana Saina-ma i le lumana’i -e foliga mai o le a nanu uma tagata Samoa ma tautala i le gagana a Saina-ae a tu’u ane i lana lava gagana-na te le iloa se mea e tasi!

E te fia nofo la i se atunuu e te faa-Samoa atu ae nanu mai pe faa-Saina mai? O le a sou taofi? 

3. Matauina i le taimi nei se tulaga uiga ese i nisi o Fale Televise-ona ua le toe vaaia i le tele o taimi e pei ona masani ai.Ua matauina foi e peiseai o le mea lava e fai e le isi fale televise- e fai foi e le isi. Mo se faata’ita’iga- e pei sa na o le tasi lava le Fale Televise na amataina le faiga o koleniga-ae o lea foi ua fai e isi.

Ia-e pule lava le Fale Televise ia e tusa ai ma ana auaunaga. Ae o le mea ua tupu-ua tau le vaaia ai ni tapuaiga poo ni sauniga-lotu i taeao-ae peiseai ua tatou lolotu lava i koleniga ma le faamalosi-tino; ae o le faalavelave-e peiseai e le o aoga lea fuafuaga-aua a silasila i tino o le ‘au-koleni-e le o mafai lava ona faaitiitia-ae peiseai ua faateteleina!

Ia-e na ona tātālogo atu lava ae pule lava Sitafune-i le La o lona vaa! O le a sou taofi? 

4. Matauina ma le fiafia le tautiga o tina o le atunuu ma le latou faalelegā-pepe lea faatoa mae’a atu. A tatou tilotilo lelei i ai- e le o se galuega e faigofie. O le tele o le taimi e alu i tapenaga o mea e faatino ai le lalagaina o  ‘ietoga.

Afai la o ia galuega e faaopoopo i le tausiga o le fanau ma tiute faa-tina uma i totonu o le aiga-tatou te le masalomia le fita o tapenaga mo lea faalelegā-pepe. 

Ae o le fesili-o le a se taui o maua e ia tina? Afai o toga uma nei e faaaoga mo le aganuu-afai la ua leai ni tupe-ae a ni faailoga taualoa e amana’ia ai nai tina-ae le na o le tu’ipala i le fai o nei faalelegā-pepe-ae leai se taui mo lo latou afu maligi! O le a sou taofi?

© Samoa Observer 2016

Developed by Samoa Observer in Apia