Ma’umaga lava le tali

Tusia Fetalai Tuilulu’u ,

118 Hits

Le Tama ia Fuipani Teo.

Le Tama ia Fuipani Teo.

O le maumaga o se tasi o galuega o le toatele o tagata e lē fiafia iai. 

Ae mo le Tama ia Fuipani Teo, e sili atu ai le manuia e maua mai I le maumaga aua mea fai ma le tausiga o fanau ma aiga. 

Aua o le mea muamua a ia, o lelava mai le mamafa o galuega I le maumaga, toe lelava ai aemaise o le galue malosi.

“E faapena a tulaga e oo I nisi o aiga e pei o le matou aiga aua e leai seisi e faigaluega o le matou fale, na’o le faatoaga lava e tua iai.

“Afai o oe o se tagata e leai se galuega, o le maumaga lava o lau tupe maua lea ma meaai mo le vaiaso mo le aiga.

“Ua leva ona matou galulue iinei, ma atia’e le matou faatoaga” o lana tala lea I le Fofoga o Samoa.

O le masani lava a le tama ia Fuipani, o le ave lea o meamata e faatau e maua mai ai se tupe mo le tausiga o ia ma lona aiga.

“A faatau e $50tala le tupe e maua mai ai I le aso, ma I lena tupe e le taitai lava lona faasoasoaina mo mea fai a lo’u aiga aemaise pili aoga a la’u fanau.

“E leai lava seisi alaga tupe o loo faamoemoe iai lo’u aiga, nao le maumagalava.

O le faamamafa a le Tama I lenei tausaga, o aoga a lana fanau.

“E ave lava le faamuamua I fanau aoga ma a latou pili aoga, ma o le ala foi lea o lo’o matou galulue ai lava ma la’u fanau e toalima, aua o le faatoaga ua tele ai lava se fesoasoani mo a’u ma lou aiga.

“Ua le ma lava le mativa, ae o lo’u fale o lo’o moomia ai lava se fesoasoani, ina ia mautu ma sefe se mea e nonofo ai la’u fanau.

“A oo ina tetele timuga, ua faugata iai matou, pei ona outou vaaia, e le’o se fale mautu foi toe lelei.

Na ia taua foi, o le galue ai I le faatoaga, e aumaia ai le filemu ma le fiafia mo lona aoga lava ia, aua e leai se vevesi e maua mai ai.

“Ae o le mea e faafetai ai, ona o lo’o ola mai pea le suavai ma le eletise i taimi uma aua e pei o mea faigata lava ia e le mafia e se aiga ona ola ai pe a leai.

Ma o le talitonuga o le tama, o le maumaga lava le tali pe a leai se galuega, aua e faigofie toe filemu leai se vevesi.

© Samoa Observer 2016

Developed by Samoa Observer in Apia