LAUGA - “Ia fai oe ma faataitaiga lelei i tagata uma”

08 February 2016, 12:00AM

(Ioane: 13:4-5)


Tusia - Petaia Setu

“Vaai ma faalogo ia iloa fai” o le upu lava lea a Mose i ona tagata e pei ona maitauina i le tusi o Teuterenome. Ia le na ona faalogo i le upu, a ia fai ma faigaluega o le upu. Na ou lotu i se tasi o falesa i Aukilani ia Mati o le tausaga ua mavae.

Manaia ia o le faasoa mai a le faifeau i le taimi o le lauga. Sa ma sosoo ma se tasi tama matua o le aulotu. E fai mai lava le lauga a le tofi ae pisapisa lava le toeaina e faapea. “E magaia le lauga ae le savali ai” Punou teisi atu i luma i le isi saofaiga o i luma atu o matou, “O le kakou kama alii e poko kele e fai mai ae valea e ola i aga mea la e  fai mai ai” Ae fai mai le mau faapapalagi, “e leotele galuega nai lo upu? O le tala a Ioane, “ona tu lea o Iesu i luga a o fai le talisuaga, ua tu’u ese ona ofu, ua tago foi i le ie sōloi, ua fusi ia te ia. Ona liligi lea e ia o le vai i le ipu e mulumulu ai, ua mulumulu i vae o ona soo, ma soloi ai i le ie sōloi ua ia fusi ai”

O le auaunaga. O le olaga tautua, o le tiute fai o tagata uma. A o sea ituaiga olaga, e faavae mai le alofa E fau i le loto mamā. E tu i le loto maualalo. A misi la vaega ia, ona fematea’i loa lea. Ua faalogologo leo. Ua faatagā faavalevalea. Ua faataliga tuli. E fetautaua’i. Ua faasinosino lima. Ua maitau mea ma feāu lana auaunaga. E āu ina vaili pule ma pa’i taua  ma misa ai.O le mulumuluina o vae, o se feau sili lea ona maualalo i aai o Palesitina.

O se galuega e matuā faatauvaa lava i tagata o Iutaia. O le galuega lea a pologa  i ia ona po i nuu o Europa, o le tootuli i autafa o lona matai e solo ese le pefu o ona seevae ma uu faaiila. E le mafai ona faia e se tagata ua a’oga ma a’oa’oina lelei sea ituaiga galuega auā o le luma. Ae na fai e Iesu. Le Iesu lea tatou te taulagi o le Tupu o le lagi ma le lalolagi. O loo tatou pepese ai o le Alo o le Atua. O le Faaola o tagata uma. Lea foi e faalupe e lana aumaga, o le matai; o le a’oa’o; o le Alii. E sa’o uma lava ia faalagiga. A o le fesili, O se galuega ea lea a Iesu e fai? Tatou te manatu uma lava e le tatau. E le fetaui.

A o le upu moni ana le o oe, po ua le faia e Iesu lea mea. Ana le o a’u, po ua le faaeleelea fua le Tupu o le lagi ma le lalolagi. Samoa, na faia e Iesu lea faataitaiga sili ina ia e maua le loto alofa; ia e ola i le loto maualalo; ma ia amata mai ia te oe ma a’u galuega lelei uma. Sa ou mua’i tā’ua, o le olaga auauna, o le tiute poo le olaga lea o tagata uma. Poo ai lava oe, a o oe  o se tagata ola i le lalolagi nei, o oe o le auauna. O lou tiute fai lea – auauna.O lona uiga, galue, gaoioi, faatino ou faiva ma lau tautua i le Atua e ala i soo se tofi ma soo se siomaga o loo e iai. I totonu o lou aiga, i le nuu, faalapotopotoga ma sosaiete eseese, o a’oga ma galuega, i le malo ma ekalesia.

O faataitaiga lelei, o mea e mamā e afua mai i le loto ua lelei. O galuega lelei e faatupuina ai le fiafia o tagata uma i le saolotoga ma le manuia e maua tonu iai. O le faataitaiga lelei, o le tuuina atu o lou lava ola ma lou malosi, e tali ai le oi ma le galala o nisi tagata o loo mafatia i le olaga nei. E le o se faataitaiga lelei le tautua gutuā ma le faailoga tagata. E le o le ola faafoliga ma galue i luma o mata. E le o le poto e sau oo ae valea e tufa ia soo. E le o le fiafia e siisii i luga le tau o  le soifuaga ae faatitipa i le mana’o o tagata. E le o ā tatou upu ia nanamu, ae ia vaai tagata i le lanu. E le o le leotele i le folafolaina o le faaolataga, ae fiu e su’e i le oi o tagata.

