Se lapata’iga moni mai Luga? Pe se mea-fa’a’emo?

Tusia Pai Mulitalo Ale ma Fa’aliliu e Maiava ,

642 Hits

Toaipuapuga Opapo says she does not want to respond to people making up stories about her.

Toaipuapuga Opapo says she does not want to respond to people making up stories about her.

Na moei’ini o’u mata ae ‘ou fa’alogoina se leo o fa’apea mai, “e le pa le tane ma e le pe fo’i le afi”. Ua tatau ai i tagata uma ona to’otutuli ma tatalo i Le Atua mo se vavega. E fai e Le Atua vavega” –Toaipuapuaga Opapo

O se fa’aaliga ea po’o se lapata’iga, le mu o le tane-suau’u lea na sasao i le uafu i Matautu fa’apea fa’aaliga na muamua mai, lea na ta’ua ai se tama’ita’i fa’apea o lo’o ia tauavea fa’ailoga na o’o ia Iesu Keriso i taimi o Ona puapuaga?

E le ono toe fa’amanatu mai e mea ua tutupu nei, va’aiga ma mea fo’i na tutupu i le 2009, le ata e foliga o Maria na va’aia i le Maota o Ioane Viliamu, ae mulimuli ane, mu-lē-aogā le Faletalimalo o le Kitano Tusitala ae maise fo’i le sunami na maliliu ai nisi i Aleipata? 

O fesili nei o lo’o laualuga i finagalo ma mafaufauga o le atunu’u, ona o mea na tutupu i nai aso ua mavae atu nei.

E o’o i luga o upega-tafa’iLagi, o lo’o fa’aalia ai le tele o mafaufauga ma talanoaga ona o nei tulaga e aliali mai i totonu o le atunu’u. 

I Samoa nei lava ia, ua avea ma ‘autu o talanoaga i so’o se tulimanu, i aiga, a’oga, le taulaga e o’o lava i talanoaga i falesa. 

O ananafi, na fa’atalanoaina ai e sui o le Samoa Observer le tama’ita’i o Toaipuapuaga Opapo, le alo e 23 tausaga o le Fa’afeagaiga EFKS, lea na avea ma ‘autu o le tele o talanoaga, ina ua fa’ailoa fa’alaua’itele fa’aaliga na o’o ia te ia i le vaitaimi o le Eseta.

Na fesiligia pe talitonu, o le mu i le Aso Gafua, o se lapata’iga? 

Ni fa’ailoga ia mea? 

 “’Ou te manatu o se fagufagu lea mo Samoa,” o lana fa’aaliga lea.

Na ta’ua e Toa, o ia sa i lona aiga i Vaitele, ae vili atu se fafine, e ta’u atu ia ia le mu.

“Na ‘ou autilo atu mai le fa’amalama ma iloa ai le mu mai lo’u potu. Na ‘ou fa’alagonaina i le taimi lea, le tiga, na ‘ou popole i tagata o le a a’afia.”  Fai mai Toa, sa taumafai e fa’afeso’ota’i lona tama-Faife’au, ina ia latou tau-fai tatalo fa’atasi.

Ina ua le mafai ona o’o mai lona tama i le taimi lea, na la o ai ma lona tina i le taulaga ma va’ai-tino ai loa i le mu. E le’i umi ae o’o atu lona tama. 

“Na ‘ou to’atuli ifo i tafatafa o le ‘auala e fa’afesaga’i ma le mu, ma tu’u-atu atoa lou agaga i Le Atua, mo Samoa,” o lana fa’amatalaga lea ma fa’aopopo mai, a’o fai lana tatalo, na fa’afuase’i ona ia le-iloa le mea o lo’o iai.

“Na moei’ini o’u mata ae ‘ou fa’alogoina se leo o fa’apea mai, “e le pa le tane ma e le pe fo’i le afi”. Ua tatau ai i tagata uma ona to’otutuli ma tatalo i Le Atua mo se vavega.  E mafai e Le Atua ona fai vavega.”  Fai mai Toa, na fai e Le Atua se vavega i le aso lea. 

