Miti e fia avea ma leoleo

Tusia Deidre Fanene ,

103 Hits

Vaomua Ropati 14 tausaga mai Moamoa.

Vaomua Ropati 14 tausaga mai Moamoa.

O Vaomua Ropati 14 tausaga mai Moamoa o lana miti o le fia avea lea o ia ma leoleo.

I le faatalatalanoaga ma le Fofoga o Samoa sa faaalia e Vaomua o ia e fia avea ma alii leoleo ae peita’i e le mafai ona faataunuuina lea miti ona e le’o mafai e Vaomua ona aoga.

“E fia avea lava a’u ma leoleo.

O la’u miti lea out e naunau lava i ai ona ou te fia fesoasoani i tagata o Samoa ae sili ai lo’u fia fesoasoani i lo’u tamā.

“O a’u ou te le’o toe aoga i le taimi nei ona e le mafai e o’u matua ona totogi lo’u pili aoga.

“O la’u galuega la lea ua fai i le taimi nei o lo’o o’u kilivaina ia mea fa’amanogi ta’avale ma vili taliga out e fesoaosani ai I lo’u tamā ona e na o ia e faigaluega o le matou aiga.”

Sa fesiligia e le Fofoga o samoa Vaomua pe fiafia e alu e tiliva.

“Out e fiafia i ai ona o lea ou te fesoasoani ai i lo’u tamā ae o a’u out e fia alu lava i le aoga.

“O la’u galuega lea out e moemiti ai lava I taimi uma.

“O lo’u tamā e faigaluega i le fale e fai ai ufi o ta’avale ma nofoa e toavalu i matou e na’o lo’u uso matua e aoga a’o matou e le ao’oga  ona e le gafatia e matou matua e toatele i matou.”

E faigata le galuega o lo’o e faia?

“E fai lava si faigata ona ua toatele lava tagata ua kiliva i luga o le auala.

“O le ala foi lea ua faafaigata ai lava ona toe maua se tupe lelei i se aso ona o le toatele o tagat ua faia lea galuega.

“Ae ou te tauimafai lava ia taulia uma a’u oloa ina ia ou fesoaosani ai I lo’u tama ma maua ai se matou meaai o le aso.

“O la’u tupe maua i le aso e $30tala ou te iloa e le taitai lava ae out e fiafia lava auā o lea seleni o le maua au se matou eleni poo se falaoa o le po.

“O isi taimi e faimai ai lava o’u matua out e nofo I le fale ae out e musu ona ou te le mana’o e fiaaai nai o’u tei faapea o’u matua o le mea lea e ala ai ona ou sau e tulei a’u oloa.”

O le a se manaoga ia te oe?

“Ou toe fia alu lava I le aoga ina ia I’u lelei ma ou alu ai out e sikolasipi ina ia aua nei toe alu lo’u tama e faigaleuga ae ia ou tausi i o’u matua ma lo’u aiga.

“O le faigata ia o le olaga ae ou te iloa e leai lava se mea e maua ma se filemu.”

© Samoa Observer 2016

Developed by Samoa Observer in Apia