Manatu o le Fa’atonu - Loto-ti’a’a le-fo’i i se afi

Tusia Mata'afa Keni Lesa ma Fa’aliliu e Maiava ,

188 Hits

 ‘Ave le fa’afetai i le mea ua tatau ma talafeagai iai. O latou ua fetaui ma onomea iai, fa’afetai uma o lenei vaiaso, o le vaega-finau ma loto-tetele, a le Pulega mo ‘Au’aunaga Tau Tinei-Mu ma Fa’alavelave Fa’afuase’i, (FESA).

O lo’o talanoa atu i le vaega-totoa lea sa finau ma le mu-mata’utia na sasao ane i le tane-suau’u i le Aso Gafua, na matua gatete ai le mamalu o lo tatou atunu’u.

Lenei la aso, e ao lava i le atunu’u aoao ona tatou fa’afetai ona o fa’amanuiaga, aua o ai e mafai ona taofiofia lea fa’aletonu, pe ana o’o atu i se tulaga faigata, ma tupu mai ai se isi fa’afa’alavelave e sili atu.  

O le tala masani lava, o le ata e tasi e sili atu i ‘upu e afe. A toe tepa tasi i le fa’alavelave lea, e iai lava le ata e tasi na pu’e e Vatapu’ia Maiava o lenei nusipepa, e latalata lava i le vaega tonu na tilofia ai ma maofa i le totoa, ma le ti’a’a o fatu o a tatou tama-fui-mu. 

Le ata lea na pito i luma o le Samoa Observer i le Aso Lua ma toe fa’asalalauina fo’i ananafi i le Itulau e 10, o lo’o va’aia ai ali’i-fui-mu e to’atolu, o pipi’i lava i le tapuni o le tane lea na lelea ‘ese. E tasi lava si fa’aga’au-vai sa ia latou, ui e tau-le-iloa atu ona o le malosi ma le tetele o le asu mai le afi.

Leai se isi va’aiga i tala-atu e fa’amatalaina ai le tulaga-moni o le ogaoga ma le mata’utia o le galuega a le vaega-tinei-mu i Samoa nei. Latou totoa nei, o ‘au’auna sa ofo atu lo latou soifua, ui e le o matua atoatoa a latou tapenaga tau-lavalava e fa’afeagai ai ma se afi mata’utia fa’apea.     

O le ta’ua o lea tulaga, ua tatau ai nei ona fa’afetaia ali’i-totoa nei. Tatau ona fa’afetaia le Ali’i Komesina, o Lelevaga Fa’afouina Mupo, ona ua le-u’u le tofa a’o le silasila i le lotoifale o lona tafa-fa, a ‘ua sopo-loa i tu-atu, aua lava le puipuiga o Samoa.

Ua ta’ua lea tulaga, ona o le mea moni lava, e matua leai leai se tagata e fia latalata i se tane-tumu i le tiso a’o mu, ae maise la, e pipi’i lava ma isi fo’i tane-suau’u e lua, e faigofie lava ona a’afia ma pasae ai. A’o taufetuli-‘ese le anoano o le atunu’u sa iai i Matautu i lea taimi, a’o nai ali’i-fui-mu nei, e leai se isi tonu, na o le taufetuli i le tane o lo’o mu. 

Leva ona tatou iloa, e le tatau ona latalata le ‘Au-fui-mu i se afi –tatau ona 100 mai le tane na mu, peita’i ona o le ‘uti’uti o meafaigaluega e fa’atino ai le galuega mai le mamao lea, na mafua ai lava ona fa’alatalata tele iai. Ae na matua o’o lava iai. Oka sole! Se totoa ma le lototetele ina mata’utia! Ioe, MALO LAVA SE, MALO FESA!   

O le tele lava o taimi, o latou nei e taula’i iai le tele o faitioga a le atunu’u ona o le fa’atinoga o a latou galuega. Ae sa’o fo’i i nisi o taimi.

