Manatu o le Fa’atonu - Sui Ta’ita’i Fou ua mau i Tala-fa’asolopito

07 March 2016, 12:00AM

Tusia - Marj Moore

Fa’aliliu e Maiava

 

O se matati’a e ao ona matua patipatia leotetele, le filifilia lea e se vaega e aupito to’atele i ali’i, o se tama’ita’i e avea ma Sui Ta’ita’i o le Vaega Fa’a’Upufai e Puipuia Aia Tatau a Tagata, le HRPP.

A o se mea fo’i ua leva na tatau ona tupu.  

Moni sa matua pisapisao ma ‘ava’avau le una’ia ma le fa’atauaina o aia-tutusa a tama’ita’i ma ali’i i lo tatou nei atunu’u, a o le filifiliga o Fiame Naomi - o se tasi o sui-tuai o le Kapeneta - mo lea tofiga maualuga, o se fa’ailoga lelei lea mo lo tatou nei atunu’u.   

Ae maise ai fo’i la, o lē sa la tauva, Faumuina Tiatia Liuga, o se tasi ua lauiloa uma ona fa’aletonu talu ai faiga fa’atautala o tupe-faitele a le ‘aufailafoga ma uiga fa’ale-keakea e fa’aalia pe a fesiligia i le so’ona fa’aaogaina o tupe.

O le leai o sana tali aloa’ia na tu’uina mai i le mau ripoti fa’aletonu a vaega su’esu’e a le palemene ma le malo, e matua mo’omia ai lava se tali, pe aisea lava ua ‘saga tu’ufau ai ia ituaiga amioga ma le aloa’ia i totonu o faiga-fa’aUpufai po’o faigamalo fo’i ma le tulafono.  

Pe o se faiga fa’aufiufi e taofiofia ai le HRPP nei ta’ape, pe a-mea e tele atu sona silafia ma a’afiaga, ma malamalama i “faiva ‘ai-lililo” e tatau ai ona fa’amalie ma taofiofia ai pea lana afioga?   

Po’o a lava mafuaga ogaoga, o ona taimi “mata’utia” a’o avea ma Minisita o Tupe, e le mafai ona fa’agalo ma fa’amagaloina e le atunu’u aoao tusa lava po ua fa’apena ona fa’amagalo e nisi o lana vaega i le HRPP.

E matua vala mamao pe a fa’atusatusa ia Fiame, o se tasi ua loa tausaga o avea ma sui o le Kapeneta ae maise ai le maualuga ma le maua’a o tulaga-fa’aTa’ita’i na foafoa ai ma tapena e ona tua’a ua fai-i-lagi.

O se tasi ua matua talafeagai ma agava’a e avea ma Sui Ta’ita’i ma e talotalo ai, ia ‘avea o ia ma ulua’i Sui Palemia Tama’ita’i o lo tatou atunu’u.    

Mai le tele o tausaga sa tautua ai, ua anoanoa’i lona silafia ma le malamalama i vaega ‘ese’ese uma o le malo sa avea ai o ia ma Minisita, e tu-matila fo’i lana ta’ita’iga a’o avea ma ta’ita’i o nisi o fa’alapotopotoga fa’aItulagi fa’apea le Lalolagi ma o ia lava taimi uma, sa solisoli muli’a’ao ai lava i lona tua’a i ana taleni, e fa’asoa ma talanoa ma so’o se tagata i so’o se vaega o le soifuaga nei.   

O le avea ai ma sui tama’ita’i muamua i le Kapeneta, sa finau malosi ai fo’i mo isi tama’ita’i ina ia ‘auai ma finau i tulaga fa’aUpufai ma atili fa’amanuiaina ai pea i tomai ma agava’a talafeagai mo ia tofiga.  

O lona tomai ma le silafia na ‘ausia i le 30 tausaga talu ona iai i le palemene, na ia fa’aalia ai, o le avea ma sui faipule, o se a’oa’oga e ‘umi se taimi o fa’amasani iai ma e mo’omia ai lava le galulue fa’atasi ma isi.  

Na ia lapata’ia fo’i faipule, ina ia ‘ave le fa’amuamua i polokalame e manuia ai le lautele o nu’u ma itumalo, ae le o mea e manana’o ai lava latou.

Mo faipule fou e aofia ai Ali’imalemanu Alofa Tu’u’au mai Alataua West, o se fautuaga lelei tele.

E momoli atu la matou fa’amalo i le Sui Ta’ita’i o Fiame, le  Palemia o Tuila’epa ma faipule uma ua fa’amanuiaina i Faiga Palota Tele o le 2016.  

Manuia lenei vaiaso Samoa!

07 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>