Aua le nofoa’i ua faigatā nei aso

Tusia Vatapuia Maiava ma Ilia L Likou ,

122 Hits

Alataua Talalelei mai le afioaga o Lotopa.

Alataua Talalelei mai le afioaga o Lotopa.

O le tele o fale’aiga o lo’o lumāfale o le tele o aiga o  lo’o ua i ai nei, e le taumate le fa’amoemoega tele lava o le fesoasoani lea i le tausiga o aiga aemaise lava o fanau i aso uma.

O le aso ananafi na afea ai e le Fofoga o Samoa le tinā i a Alataua Talalelei a’o ia fa’atauina atu ai i le atunu’u salati ma niu malūlū i Lotopa.

“Ia o lenei taumafaiga ia e fesoasoani tele ai i lo’u aiga aua ua loa ona silafia ua leaga lava nei aso ona o le taugata le tau o le soifuaga.

 “Ia o le tupe atoa lava e maua e avatu lea aua le tausiga o le aiga ma le tele o nisi o vaega e mana’omia ai  i aso uma.

 “Ia o lo’o sologa lelei lava si o matou aiga i le taimi lenei e leai se mea o fa’aletonu ma o lo’u iloa i ai e ala ona matitiva nai o tatou tagata ina ua le galulue.

 “O le vaega e ao ona fa’atinoina e nai o tatou e ao lava ona silasila i so’o se vaega e mafai ai ona fesoasoani mo aiga, aua o lona uiga a leai, ia o le a se isi vaega e ao ona e fesoasoani ai i lou aiga.

Na ia fa’ailoa o le fale’aiga ua silia ma le fa tausaga o ia fa’atinoina le fa’atauina atu o le salati ma niu ma o se fesoasoani tele lea ua i ai le taimi lenei.

 “O le tausaga e 2012 ia na mafaufau ai lava mo le fa’atinoina o vaega nei mo le aiga.

 “Ia o le agaga fa’afetai i le Atua ona o lea agava’a ua aumaia ma mafaufauga lelei ua mafai ai ona fa’atinoina lenei faleaiga, o le tele lava o aso ia e $500 pe a fa’atau atu uma vaega nei.

 “Ia e fa’alagolago lava la i le lelei o aso ma tagata fa’atau aua a le tele fo’i ni niu ia ua tau telegese fo’i le tala i le seleni.

 “Ae a o fa’atasi lava la vaega ia , ona mautinoa loa lea o le lelei o se tupe e mafai ona ou u’uina i se aso.

Na ia fa’ailoa e pei o le taugata ai o le tau o le soifuaga ua i ai le taimi lenei na una’ia ai lava o ia ina ia fa’atinoina le faleaiga mo le aiga.

 “Ia o lea ua tatou iloa uma lava le tulaga ua i ai le tau o le soifuaga ae le’o se itu fo’i o le a tatou nofonofo ai ma fa’apaie atu ai lava.

 “E le mafai ona maua se tali i fa’afitauli pe afai e le mafai ona e tu i luga ma fesoasoani i lou fa’afitauli. Aua o le itu sa’o lava a le faia se galuega e fa’apefea ona ‘a’ai lou aiga.

 “O le tali o le fa’afitauli o se itu e ao ona silasila toto’a i ai i aso uma.

Na ia fa’ailoa e leai se mea e maua ma le filemu pe afai na’o le nofonofo le galuega o lo’o fai.

© Samoa Observer 2016

Developed by Samoa Observer in Apia