O le maua ai o le fa’atalatalanoaga ma Solo Sauimalae o Satuimalufilufi i le aso ananafi na ia fa’ailoa ai e le’o toe faigofie nei aso.

“Ia e pei o lea lava le tulaga o lo’o ua i ai le taimi lenei, e masalo o lo’o ua tatou i ai lava le va’a e tasi.

O le taimi lenei o lo’o faigaluega i se tasi kamupani.

“Ia e tusa e $125 la’u totogi e maua le vaiaso, ia e moni lava ae le taitai ona lava le fa’asoa aua e pei o lo’u ia iloa i ai ua taugata lava le soifuaga.

“E mo le silafia ai e to’atolu si a’u fanau ma o se itu faigata tele lea i a te a’u lava ia i le taimi lenei.

“Ua o tatou iloa uma lava e tasi lava le aso e maua ai le tupe i le lima ae ona o le taugata o le soifuaga e ala ai ona alu pei o le vai le alu o tupe.

“Ia ae le mafai ona fai i ai se fuafuaga i le taimi lenei e pau lava le mea e mafai ona o tatou fa’atinoina o le ave lea o le faamuamua i nai o tatou aiga.

‘E pei ona fa’ailoa atu ua faigata lava nei aso i lou iloa i ai.

Na ia ta’ua o fa’aiuga o vaiaso e fa’atoa alu ai le aiga.

‘Ia ana fa’apea nei ou te usu mai tua i taeao uma, o lona uiga o se itu faigata tele lea i a te a’u lava ia, e uma ane le vaiaso e toeitiiti uma le tupe mo le pasese ae leai se mea aoga a le aiga e maua ai.

‘Ia o o le mea o lo’o ua fai nei o le fa’aaoga tatau lava o le malosi aua le aga’i atu ai le lumana’i ma le tausia tatau o aiga.