Alia’e mai ni mataupu mata’utia

By Deidre Tautua-Fanene 07 April 2018, 12:00AM

O lo’o faia nei su’esu’ega a le ofisa o leoleo e tusa ai ma ni maliu se tolu sa tula’i mai i ni taimi eseese i le Aso Tofi.

O le mataupu muamua e fa’apea o se tama sa ma’ua ua maliu i tua o le keli o se ta’avale la’u pasese.

O le isi taule’ale’a e fa’apea sa maua lona tino maliu ina ua so’aina e se tasi sa la’ua taumafa ava fa’atasi.

O le mataupu mulimuli o se taule’ale’a ua maliu ona o ni manuaga tuga sa a’afia ai o ia ina ua ia tatu’iina ni fa’amalama o lona fale ma ua tele ai le palapala ua alu ma maliu ai.

“E lua ni mataupu o lo’o masalomia ai le fasioti tagata ma se tasi o mataupu e tusa ai ma ripoti o le ua maliu na fa’ao’oina lava ia te ia nei manuaga,” o le saunoaga lea a le So’oupu a le Matagaluega o Leoleo, Auapa’au Logoitino Filipo.

Sa fesiligia Auapa’au poo ua iai nisi ua taofia mai nei mataupu, ae sa ia ta’ua e le’i o’o atu ni fa’amatalaga ia te ia.

“E le mafai ona ou tali auiliili atu e uiga i nei mataupu ona e pei ona ou faiatu muamua o lo’o fa’aauau pea suesuega a leoleo i le taimi nei.”

Ae sa ta’ua e se tasi o le matagaluega, o le mataupu muamua o se tama e 40 le matua o le soifua.

E fa’apea o lea taule’ale’a sa ia pueina se ta’avale laupasese e alu agai i Laulii.

“Ae peitai ina ua taunuu le taavale i Laulii sa sola ai le ua maliu e aunoa ma se totogiina o le pasese o le ta’avale.

“O nisi sa tutu i le auala sa latou pueina ai loa le ua maliu ma toe aumai i le ave taavale.

“Sa tu’uina ai loa le ua maliu i tua o le keli o le ta’avale laupasese ma agai mai loa i le Ofisa o Leoleo i Apia e fa’aulu ai le tagi ale ave ta’avale laupasese.

“Ae peitai ina ua taunuu mai i le ofisa o leoleo i Apia, sa maua ai ua maliu le sa tuuina i tua o le keli o le taavale.”

O le mataupu lona lua e aafia ai se tamā e 44 le matua o le soifua mai Vaitele Fou.

E fa’apea le fa’amatalaga o lea mataupu, o lea tamā 44 tausaga sa fai se laua inugaava ma se tasi foi o tamā.

“E pe tusa ma le 2 i le vaveao, sa amata ai ona ova le ona o le ua maliu ma faia ai ni leo, ma e fa’apea o ii lea na oso ai loa le o loo molia i lana ta’avale ma ia so’aina loa le ua maliu.

“Sa maliu o ia ona o ni manuaga tugā.”

O le mataupu mulimuli e a’afia ai se taule’ale’a e i le vaega o le 40 tausaga o lona soifua.

“O lea tamā e mai le afioaga o Lotofaga sa fa’asua’ava foi, ma e fa’apea ai sa iai se mea sa le fiafia ai o ia mai lona aiga ma o i sa ia tatu’iina ai ni fa’amalama o lona fale ma a’afia ai lona lima.

 “Sa tu’uina atu i le falema’i i Motootua ae peitai na maliu lava ona ua tele le palapala ua alu ona o le tuga o manuaga.”

By Deidre Tautua-Fanene 07 April 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>