O la’u tala fo’i

07 January 2016, 12:00AM

1. Matauina i Tala Fou ananafi se ulutala i le itulau i luma fai mai-“O se mea faavalevalea ma le faatiga..”O lea la ulutala o loo i ai ni ata o se Alii Poto Faapitoa Faale-aganuu-fai mai o le Tuua o le afioaga o Vailoa Papauli-Komesina o Leoleo ma se tama’itai Ofisa Sili Lagolago o Pulega o le Matagaluega o A’oga, Taaloga ma Aganuu! O lea la faaupuga e peiseai e faasaga i se faaupuga a le Komesina o Leoleo e faapea e leai lava se eseesega o le faa-Militeli poo le faa-Fitafita ma le faatinoga o le aganuu a Samoa! 

O le fesili la-aisea ua faamamafa ai lava lenei mataupu pe afai o se sasi o le Komesina o Leoleo? O le manatu la e faapea-afai e moni ma faamaoni o le Tuua lea o Vailoa Palauli-sa tatau ona ia silafia- (1) E le’i leva ona suafa matai le Komesina o Leoleo-ma ua silafia uma lava e Samoa-e le’i soifua le Komesina o Leoleo i le olaga faa-Samoa-o lona uiiga-e tatau ona taulamua o ia ona tu’u-a-lalo i le Komesina, ae le o le fetu’u! Afai la o le Komesina o Leoleo ua mafua ai ona faifai umi lenei mataupu-o le fesili la-‘na faapefea ona o’o atu le suafa Fuiavailili i Palauli? Na alu atu i sona loto pe ona o le mana’o o Palauli? E faapefea la ona faatino le aganuu pe afai o le fiailoa o le isi -ae afaina ai le isi? O le a le sala uluā ua tulituli-a-pu ai lava lenei mataupu? O le fia faalialia ‘ea o le tagata lava ia? 

O le aganuu ma le faa-Samoa o le talanoa i fanua ma le nu’u moni ae le o faata’asina o faavae papa o afioaga ma alalafaga! Afai o ni mea faa-polokiki-ua tatou iloa uma lava le i’uvale o polokiki leaga! O le tulaga matuiā la o lenei mataupu-o le taiulu ai o le Tuua o Palauli ma se tama’itai e faai’u i le tagata e ou le atalii o Fuiavailili! O le a sou taofi? 

2. Matauina foi i Tala Fou le finagalo faanoanoa o le Peresetene o le Toomaga mo e Puapuagatia-ona o faiga faatautala a tagata gaoi i le Ofisa o lea Faalapotopotoga i Apia ina ua mavae le Kirisimasi. O le tulaga mata’utia la o lea gaoiga-o lea Ofisa –o loo faatino lea i se fale e latalata i le Ofisa o Leoleo. Fai mai na tata’e e le ‘au-gaoi le faamalama i luma o le faitoto’a tele ma alu atu ai i totonu. Na ave e le ‘au-gaoi le TV tele-ma se masini komepiuta sa faaaoga mo a latou galuega-ma le latou Leitio tele na avatu e nisi o Samaria agalelei e faaaoga i totonu o le latou Ofisa. 

O lea la gaoiga na faatoa iloa i le taeao o le Aso Lua ina ua vaaia le ta’ei o faamalama i luma. Ia o se tala fou umi lea tala-ae afai o lea nofoaga na faatu ma faatupe e tagata alolofa mai mo le manuia o fanau ua sauaina-ae o lenei lava e faaleaga ma gaoi-o le a la le pogai o ia faiga? O ni foliga ia o se atunuu ma ni tagata e talitonu i le Atua? Afai la ua faateteleina le gaoi ma le faomea i totonu o le atunuu-o ai ua pogai ai? O le tali-o ta’ita’i o le atunuu-ta’ita’i faale-malo; ta’ita’i o ekalesia, ta’ita’i o nuu ma aiga? Afai la ua tatala le Tausaga Fou a le Toomaga mo e Puapuagatia i nei faiga faatautala ma le le alofa-o ai e mafua ai? Aisea ua gaoi ai faapenei tagata o le atunuu! O le a se vaifofo e tatau ona fai? 

3. Matauina foi le anoano o faaipoipoga i le amataga o lenei tausaga-ma o se amataga lelei lea! O ai a le fiafia pe a vaai atu i fanau ua faaipoipo lelei ma faapa’iaina e avea ma matua o ni fanau e manuia ai aiga i le lumana’i? Ia- e leai se mea e tasi e leaga ai lea mea o le faaipoipo-vagana ai le le malamalama lelei i le uiga moni o le faaipoipoga! E le o se mea mo sina taimi ona toe tilotilo foi lea i se isi tamaitai poo le isi alii! O le faaipoipoga o le mea e faavavau se’ia vagana ai ua motusia e le oti. O lona uiga la-o le olaga e ola faatasi-galulue faatasi-tiga faatasi-tauivi faatasi-finau faatasi mo le lua tofi mai le Atua-o le lua fanau lea! Ae ia ‘aua nei galo ona a’oa’o le fanau e tusa ai ma ala o le Atua! O le a sou taofi? 

4. Matauina se tulaga mata’utia o le faaaogaina o le aganuu a Samoa e faasino i le taina o Tatau-i atunuu mamao! O le matau i ai e peiseai ua fai ma pisinisi! O le lagona la-afai ua fai ma pisinisi lea aganuu a Samoa-faamata o se mea tatau lea pe afai o se aganuu lea a Samoa e i ai ona tapu? 

O le uiga o se faamatalaga-e aliali mai e peiseai ua avea ma teuga ae le o se aganuu mamalu! Ua le mautinoa foi la se finagalo mautu o Aiga Ta Tatau a Samoa I lea tulaga-pe afai ua mafai lava e soo se tasi ona fai e avea ma pisinisi! A faapefea la tapu masani o lea aganuu! O se aganuu ‘ea e faataga ai ona ta tatau a tagata uma pe na o alo o tamalii-ae talipisi ai alo o tulafale? 

Faapefea le Lama-avea pe afai o susunu se Lama e pei ona masani ai? Afai la e na o Taupou ma Aloalii sa fai Malu ma Tatau-aisea ua faatau ai i tupe le aganuu a Samoa? O se mea manaia le sau o se tagata ese e le o se tagata Samoa ma sana pe’a –ae na te le iloa le uiga ma lona taua i le aganuu a Samoa? O le a sou taofi?

07 January 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>