Manatu o le Fa’atonu - “Valuvalu mai lo’u tua, ona ‘ou tago atu lea valuvalu lou tua.”

171 Hits

Tusia - Savea Sano Malifa

Faaliliu e Seagaitumua Tupuola

 
O taimi amata o lenei vaiaso, na faailoa atu ai le Minisita o loo tausia le Matagaluega o Galuega o Manu’alesagalala Enokati Posala i le Palemene o lona malo e anoano ana miti ua faatulaga ina ia tuliloaina i le isi lima tausaga.  

Fai mai a ia, e pau lava le mea o loo latou faatali i ai, o le toe foi mai lea o lana malo i lona ofisa pe a mae’a le Faiga-Palota Lautele  o loo loma nei, ona latou faasaga loa lea i le faaliliuina o ia faalepo e avea ma mea moni uiga ese. 

O ia faalepo, i se tasi itu, e aofia ai ni uafu se lua faavaomalo, o le tasi o le a fausia i Matautu, ma le isi e fausia i Vaiusu.  

I le taimi nei la-mo i latou e le o iloa pe o fea o i ai Matautu ma Vaiusu-o lea o le a ‘ou ta’u atu. O Matautu e i le totonugalemu o Apia, o iina o loo i ai le uafu autu o le atunuu, ma o Vaiusu e lata i le auala i le isi itu o le taulaga, pe a te’a Mulinuu lea o loo i ai le Palemene. 

Ia, o le a la le miti lea o loo i tua o le fai o ni uafu faava-o-malo se lua ia e toetoe lava a pipi’i faatasi, o le faamatalaga a le Minisita o Manu’alesagalala-o le mea masani lava. “O se tasi lenei o (miti) a le malo ina ia ati a’e le atunu,” o lana faaaliga lea.

O le a maua ai foi ma galuega. “O se tasi lenei o puna autu tau tupe maua mo Singapore. O fela’uaiga i vaa, o le mea lea e tatau ona faata’ita’i i ai.” Manaia. Ia-o a la oloa e ono fela’ua’i e vaa e ala i le Uafu i Vaiusu? Pe ua tilotilo le malo i le pisinisi tau fela’uaiga i vaa talu ai ona ua amata e Rusia ona la’u atu i va’a fana, meatau  ma vaa e tafana ai vaalele helicopter i le malo o Fiti lea e le o mamao ese ma i tatou? O le mea ‘ea-o lea ua tatou tilotilo i le fausia o se uafu ina ia mafai ai ona tatou faaaoga e la’u atu ai e vaa fana solitulafono ma vailaau faasaina? O le mea moni, e le o lava le inosia o le faaaoga o tupe leaga?

E le gata i lea, talu ai ona ua fai e le Pelemia o Tuilaepa Sailelei Malielegaoi e avea ma ana tulafono pa’ia le fesili i le Atua ina ia faailoa atu ia te ia pe o le faaiuga o le a na faia-pe ua uma ona ia faia- e sa’o pe sese-na ia fesili i le Atua pe o le a sona finagalo e uiga i lenei mataupu? Ae poo le a lava, o le taimi nei- o lea tatou te talanoa e uiga i uafu, o le a le miti o le a soso’o ai a le malo e uiga i le Uafu i Satitoa lea o loo i Aleipata?

Ona o se unaiga a se folafolaga o le a maua ai le anoano o mea sa le mautinoa i tupe maua tau turisi mai Amerika Samoa, ae o le mea moni matagata e faapea e leai m se pene ‘apa na maua mai lea uafu talu ona fausia pe ua fa tausaga talu ai. 

Ae peita’i, e $100 million ua goto-uga a ii lea miti ma o loo avea pea ma ata faatiga-mata e le’i uma ona fai o le matua faalumaina o loo fetolofa’i solo i le aloalo o i Aleipata. O lea tulaga, a tuu i lona faaupuga e tatau ai, o se faailoga lea o le faatalale e pei ona tu ai pea i lea nofoaga ma faamaga ma le fiafia i le lagi, ma a’o ona faia lea tulaga- e peiseai o loo tau alaga mai ina ia matua aveese o ia mai foliga o le paneta o le Lalolagi.Ma sa i ai foi se miti e fau se malae vaalele i lea nofoaga. Ia, o le a la le mea ua tupu i lena miti i se tasi itu?  

I lea taimi, e tusa ai ma Manu’alesagalala, o le a faatuina pe tusa ma le 500 mita mai le ala autu o Satitoa, e soso’o ma le uafu i Satitoa. Na ia faamalamalamaina: “O le a pei lava o Asau lea o loo i ai se malae vaalele ma se uafu, ae sili atu ona talafeagai Satitoa talu ai o loo fuafua mo le ala i Pago Pago.”

I le taimi nei la-o le fuafuaga lena. O le miti la e mo le Satitoa Airport ina ia i ai sona uso teine e igoa o Satitoa Wharf, ma o le a matua faafiafiaina i la’ua e talimalo i o la tuagane, tausoga ma o latou aiga mai Amerika Samoa.

Fai mai Manu’alesagalala i lena taimi: “Ua filifilia e le komiti se nofoaga e talafeagai mo le tu-laueleele o vaalelei e itiiti mauga e siomia ai.” Na te lei faaalia pe o le a le tau o le malae vaalele, vagana ai lona faapea mai ua uma ona tofia e le Kapeneta se ‘au-galulue’e faagaoioia le galuega ina ia mafai ona mae’a i totonu o le lima tausaga. 

