Fa’amuamua aiga
O lea le fa’anaunauta’iga o le tamā i a Uili Letogo, 46 le matua o le soifua o Fasito’o-Uta i le aga atu ai i le amataga o lenei tausaga fou.
“Ia o le taimi lenei ia lea fo’i ua usu mai e faigaluega ma o a’u ou te nofo lava i Fasito’o ma o le masani lava lea o lo’o ua i ai nei.
“O le itu masani lava, ia a leai ni ma’umaga ia o le alu e su’e le galuega , ma o le auga lava o le faigaluega ia o tatou iloa uma lava.
“E mo le tausia lava o aiga ma fanau, o le itu mautinoa lava a le afu le muāulu o lona uiga e fia’a’ai le aiga.
“E le taumate ua le toe faigofie nei aso i le tulaga e pei ona ua i ai, ua amata fo’i ona tele suiga ma ua si’i ai le tele o le tau o oloa i luga.
“Ia ae leai se isi itu tatou te fa’atinoina, o le taumafai lava e atia’e aiga, a ua le fia o fo’i e fai ma’umaga ia o le taumafai lava e su’e galuega.
O lenei tausaga ua amata, na ia fa’ailoa o le itu taua lava o aiga.
“Ia o le olaga lava lena o le Samoa, e faigaluega mo le aiga ma le tele o le mau fa’alavelave ma o le itu lava lea e pito sili ona taua.
“E fiu fo’i lava e taumafai e fai se suiga, ia o le faigata ua leva ona ola ma soifua mai ai nai o tatou tagata i lea tulaga ma e le faigofie.
“O lenei ua tatou i ai i nei aso ia o le agaga lava e tasi, o nai aiga.
“O lea fo’i o le a toe fo’i nai fanau i le aoga, ia e leai lava se isi itu e mafai ona fa’atupeina ai le tele o le mau fa’alavelave ma le mau o le tausaga lenei – e tatou te talanoa lava i tupe.
“Ae o le itu e pito sili ona taua o le fa’alagolago lava lea i Atua e manuia ai taumafaiga uma o lo’o o tatou mafaufau ai.
“O le itu mautinoa o le a so tatou poto ma le atamai, ma le tele o vaega o lo’o taumafai e fa’afefefe mai le savaliga o lenei tausaga.
“A pipi’i a i le Atua , ia e manuia so’o se taumafaiga.