Tatala aloa’ia le tusi, ‘Fefe e Alofa’

399 Hits

Jadyn Ualesi.

Jadyn Ualesi.

Ripotia e Deidre Fanene

Fa’aliliu e Maiava

O le tusi atoa lava, e ‘autu i le alofa, o le fa’aaliga lea a Jadyn Patrilita Petimara Ualesi.

O lo’o talanoa le tama’ita’i lea - 19 tausaga mai Tufuiopa, i lana tusi ua fa’aigoaina o le ‘Fefe e Alofa’, lea na tatala aloa’ia anapo i le Faletalimalo o le Orator Hotel.

Ae o lo’o talanoa fo’i i le soifuaga masani o le ola nei.

Na ta’ua e Jadyn, o lana tusi lea – e aualofa ai mo ona tua’a ua tofafa i tu’ugamau, o Lauano La’ulusa Kilepoa ma Tima Naea, fa’apea Tusigatupe ma Petimara Ualesi Tulafono – ma sa mafua ona tusia, talu ai “ona pau lea o le ‘auala e mafai ai ona sasa’a atu ai ma fa’ailoa o’u lagona moni ma o se tulaga ou te fa’ailoa ai i lo’u agaga fa’amaoni lo’u nei tagata.”

O lona fa’amaoni na totogo malosi i ana tusitusiga sa fa’asoa mai i vaiaso ta’itasi uma mo le Samoa Observer i tausaga ua mavae. 

Ae o lona fiafia e tusitusi na amata lava a’o a’oga tulagalua i le A’oga a le Peace Chapel Christian School, i le taimi e mo’omia ai i tusiga-tala.

“’Ou te lagona o le taimi lava lena na iloa ai lo’u mana’o ma le ituaiga tagata e mana’o ai.” 

E fa’apea fo’i i le faitau-tusi, na fa’aosofia ai lava ona lagona ona o tusitusiga a nisi lauiloa sa fiafia iai, e aofia ai Sylvia Day, Cassandra Clare ma Lani Wendt-Young.

Na fa’aauau ana a’oa’oga i le Kolisi o Fa’atuatua i le taimi lea ua māua ai fo’i, lona a’afia i le five-rumatika ma fa’amuta ai loa lona fa’ananau i ta’aloga o le volipolo ma le netipolo.

Ae le se tulaga e fa’ate’ia ai, ona ua atili ai lona naunau e fa’aalu ona taimi e faitau ai tusi ma tusitusi ana tala, sa matua fiafia iai.

Ina ua mae’a lona tausaga e tasi i le Iunivesete Aoao o Samoa i le 2014, na malaga ai loa i Niu Sila ma a’oga ai i le A’oga a WelTec mo se Tusipasi i Mata’upu Tau Pisinisi ma Komepiuta Vaega 3. 

Na tumau pea lona fiafia i tusiga-tala ma sa fa’amalosia atili lona naunau e fa’ataunu’u ona mo’omo’oga fa’aTusitala ma e le’i mate lona fa’amoemoe mo le fa’alauiloaina o ana galuega.

“E le mafai ona motusia pe fa’agaloina ‘ou mo’omo’oga tusa po’o a fita e o’o mai. O a’u fuafua mo le lumana’i, ia fa’aauau pea ona tusia ni tusi se tele ma solo, i taimi paganoa ma ‘ou te fa’amalosi’au atu ai i tupulaga talavou, e ‘aua le fiu-gofie ma fa’atuatua-ititi i o latou tagata.”

E mafai ona fa’aigoaina lana tusi “o se galuega o le alofa” o lo’o ta’ua ai fesuia’iga o mafutaga ma so’otaga ma fa’ailoa ai fo’i lagona masani ia latou ua ulufia i le alofa.

“Atonu e talafeagai lelei mo tupulaga talavou ma tupulaga ua matutua,” o lana fa’aaliga lea.

E mafai ona fa’atauina i luga o upega-tafa’iLagi le tusi lea, “Fefe e Alofa”, pe mai ia Jaden fo’i pe fa’afeso’ota’i le faletusi, le SSAB pe a mae’a ona sainia aloa’ia.   

© Samoa Observer 2016

Developed by Samoa Observer in Apia