Ae a manatu lava i le tele o lu’itau ma fa’afitauli o feagai nei ma le FESA – e pei o le ‘uti’uti o mea-faigaluega, o le fa’asoa tau-tupe, o tagata-faigaluega ma isi gaosa, ua tatau ai ona avea le fa’alavelave lea i le Aso Gafua, o se fafagu mo le malo, ina ia silasila ane i le fa’aleleia atili o mea-faigaluega e fa’aaoga e le FESA.   

I si o tatou nei atunu’u, e mautinoa lava lo tatou nofo-popole mo le saogalemu o Samoa atoa ae maise le silasila toto’a i le malosi o iai nei o le Pulega, e fa’afetauia ai fa’alavelave matuia fa’apea. 

A le faia se fa’atatau i vaega nei, e mautinoa lava, e lamatia le soifua o Samoa i le lumana’i. 

Ae tatau lava ona manatua, i le taimi o se mu-tele fa’apea, e le popole lava le afi i ni fa’aletonu, a’o ni lu’itau o feagai ma vaega-fui-mu.

O lona uiga, o lo’o ta’afifili lava ma a latou mea-faigaluega fa’aletonu o iai nei, e taunu’u atu i se mu, ua liu-efuefu uma se fale pe ua matua fa’atama’ia lava. A ua tatou va’aia so’o lea tulaga. Ua tatau ai lava ona fai iai o se fa’atatau. 

O le fe’au mo tatou, lea fa’atoa tolu masina, a ua fa’alua ona tutupu o fa’afitauli tetele fa’apea, e fesiligia ai pea le malosi’aga o le FESA e tali lelei atu i ai. Na muamua le Maketi i Savalalo, o le Aso Gafua, o le isi itu o le taulaga lea ua mu.   

I nei fa’alavelave uma, le mamalu e, o le atunu’u, na saogalemu lava si a tatou Samoa. 

Ioe, o le Agalelei lena ma le Alofa-le-mavae o Le Atua ae maise le finau maua’i o le vaega uma a le FESA, ui i nai mea-faigaluega le-tua o i o latou a’ao. Ae taua lava le logologo ma saga logologo pea i le malo. ‘Ave le tupe i le mea e tatau ai, lea e saunoa so’o ai, mo le saogalemu o le mamalu o Samoa. Lea e talanoa atu i le mana’oga-tuga, o le ‘aumai o mea-faigaluega lelei atoatoa e fa’atino ai galuega a nai ali’i-totoa o le Vaega o TineiMu. 

Pau lea o le malosi e gata ai lo latou taumafai. E le ‘alofia le moni o lena mea. 

A silasila ia Samoa i aso nei, ua fa’asolo lava ina lapopo’a ane ma tetele atu-falega, ua tula’i mai ai fo’i ma masaloga, pe le’i fa’ateleina ai ni avanoa mo nisi afi ma mu-tetele i le lumana’i. O lona uiga, o le a avea pea o se fa’afitauli tele i le lumana’i, le soifua saogalemu o le atunu’u.

Ae ono fesili se tagata, a’o fea a ‘aumai ai e le malo se tupe?

Ae a pe a amata i le mau miliona o tala o lo’o fa’ama’umau i faiga-fa’aalatua ma faiga-pi’opi’o a nisi o le ‘aufaigaluega a le malo, lea na maua e le Su’etusi Sili ma le Komiti a Ofisa o le Palemene? E le manaia ae fa’aaoga le tupe lena mo mea-faigaluega a le Vaega Tinei-Mu ma isi ‘au’aunaga fa’apena, nai lo le fa’ataga-fa’agalo nimo ai lava o le fa’aaogaina-sese ma leiloloa atu ai lava na seleni e tele? Le a sou finagalo?

Manuia tele le Aso Tofi Samoa. Fa’amanuia atu Le Atua!

© Samoa Observer 2016

Developed by Samoa Observer in Apia