Tu’ua Savai’i mo Upolu ona o le sa’ilia o le manuia

Tusia Deidre Tautua-Fanene ,

46 Hits

Puna Iosefo mai Savaii ma Nuu Fou.

Puna Iosefo mai Savaii ma Nuu Fou.

O le sa’iliga manuia lava e ala ai ona tele tagata e tu’ua o latou aiga ae malaga ese mai.

O Puna Iosefo, 48 le matua o le soifua ua tu’ua aiga i Lefagaoali’i, Savai’i ae omai i Nu’u-Fou ona o le su’e manuia lava auā se lumana’i manuia o aiga.

Sa ta’ua e lea tamā e ala ona tu’ua e isi tagata o latou atunu’u moni pe tu’ua foi Savai’i ae omai i Upolu ona o le fia maua lava o se galuega.

“E telē le eseesega o le olaga i Savai’i ma Upolu nei,” o lana saunoaga lea.

“E faigata tele ona maua se galuega i Savaii, e pau lava le nofoaga e mautinoa le maua ai o le galuega e na o Salelologa lava, ae o le to’atele o isi tagata e i ai a’u e nonofo mamao ma Salelologa.

“O le fa’afitauli muamua lava o le mamao, ma e faigata fo’i ona tau su’e se auala e sau ai i Salelologa se’i vagana e i ai lava sau oe ta’avale.

“E pei o le mafuaaga lena e faigata ai i le to’atele o lo’o aumau i Savaii ona maua ni galuega.”

Sa ia ta’ua e to’atolu i latou o lo’o latou nonofo fa’atasi I Nu’u Fou. O le ulugali’i o lo’o latou nonof fa’atasi o ona aiga e faigaluega uma laua se’i vagana ai ia.

“O le fanua lenei o lo’u uso e onaina o lo’o faifeau nei.

“Ua ono nei masina talu ona matou nonofo i’inei.

“E na’o lo’u tinā o lo’o soifua mai pea ma o le taimi nei o lo’o aumau i Niu Sila i nisi fo’i o aiga..

E ui i le lē faigaluega o Iosefo, ae na ia ta’ua o ia o lo’o gafa ma le va’aiga o le fanua o lo’o latou nonof ai.

Sa ia ta’ua fo’i i le Fofoga o Samoa, so’o se taimi lava e alu ai i le faleoloa e na te maitauina lava le taugatā o le tau o oloa.

“Ua fai lava si taugata o le tau o le soifuaga lea ua i ai nei.

“E o’o lava i le tau o le apa eleni ma le moa ua ova atu ma le $3. 

“E tusa lava po’o le a le tatou taumafai e sefe le tupe e le mafai lava ona o le taugata o le tau o le soifuaga.

“E leai lava sesi e mafai ona alo ese mai i le tau o le soifuaga lea ua i ai i le vaitau lenei.”

© Samoa Observer 2016

Developed by Samoa Observer in Apia