“E ono to’atele nisi e ma’umau soifua i lea aso peita’i, ua fa’asaoina e Le Atua,” o lana tala lea.  “Ou te le’i faia se vavega, a’o Le Atua.” 

Na fa’apea mai fo’i, o le fafagu mo Samoa ma ona tagata, ma e tatau ona fa’afetaia e tagata uma ma manatua, tatou te le-iloa le mea e tupu i o tatou olaga, i le isi lima minute o muamua. 

“’Ou te iloa, e to’atele nisi e le talitonu ia a’u ae le-afaina lea. ‘Ou te talitonu lava o la’u lea galuega e fa’atino, o le fa’ailoa atu o le ‘Upu a Le Atua. E iai le aso e fa’amasinoina ai tatou.

Na saunoa fo’i le Fa’afeagaiga o Opapo Oeti (FS), e foliga e fou lava manu’aga ma fa’aaliga i le tino o lona afafine i le taimi na tupu ai le mu. “Na ‘ou va’ai ua toe tafe le toto mai ona lima, o ona vae ma fa’ailoga o le pale-tuitui atoa ma le fa’ailoga o le tao i lona itu.” 

O le Aso Gafua na ta’ua ai e le Faife’au, sa iai fa’atasi ma lona afafine i le taimi na tatalo ai i ‘autafa o le ‘auala, ma o le ulua’i taimi fo’i lea ua to’otuli ai (le Faife’au) i se nofoaga faitele fa’apea.

“Afai lava o le ‘auala lea e ‘auina mai ai e Le Atua lana fe’au ma le va’aiga mo Samoa, o ai tatou nei e fesiligia ai?” o lana saunoaga lea.  I se taimi o lea lava aso, na aga’i atu ai le Faife’au ma lona alo-tama’ita’i lea ia Patele Mikaele, ma faia fa’atasi ai sa latou tatalo i le Kafetala o le Ekalesia Katoliko i le taulaga. 

Lua vaiaso talu ai, na mapuna-a’e ai le tala ia Toa, ma e ‘ese’ese lava lagona na fa’aalia e le to’atele o Samoa, e le gata i totonu lava o le lotoifale, ae fa’apea fo’i latou i atunu’u mamao.

E iai nisi o le atunu’u – e aofia ai le Ali’i Palemia, Tuila’epa Sa’ilele Malielegaoi – e talitonu, o se vavega ua faia. O nisi na fa’apea mai, o se ata-fa’a’emo, ma fa’apea ai, o Toa na ‘auina mai e agaga-leaga. 

Mai lava i le amataga, o lo’o maumaututu pea le aiga o Toa, e pule lava le tama a le ‘olomatua ia, i le mea e fia talitonu iai. 

“Ina ua fa’atoa ‘ou va’ai i fa’aaliga ia, sa ‘ou le-mautonu…E leai so’u manatu o le a fa’ailoa mai Le Mesia ia te a’u i se ‘auala fa’apea… Sa ‘ou fa’apea, e le o a’u o se faife’au, e le o a’u fo’i o se misionare,” o le fa’aaliga lea a Toa.

“Ae aisea ua filifilia ai a’u? Na o a’u o se tagata ma’i so’o. Ua tolu nei o tausaga o ‘ou tauavea pea lenei ma’i. O se ma’i fo’i e leai se fofo. Pau le mea ‘ou te iloa, o Iesu lava le foma’i-o-foma’i.”

O le iai ia te ia o fa’aaliga nei mai Le Atua, o se mea na matua fa’afetai ai, ma fa’aopopo mai, o se fe’au fo’i lea mo le ekalesia ma Samoa atoa.

