E fiafia matua pe a faaeaina fanau

Tusia Vatapuia Maiava ma Sarafina Sanerivi ,

189 Hits

Le tama ia Tai Fone ma lona alo ia Aiga Tai na tulaga muamua i le vasega 11 a le Kolisi o Leulumoega-Fou.

Le tama ia Tai Fone ma lona alo ia Aiga Tai na tulaga muamua i le vasega 11 a le Kolisi o Leulumoega-Fou.

O le upu a le Tusi, O le tama poto e fiafia ai le tama, ae o le tama valea e fa’anoanoa ai le tina. 

Ua tatou iai foi nei i le vaitau o laugatogi ma seleselega o galuega ma taua fa’a-le-mafaufau a le fanau o lenei tausaga. 

O le vaitau foi e va’aia ai laufofoga fiafia o matua pe a fa’amanuiaina le taumafai o fanau. 

E fa’apena lagona o le tama ia Tai Fone mai le afioaga o Saleimoa ina ua fa’amanuina le taumafai o se tasi o ona alo i le laugatogi a le Kolisi o Leulumoega-Fou i le aso ananafi. 

“Ua lagona lava le fiafia ma le fa’agae’etia i lenei aso ona o le taumafaiga a le fanau. 

“E fa’afoi lava le viiga i le Atua ona o lona alofa ma lona agalelei.

“O le tala lava lea e fai i la’u fanau, ina ia fa’amuamua lava le aoga, aua o le taimi lenei, a le lelei ona faufau lelei mafaufau o fanau, e le maua foi ni galuega lelei mo i latou i le lumana’i.

“O le ala lea ua fa’afiafiaina ai a’u ona ua i’u ma le manuia le taumafai o se tasi o le fanau.”

O se tasi o alo o le tama ia Tai, le tama’ita’i ia Aiga o ia sa tulaga muamua i le vasega 11 a le Kolisi o Leulumoega-Fou, ma o le ala lea o le fiafia ma le loto fa’afetai o le tama. 

“O a’u lava e fa’amoemoe iai si o matou aiga. 

“E le gata o a’u o le ulu o le aiga, ae o a’u foi e fa’alagolago iai si o matou aiga aua le tausiga o la’u fanau. 

“E fai lava la mea uma i le mea e gata iai le malosi. Tusa lava pe timu pe mugala, pe ma’i foi, e faia lava le tiute lea auā e fa’aletonu loa, ola falolo loa ma le fanau.

“Ae ua fiafia lava i lenei aso ma fa’afetai i le Atua, ona ua fa’aiu ma le manuia le taumafai o le ulumatua o le ma fanau i lenei tausaga. 

“Ua le toe faigofie nei aso i totonu o Samoa. A le galue malosi le matua e fa’atupe ma una’i aoga a fanau, ia na’o le mativa lava le mea e maua.

“E tusa lava pe fa’alogo atu ua ma’i, ae alu lava e galue aua se meaai ia po’o se seleni a le fanau. 

“A lelei lava na fai a tatou fanau, e fa’apena foi ona ola manuia.”

Na ia ta’ua, o lona fa’anaunautaiga lava lea, ia iu manuia ma atamamai lana fanau.

“O le tu’ualalo lava lea isi a’u fanau. A iai lava le tagata e fia ola manuia ma ola fiafia, ia to’aga i le aoga. 

“A lelei le aoga, e maua foi le galuega e lelei e tausi ai ia ma lona lumana’i pe a oo ina matua. 

“Auā o matou e faifai mavae atu matou ae tula’i mai i latou. 

“O le ala foi lea e le mapu ai lava le una’i o le fanau ina ia tinou ia latou meaaoga.

“E pei o le tulaga la na i lenei aso, ua lagona lava le fiafia ona o le taumafaiga a fanau.”

© Samoa Observer 2016

Developed by Samoa Observer in Apia