O le tu i luga o Iesu, o le faailoga o le alofa. O le tuueseina o ona ofu, o le ata o le loto mamā; loto ua lelei. O le ie sōloi, o le olaga auauna; o le faiva tautua. O le vai, o le faamamāina. O le mulumuluina o vae, o le faailoga o le loto maualalo. Samoa e, ua faigatā ona laga‘ia ia lagona lelei, auā ua mătau tatou i tulaga faaleaganuu ma tofiga faale malo. Ua mapo lotu ma faamamafi  mamalu o loo taulagi, o mamalu faale tala lelei!

Ona lima taitaiina ai lea o tatou e faasaga ese mai le moni o le mau a le talalelei – o auauna tatou uma. I le ua tatou faavasegaina augā tupulaga ma faatulaga o Pai lea a o Lafai lea. O le au taualoa ‘i, a o le au fai popo ‘i. O le au fai pine lea a o tatou lea. Ua oo lava i le li’o faafaifeau, o ē e tatau ona taulamua i faataitaiga lelei, ua misi atoa! O le faavasega, faatulaga, ma le tautala, e faamasinoina ai oe. A o le auaunaga ma le ie sōloi, e fuamoa. Lea ua tatou vaavaai ma faalogo ua gagana mai tagata. Ua faailoa mai luma loimata o le mafatia o loo oi ai pea ma oono le atunuu ma le ekalesia. O le mapuēa o loo faalogoina pea, “O le mea lava e kasi! E le iloa gi kausaga e sui ai!’

Le au uso e, ua manaomia e Samoa ma le ekalesia lou sau i lalo. Sau i lalo i le apa vai ma le ie sōloi. E amana’ia ai oe. E taualoa ai ma aloa’ia oe e le Atua atoa ma tagata. Tuu ese ofu o le lalolagi o loo taotaomia ma faapulou ai pea oe e le pouliuli. Ne i e manatu e faaolaina oe i ou pa’ia faale atunuu ma ou mamalu faale lotu. Uso, ou te fia faailoa atu ma lou faamaoni, ua leai se  tofiga o i le atunuu i le malo ma le ekalesia o toe saoloto. Ua iai le alii o le lalolagi i tofiga uma.

O ‘e iloa? E te talitonu iai? O le pogai lenā o le tu alofa o Iesu i luga. Ua vaai ane ma le alofa i auupega malolosi a le tiapolo ua taotaomia ai lona au soo. Ua galo ai le agaifanua ma aganuu masani a Iutaia sa feola mai ai. Ua tausili i le ala sesē ua mailei ai e le fili. A o lalo, o ala ia o le Tupu o tupu. O faiga faavae ia a le Matai Sili. E le o le faasino o tagata i lalo ae eva oe i luga. O le tiga e ola ai tagata e tuu foi iai ma le ola o Iesu e talitiga ai. O uiga na o faataitaiga lelei. Na te aumaia le manuia saoloto o aso uma. E le fefe i lu’itau o le olaga. E le palaai e tu mo le ola o tagata. E le faitogafiti leaga ma taulamalama i isi. Na te le faapologa ma faatigaina tagata. Ae milo faatasi ma tagata. Lāina ma sautia faatasi ma le lafu mamoe. E fai ma sulufa’iga o tagata uma. E ola iai tagatānuu ma tagata lotu.

Le au uso e ia Keriso, e le mafai ona e faia se faataitaiga lelei, vaganā ua tuu ese tuinanauga leaga ma pulega sauā o loo e ‘ofu ai pea i aaso uma. E le mafai foi ona lagona e se isi sau lauga pe afai o lo o laulau vivilu le nuu ma le ekalesia i matagā o loo tutupu i a tatou fanau. Ni faataitaiga lelei la ia o le talalelei? Alu i lalo e mulumulu vae o le nuu. Faamaualalo i le ekalesia ma le atunuu. E le na o le gutu, a o le loto, ma le amio. Fai mai Iesu, “Afai ua outou iloa ia mea, amuia outou pe a outou faia.” Mo lo outou faaolaina ma lo tatou tauleleia – Ia fai oe ma faataitaiga lelei i tagata uma.”  Fai nei.

 

Amene

Mobile:     (685)-773-7063

                 (685)-7783782

E-mail: [email protected]

 

08 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>