Tapena ‘Oe ia Manuia (Vaega 2)

By Fa’aliliu e Maiava 07 April 2016, 12:00AM

Toe mafaufau tasi lava… O le mea muamua lava ma aupito tāua, o mana’oga mo’omia mo le manuia, o le fa’aosofia lea o ‘Oe ma e naunau e galue. E ao lava ona e mautinoa, o au tonu ma gaioiga e fai i aso ta’itasi, e te tu-lalata ai i lou fa’amoemoe. Na o lau susuga lava, e te lelei  pe le-lelei ai fo’i lou olaga.

Lona lua o mana’oga e te mo’omia mo sou manuia, o ou tomai ia ma agava’a, ou malosi’aga e tatau ona fa’a’i’ila i taimi uma, e ala lea i le fa’aaogaina pea lava pea i le tele o taimi. E ‘ausia lea tulaga, pe a to’aga e fa’ata’ita’i ma saga fa’ata’ita’i pea.

O tala masani a tamaiti: E fai-fai-a lelei. O le ‘auala lena e te maua ai le poto-masani ma avea ai o le porofesa i au mea uma e fai. “E te soifua lava ma a’oa’o.” Ae fa’anoanoa la, ona o nisi o tatou e na ona ola, ma fa’apena ai lava ona fai o mea-sese, ma fa’atino le tele o mea i ‘auala ua masani ai, tusa lava pe sa’o ma lelei ai, pe leai fo’i. 

Lona tolu o mana’oga mo se manuia, o le poto po’o le iloa. O se fa’ata’ita’iga, e tatau i se tagata fa’atau-oloa ona iloa fa’amatalaga uma lava e uiga i se oloa po’o se ‘au’aunaga fo’i na te fa’ataua pe fa’atinoina mo se nisi, ae pe fa’apefea fo’i ona ia fa’atau atu.

O le ituaiga poto lea, e mafai ona maua mai tusi, o polokalame fa’aleA’oa’oga, o mata’upu i a’oga fa’apea fo’i ona maua mai tagata ua iai ia tomai ma agava’a fa’apitoa, e mafai ona a’oa’o mai ai. O le mea moni, a’o fa’aauau pea ona e a’oa’o ia tekinolosi ma ia malamalama fou, ua mafai ai lava ona e ola manuia. 

Na o tagata finafinau ma latou e taumafai ma saga taumafai pea, e i’u ina manuia; tu’u atoa loa iai lou iloa, fa’aaoga iai au taleni ma ou agava’a.  O le tu’u-atoa iai o lou loto, lou naunau ma finau iai i aso ta’itasi, e te latalata ai i lou fa’amoemoe. 

E iai se vaega o tupulaga-tama sa naunau e fia maua ni a latou galuega lelei, ma ia lelei fo’i i le a’oga; ona amata lea ona a’oa’o e se ali’i-faiPisinisi. Na amata a’oa’o i ai, a galulue malosi, galulue lelei ma fa’aaoga lelei o latou mafaufau, e vave ai lava ona manuia ma lelei e pei ona latou fa’ananau iai.

Sa a’oa’oina fa’apitoa fo’i i latou, ina ia iai lo latou talitonuga, i o latou tagata ta’ito’atasi. I le na o le 30 aso, ae maua uma galuega a tama ia e 16! E uma ane le 90 aso, a ua ‘ausia e le to’atele o nei ali’i, tulaga maualuga tali-tutusa ma le 2 tausaga!

Na tonu ia latou, ia fa’aauau pea le galulue malosi, ma galue poto aua se manuia mulimuli ane.

O nai ta’iala lava ia sa a’oa’oina ai le fia selau o pagota i se falepuipui, na manana’o i ni suiga mo so latou manuia. Mai le 800 o pagota, e 84 pasene o i latou na le-toe o’o i le falepuipui, a ua maua galuega lelei!

Aisea e le amata ai lou ‘auala i le manuia i le asō? O le ‘auala muamua, o le tatalo iā Iesu e pulea atoa e Ia lou fatu ma ala o lou olaga. O Ia e mafai ona fesoasoani iā ‘Oe e a’oa’o tomai ma le malamalama e te mo’omia, e manuia ai. O ia fo’i e avatua iā ‘Oe, le musumusuga e una’ia ai lou naunau e ola atoatoa i Ana fuafuaga sili ma le fa’amoemoe lelei mo le ola. Toe mafaufau tasi lava…

By Fa’aliliu e Maiava 07 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>