“Ua na o a’u o se tagata-ola e pei o isi… ae ua fa’aaogaina lo’u tino e fai ma  fa’amanatu aua e silafia e Le Atua, ua amata ona mou atu le fa’atuatua o ana ‘au’auna. E amata mai lava i e o ta’ita’i i Ekalesia, e amata mai i’ina le agasala…”   

Ona o le fia maua lava o se tali, na aga’i ai aiga o Toa i nisi o le atunu’u e iai ‘taleni-fa’apitoa’, lea e ‘ese fo’i o latou talitonuga ma fa’amatalaga, e a’afia ai se tasi ua maliu.

Ae le’i fa’aitiitia ai le to’atele pea o nisi sa talitonu ia Toa ma lana ta’utinoga, ma naunau ai e ta-pu’e ni o latou ata ma le tama’ita’i ma ia fa’amanuia atu fo’i ia latou. 

Ua salalau atu le tala a Toa ma fa’aaliga na o’o ia te ia, i isi atunu’u e fafo atu o Samoa. 

O ananafi, na ta’ua ai e le leitio a Ausetalia (ABC) se fa’aaliga a Porofesa Paul Morris mai le Matagaluega o Su’esu’ega fa’aleLotu i le Iunivesete o Vitoria i Ueligitone e fa’apea, e seāseā lava tupu se fa’aaliga fa’apea i fafo atu o le Ekalesia Katoliko Roma. 

“E seāseā tupu…e to’aititi lava nisi e le-Katoliko e tupu ai fa’aaliga fa’apea,” o le fa’aaliga lea a Porofesa Morris i le leitio a Ausetalia.

 “Peita’i ane, o le Ekalesia Fa’apotopotoga Kerisiano i Samoa – e aupito to’atele ma tele i Samoa – ua tele a’afiaga sa latou feagai i le 15 i le 20 tausaga talu ai, ona o isi ekalesia.

 

“I tala-fa’asolopito o fa’aaliga nei, e masani ona tutupu i se vaega fa’apitoa e maua’a le fa’atuatua ma o latou talitonuga, ma naunau e toe fa’apotopotoina i latou ua tau mou-‘ese le fa’atuatua.

“O le tulaga la lea, e seasea ai ona tupu lea mea peita’i, sa tatau ona o se tama’ita’i-Katoliko.”

“E faigofie lava ona ta’aina le mafaufau ona o nei fa’aaliga ma va’aiga.” 

Peita’i, e tumau pea le mau fesili i se tali talafeagai o nei va’aiga.

“O le tali-talafeagai muamua lava, pe le o se aiaina ea lea o le natura o mea, ae maise, ona e leai se uiga,” o le fa’aaliga lea a Porofesa Morris.  

Ae na saunoa, ua iai molimau lelei e iloa ai, e le o se tau-fa’a’ata pe tau-fa’asese fo’i, e pei lava ona masani ai o le soifuaga. 

“O le isi fa’amalamalamaga,  o se a’afiaga o le mafaufau, le naunau e fia-iloa… ae maise o se tama’ita’i po’o se ali’i-talavou fo’i ua fa’ananau tele e fia Iesu,” o le fa’aaliga lea a Morris. “O le tulaga masani lava lea, e i’u ai i fa’aaliga fa’apena.” 

Na ta’ua ai e le Ali’i Porofesa, suiga vavave ua iai nei ae maise o lu’itau ua feagai nei mo le fa’atumauina o le lotu ma ekalesia kerisiano, lea e afua ai “se vala’au mo le fa’atuatua”, ua tupu ai lenei fa’aaliga i Samoa nei.   

Na ta’ua e Toa i lenei taimi, e fa’afetai ia latou sa asiasi atu, mai lava i le amataga o nei fa’aaliga. Na fa’aopopo mai fo’i, e tumau pea ona tatala le faitoto’a i so’o se tasi e fia talanoa atu ma fa’asoa i le Alofa o Le Atua.

© Samoa Observer 2016

Developed by Samoa Observer in Apia