Lauga - “Ia i le Atua le viiga….”

Tusia Rev. Petaia Setu ,

1318 Hits

Rev. Petaia Setu

Rev. Petaia Setu

O lea lava; Amene. A o ai se isi? Poo ai o i silī? Ae aumā ni mea a le lalolagi? O lea ua asia le lagi (f2,3). Ua faailoa i le soo le mamalu silisili ese o Lē soifua pea e faavavau. Ua ifo ma auauna atu ia te ia mea uma i le lagi ma le lalolagi. O le pese, E paia, e paia, e paia le Alii le Atua e ona le malosi uma lava; o lē na soifua foi, o le a afio mai. O le faaeaea, Le Alii e, e tatau lava oe ina ia tuu atu ia te oe le viiga, ma le faaneeneega, ma le mana….

Ua tālā puipui o le lagi! Faauta, ua avanoa faitotoa i le lagi! Se’i silamaimoa le tagata i le faaalia o mamalu ma paia o le lagi ma le lalolagi ua lolo uma i le Alii le Atua e toatasi. O pesega ma viiga. O faaneeneega ma saafiafiga. Sisiva ma Aleluia. O le taulaga i lē o tietie i le nofoalii silisili. O tumutumu ia o le faatuatua galue. O le aotelega lea ole soifua tapuai. Ave mea a le Atua i le Atua.

O upu a toeaina, e tatau ia te oe le viiga, ma le faaneeneega, ma le mana.  A o la Tavita, E tusa ona matuā viia o ia….

O lelei uma lava ma mamalu na faaeaina ai oe e le Atua i le lalolagi, tatou te faafoi i le Atua o se tali faaaloalo a o se taulaga faafetai. Fai mai le Faaaliga, o toeaiina e to’alusefulu ma le fa, ua tofu ma le pale auro i o latou ulu, ua latou vaaia le silisili ese o le Alii le Atua i lona mamalu. Ua latou faapa’u’ū faō ma ifo atu i lē o tietie i le nofoalii, ma lafo o latou pale i luma o le nofoalii.

O le faailoga o mamalu ma paia, o le faaeaea ma le faaneeneega, ua le o le tagata, a o le Atua lava. E leai, leai lava le mea na faia, a o lē na faia. E tatau i lē na faia mea uma, le viiga, le faaneeneega, ma le mana e faavavau lava.

O le pese foi lea na fai taulaga ai Isaraelu ina ua faaolatia i le isi itū o le sami ’ula’ula. E le o se viiga o Mose; poo se tala ave o le tootoo, a o le Atua ma lana tōfa poto. O lana pule, ma lana ata faata’oto o le faaolataga, ua loa ona tāpena faafafine tō’aga.

Samoa e, o le viiga, e ā le Atua ia. O lau pese lena o lenei tausaga. Ia sii a’e lou loto i le Atua; Tautala i lona lelei ma lona faamaoni. Molimau i lana amiotonu ma lona alofa. Ia e fai se viiga o Ieova mai lou loto faafetai, ua e ola i lona alofa (Sala.124.1-8). Ia faaneeneeina le suafa mamalu o Ieova. O le Tupu lava ia o tupu; o le Alii o alii. E tatau ia te ia ona faaneeneeina. O le faaneetaga, e patino lava ia i le Atua. 

Samoa e, tepa i tua ma le loto faafetai. Vaai i luma ma le loto faatuatua. O lo tatou Atua e telē. E silisili ese;  e mata’utia lava Ieova o ’au. O lona mana, e mai le amataga e oo i le gataaga . E tulaga ese lava. O le mana sa tino mai ai lana Tofa pule i galuega uma o le foafoaga. Na te silafia lelei ai manatunatuga ma loto o tagata.

O le mana na ia toe faatūina ai i tatou nai le agasala. O loo galue faaola e ala i le Agaga i aso nei uma o lo tatou ola. Ua sao ma uli, ua uli ma sao ai lau folauga Samoa mai lena tausaga ua tuanai atu. Ia viia lava le Atua e faavavau.

Lea ua e pale i lenei tausaga fou. Ua e a’e malo i le uluai Aso Sa o le 2018. Sou malosi? Leai. sou poto? Leai. Se lelei o sou toalua? Leai. Ni faamanuiaga mai ou matua? Leai. Uso e, e le o le palemia; e le o le malo; e le o le faifeau. O le pese a le EFKS, Ne’i mau le mitamita i mea faaleaoga… A o viiviiga a ulu sinasina e luasefulu ma le fa, E tatau i le Alii le Atua le viiga, ma le faaneeneega, ma le mana. Selau pasene le sa’o o le vivii ma le faaeaea i le Alii.

Ioe, o oe ma a’u, o le galuega mamana a le Atua (Efeso.2:10). Fai mai le faaiuga o le fuaiupu nei ua fai ma a tatou matua, “ona o lou finagalo foi e iai i latou ma ua faia.” Ae fai mai Paulo, o le mea lea na faia ai tatou, ina ia tatou faia galuega lelei o le toefuataiina ina ia viia ai lona suafa; o galuega sa tapena e le Atua anamua, ina ia tatou savavali ai i aso uma. Afai la e te  le i iloa, ma e te le i savali ai i lena tausaga ua mavae, oso ai nei loa. Laa nei loa i le faasinomaga mai le Atua.

Faatino lou loto i ala o le Alii. Taitai lau fanau ma lou toalua i mālama o lenei tausaga mai lē ua soifua pea lava. Ave ou matua ma lou aiga i faamanuiaga ua leva ona tapena e le Atua mo lau malaga. O le faamanatu,  e leai sou poto, leai sou malosi, leai sau mea lava e tasi e faafoea lau malaga pe laveaiina oe i le ala. Manatu i le la tausaga ma le loto faafetai.

O le faafetai i le Alii lo tatou Atua. O lē sa tu i Matagi ’olo. Sa le i moe i le ao ma le po (Sala.121.3-4). O loo u’umauina lou ola i ona aao, ina ia fano Satani ma ana ’au, ma faaumatia le lalolagi ma le fili i lana pule ma lona mana.

Samoa e, vivii i le Atua. Ia ave i le Atua le viiga auā o mea ia a le Atua. O le faaneeneega ma le mana, e tasi i le Atua. Fai lena ma au taulaga faafetai i le Atua i le tele o lona alofa; o lona faapalepale ma lona onosai, i au amio ma o tatou olaga faasausili i lena tausaga.

Pese fiafia ma pese mălie i lenei taeao i faamanuiaga mai lo tatou Atua. Fai mai Tavita, ’Aua foi ne’i galo se mea e tasi o ana meaalofa (Sala.103:2). Ae fai mai toeaiina, E tatau, e matuā tatau lava le viiga ma le faaneetaga ma le mana i le Alii lo tatou Atua, o lē na faia oe ma a’u, o lē ua na laveaiina ma faaola oe ma lou aiga, Samoa ma tatou uma.

Ia viia le Atua e faavavau, faavavau lava,

 

Amene

 

 

 

7737063/7783782

© Samoa Observer 2016

Developed by Samoa Observer in Apia