Soisoi le alii Palemia i le taufa’amata’u a se tasi o afioaga

Tusia Deidre Tautua-Fanene ,

247 Hits

Alii Palemia, Tuilaepa Sailele Malielegaoi.

Alii Palemia, Tuilaepa Sailele Malielegaoi.

Sa soisoi le ali’i palemia, Tuilaepa Sailele Malielegaoi i se taufa’amata’u a alii ma matai o le fono o le afioaga o Luatuanu’u o le a molia o ia i lona ta’uleagaina o le nuu ma lona fa’aaogaina o le upu “ta’ifau” e fa’atatau i le nuu.

I le tali fuaitau a Tuilaepa i fesili sa tu’uina atu e fa’apea sa tatau ona lokaina uma sui o le nuu. 

Sa ia tu’ua’ia foi i latou nei e fa’apea o i latou nei sa taulamua i le polokaina o le auala, lea sa lamatia ai soifua o tagata lautele.

“Sa ou fa’alogo iai, ae ana ou iloa ua ou fa’atonuina leoleo e loka uma latou nei,” o lana saunoaga lea.

“O latou ia sa taulamua i le feeseeseaiga na tula’i mai ma latou unaia le tupulaga talavou e poloka le auala.

 “O latou foi nei sa latou fa’atonuina le aumaga ina ia tatu’u i lalo niu e poloka ai le aua ae o latou e siaki uma pasese o pasi po’o iai nisi o omai mai le afioaga o falefa.

 “E a? E tiga le mea moni ona latou te le’i mafaufauina o le a tupu lenei mea.

 “Ana o lo’u nu’u lea e tula’i mai ai le fa’afitauli lea, o le iuga lava o le oti ona o lea ua fa’aleagaina ai le nofolelei o le nuu.”

Sa ta’ua foi e Tuilaepa e iai soifua e ma’umau pe ana fa’apea e le tali atu alii malu o le malo i se itu fa’apolofesa.

 “O le a se latou gaioiga o le a fai? Sa latou polokaina le auala ma taofi taavale ma fesiligia pe omai mai Falefa.

“O le tulaga lea na latou faia e le talafeagai ma e le tusa ai ma ala o le tulafono, ma e tatau ona latou tali atu e uiga i latou gaioiga sa fai.

“Ana fa’apea e ma’umau se soifua o se leoleo i lea mataupu sa tulai mai, o se itu e sili lena o leaga, ma o iina o le a le mafai ai loa ona toe taofiofi alii malu o le malo.

“Ae ana fa’apea fo’i o ni matai moni lava latou e latou te malamalama foi i le uiga o la’u fa’amata;aga.”

Sa ta’ua foi e le taitai o le malo e oo mai i le taimi nei o loo faia pea suesuega a leoleo e uiga I le mataupu.

“Afai ae oo le mataupu lenei i le fa’amasinoga o le a ou valaau uma lava i tagata o le atunuu lea sa aafia i lea fa’alavelave e omai e molimau.”

I le vaiaso lenei, sa ta’ua ai e sui o le afioaga o Luatuanuu i le Samoa Observer o loo latou taumafai e ave se latou tagi e fa’asaga i le alii palemia i le ofisa o leoleo ma sa teena le latou manaoga.

O lenei fuafuaga sa fa’amaonia mai e le Sooupu a le afioaga o Luatuanuu ia Tofete Lafaua Tofete.

 “E le gata ua ia ta’uina matou o “taifau” ae ua ia fa’amutaina fo’i avanoa mo matou e oatu ai i galuega fa’avaitaimi i atunuu mamao, ma ia taofia foi matou au lakapi mai ta’aloga uma,” o le saunoaga lea Tofete.

 “Matou te talitonu e le talafeagai lea fa’aiuga, ua matuiā tele le fa’aiuga ua fai e le taitai o le malo ma e matou te le taliaina.”

O le isi itu sa ta’ua e Tofete o lo’o tiga le afioaga ona o le fa’aaogaina e Tuilaepa o le upu ‘taifau” e fa’atatau i le nuu.

“E le o ni upu ia e saunoa ai se ta’ita’i o se atunuu,” o lana saunoaga lea i le Samoa Observer.

“O le a le toe tutusa Luatunuu ona o nei fa’amatalaga ua malele mai i le fofoga o le Palemia.

“Ua ulagia le afioaga e tagata Samoa uma o lo o aumau i soo se itu o le lalolagi i le mae’a ai o le saunoaga a le palemia e fa’atatau i le afioaga.”

© Samoa Observer 2016

Developed by Samoa Observer in Apia