“Ia maua Iesu Keriso”

06 November 2016, 12:00AM

O Samoa o le atunuu lotu. Ioe, ua leva tele ona taulagi. Fai mai o le atunuu Kerisiano. Tasi lona, o le ituaiga mafaufau lea e iai Mareta! E lotu teuga, ae le lotu le amio! E kerisiano le gutu, ae le o le loto! Ua vevesi lava i lona tulaga faatinā, auā o le amio e faaletagaata; a o le loto e fatuaiga. Ua faatonu atu e Iesu, …ua pupū lou loto i mea e tele; a o le mea lava e tasi e ao ina ia maua; e le o mafai lava ona maua.

O teine ia na fai ai e Iesu le vavega i lo la tuagane o Lasalo (Ioane.11). E nonofo i le aai o Petania, e latalata i Ierusalema i le itu i Saute. O se aiga e masani ona mapu ma api ai Iesu i taimi o lana galuega. O lona uiga, e foliga mai o loo maua pea ni avanoa o le aiga nei e fesilafa’i ai ma Iesu, ae le o maua e le aiga nei le faamoemoe ma le tāua o loo finagalo ai Iesu. O le fatuaiga, e le o se galuega māmā. O le mafaufau, o le loto, o le malosi atoa, i le ma le ola e faataoto e fafau ai se aiga mautu, aiga malosi, aiga manuia ma le tauleleia. E taua tele le fatuaiga; auā e molimau le ola ma le maopoopo o aiga, i ona faiva alofilima. Ioe, e tua le osi aiga i le fatuaiga. O ai la e tio i le sa’i a Mareta? Fai mai Luka, ua tiga Mareta i le fatuaiga! Talofa e, ua manatu le fafine a tauleleia le aiaiuli i lana fatuaiga -  ua seki mea uma! Peitai, o le finagalo o le malo faaaloalogia, a maua Iesu Keriso, ua uma mea uma! 

E le o taufaaleaogaina e Iesu le galuega lelei. Peitai, e le o manaomia! Samoa, se i silasila lelei i le Tusi Paia, ma ta femalamalamaa’i i le mea nei. Atonu e manogi lau faaaloalo ma lau talimalo mulimuli ane, pe a maua le faaolaina ia Iesu Keriso. O le upu moni, se e le o manao Iesu i sau teu faaaloalo! E le o fia maua e le Alii o le talalelei ni a tatou palapala malo, ma isi mea uma o loo tatou faapologaina ai o tatou uso a tagata! A o oe! O loo manao Iesu ia te oe, ina ia e maua lona tamaliiaga; ina ia e iloa lona alofa faamaoni; ina ia e molimauina lana amiotonu; ina ia e olaina lona finagalo. Faafofoga ia Iesu, ua e popole, ma ua pupū lou loto i mea e tele; a o le mea lava e tasi o loo misi, e ao ina maua, o Iesu Keriso lea. 

E tiga Mareta; auā foi na te maua le fatuaiga, ae na te le o maua Iesu Keriso. O fili ia o le atunuu lotu. E maua lotu, ae le maua Iesu Keriso. E taulagi le Kerisiano, ae le faaolaina le anoano! O le sasi o Mareta, o le ata lea o le olaga sesē, o loo tatou soona asosi iai i aso uma. A fonoa le malae, na o se tatalo lava e faamata’osi ai le iloa o le Atua, ona loto fatu lava lea o le aso atoa. A potopoto foi Ekalesia, na o ni nai minute lava e talatala ai le faale-agaga, ona aso atoa lava lea i ta’igasua ma faiga pisinisi o lenei olaga. O lē fea mea e tasi e tatau ona e maua? O lou fiafia pea i ou vaivaiga, poo lou saili nei loa i lou faaolaina? Manaia le fatuaiga Mareta! Malo le fai o le faiva! Ae maumau e, maumau pe ana se i e nofo tasi ane i tafatafa o vae o Iesu! Maumau pe ana se i e faalogo tasi i lana fetalaiga!  

Samoa, o le pogai lea o lo tatou fefinaua’i ma fevesia’i soo, ona tatou te le fia o ifo i lalo. Ae e te iloa, o lalo e maua ai le tofa paia ma le utaga poto. E maua i lalo malo; auā foi o le malo o Iesu Keriso, o lalo (Mata.5:3).

Sa ta’uta’ua lava se tasi faifeau fai faailoga i lana lauga. Ua oo ina loto fefete ma mimita ai. i se tasi Aso Sa ua matua faatumulia le Gym sa fai ai le sauniga. Sa vaaia foi le fiafia ma le patipati o tagata uma ina ua faalauiloa atu le failauga o le aso. Ua savali faafetefete le faifeau i luga i le stage. Na meia tagata uma i le lauga, ona o se lauga sa le tapenaina faatasi ma le Agaga o le Atua; ua faamaualuga i lona poto. Na iloa e le faifeau le le fiafia o tagata i lona le sauni faale-agaga. Ua savali faano’uno’u i lalo, ua uma le fefete; ae ua tumu i le mā ma le faanoanoa. Sa faafeiloa’i e lona tamā, o se faifeau iloga foi o le pulelaa ae ua malolo(retired). Na faapea le upu a le toeaina penisiona, “Atalii, ana e alu a’e i luga faapei ona e alu ifo i lalo, semanū e te alu ifo i lalo faapei ona e alu a’e i luga.” Samoa, o la Iesu, o lē faamaulalo ia te ia, e faamaualugaina lea (Luka.18:14)

Nofo i lalo ma faalogo ia Iesu. E le mafai ona sa’o ma tonu ni faaiuga tatou te fai, auā ua tatou faataligatuli pea i fetalaiga alofa a lo tatou Alii Faaola. A o aso uma lava, o loo tu ai pea o ia i ou luma, ina ia oulua fesufia’i mo sou saolotoga i le aso o le Fuataiga (Faaaliga.3:20).

A maua Iesu, se a se isi manao i tala atu? O le manao mulimuli lava lea o le tasi pagota ina ua ia maua Keriso i Kolokota, ma tali mălie ai e Iesu lana augani (Luka.23:40-42). Na utu foi le galala o le fafine Samaria ina ua ia lagona, o le Keriso lava lea ua ia maua (Ioane.4:29).

A o oe le atunuu lotu, e te maua afea Iesu? A o oe le kerisiano taulagi, poo ua e maua ea Keriso? Fai mai Iesu, ua filifilia foi e Maria lea mea lelei, e le aveeseina ia te ia. 

O le tina saili ola; su’e malo! Ua tiu ma afīfī. Ua faapolopolo lea mea lelei mo le aiga, mo le nuu, mo le malo, mo le ekalesia. 

A maua Iesu – ua seki foi mea uma!

 

 Amene

7737063/7783782

06 November 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>