“I le taimi nei o loo latou feutaga’i ma nisi o aiga e uiga i o latou fanua ma le tele o tupe e totogi atu e tusa ai ma taui.” Na ia faaalia foi: “Ua malilie aiga e lagolago le atiina a’e ma mo le malo ina ia tau ii latou mo le faaaogaina o latou eleele.”  I le taimi nei la, ua manino mai e faapea o se musika manaia lea i taliga! O ai se aiga na te le lagolagoina se fuafuaga e totogi atu ai se tupe o taui ia i latou mo le faaaogaina o latou eleele? Ua iloa lelei e le Minisita lea tulaga. Ma e faapena foi tagata o ia nuu. O le tulaga masani-o le a latou fia vaai i ai, aemaise ai lava, o le uiga moni lea ia i latou o le Vaega Faa-Upufai e Puipuia Aia Tatau a Tagata.

O lona uiga-o le faamaoni, fetalitonua’i, ma o le mea sili o mea uma, o le faamaoni.  O le Malae Vaalele i Satitoa. O se igoa Lelei.  I lenei la aso, ina ua te’a atu i o tatou tua le lima tausaga, o loo tumau pea le Malae Vaalele i Satitoa i le nada, e pei ona fai mai ai tagata Sepania. Ma talu mai lena taimi-e leai se upu e tasi o toe faalogo ai mai le malo e uiga i le Malae Vaalele i Satitoa. Matua leai lava. Ae o le itu e ese ai, i le taimi nei ma o lea ua tatou aulia le tauafiafi o faiga-palota lautele, ua faaalia e le minisita e faapea e ese ai mai uafu e lua o le a fausia i Matautu ma Vaiusu, o le mea moni lava ia e anoano faalepo a le malo ua faataoto. 

O ia faalepa e aofia ai ni galuega tetele tau le suavai mo Magiagi ma Moata’a, eletise mai le La mo Tuana’imato, Faleolo ma Savaii, se fale eletise e fuafua mo le faaaogaina o le malosi mai le La, suavai ma le savili, galuega tau le toe fausia i le Lotosamasoni ma faatanoa i Alaoa ia na faaleagaina e le Afa o Eveni i tausaga ua mavae ma isi lava galuega. 

Ia, pe e te mana’o i ai pe leai, o ni faalepo e uiga ese le manaia? I le taimi nei la-o fesili nei: O le a le mea na taofia ai le minisita mai le liua o ia faalepo ina ia tino mai i le lima tausaga talu ai? O le mea moni- o se mea tatau lona faatali i lea taimi atoa, ina ia mafai ai ona ia faaalia mai ia mea i le taimi nei? 

Ma o le itu mulimuli- sa i ai se faiga i totonu o lea faiga faavalevalea i lena taimi, ma afai sa i ai, o i ai pea e o’o mai i le asō?O le tulaga masani ai, o le Faipule ua maliu ma o se loia, o Dr. Asiata A.V. Sale’imoa Vaai ma lana tusitusiga e uiga i le malo, ua o’o mai i le mafaufau.

O le mea na ia faailoa mai i lena taimi sa matua fulitua lava i ai, ma i lenei la aso, ua avea lea ma mea moni tau faamata’u. I lona ta’ua o tulafono e lua ia na faato’a pasia, O le Tulafono o Failautusi Faa-Palemene 1988, ma le Tulafono o Galuega a le Malo (Tulaga Faapitoa) 1989, fai mai le tusitusiga a Dr. Vaai: O ia tulafono e lua o le a noatia mo le faavaeina o le pule fai-to’atasi a le HRPP ia Samoa.  “Mulimuli ane, o lenei tulaga o le le mafai ona tali atu o le Kapeneta ma Tagata Faigaluega o le Malo- e le gata ina afaina ai le tulaga lelei o le auaunaga e tuuina atu-ae o le a faavaeina ai se faiga o taupulepulega leaga ma faiga pi’opi’o i totonu o le malo e aofia ai le tagata e faafaigaluegaina tagata (Kapeneta) ma tagata faigaluega (tagata faigaluega o le malo) ae fetausia’i ai tagata polokiki ma tagata faigaluega i totonu o le malo- e te valuvalu ai lo’u tua ona ‘ou valuvalu foi lea o lou tua. 

“Ona ua matua loka mau tagata faigaluega o le malo e le faiga-malo a le HRPP, o le faaopoopoga maoa’e talu ai nei o totogi o tagata faigaluega o le malo ma le pulea e le pati o isi faalapotopotoga a lima o le malo, e ono tumau la le HRPP i le paoa mo le tele o nisi tausaga-se’ia vagana ai ua matua faalauiloa ma fo’ia faiga pi’opi’o a le malo.   Na faaalia e le Itu Agai i totonu o nusipepa e pei o le Samoa Observer ma faataua ai mataupu lautele tau polokiki, ia ua faamaonia i le tele o tausaga e leai sona aoga tele i tagata o le atunuu lea e mafuli ina palota i se tulaga lautele e tusa ai ma tonu a aiga, aganuu masani, faiga masani , tau faasese ma le faimea pi’opi’o.

“Ae ui o lea, o loo tuua ai le pogai e le o tagofia o le faafitauli lea tau le pule to’atasi ma le taofiofi o le paoa e se vaega faa-upufai e tasi a le malo e ese ai mai Faamsinoga, ma ni tagata palota o le atunuu ua aoaina lelei ma malamalama lelei i faiga e lē temokalasi ma se tulaga faigata tau polokiki ua i ai nei Samoa.” Faailoa mai ia i matou outou finagalo. Ia outou maua Samoa se Aso Sa to’afilemu-ma ia faamanuia atu le Atua! 

* Polonius: “E ui ina ono faavalevalea, ae o loo i ai lava se ala i totonu.”

 

   Hamlet Act 2, scene 2, 193–206.

   Shakespeare

© Samoa Observer 2016

Developed by Samoa Observer in Apia