Mana’omia e Elepa le Fesoasoani

By Ulimasao Fata 06 October 2017, 12:00AM

E fai lava si faigata o le tulaga o lo’o iai le olaga I le Tina ia Elepa Aleki ma le aiga I Sale’imoa.

O Elepa o se Tina ua 40 tausaga o lona soifua, ma sa maua le avanoa a le Fofoga o Samoa e talatalanoa atu ai I lea tina I le mae’a ai o ana feau masani I le taeao ananafi.

E to’a 16 le fanau a le tina ia Elepa ae toe lima lava o lo’o latou nonofo fa’atasi seia o’o mai I le aso.

Na ia fa’aalia foi o le to’atele o lana fanau ua fai aiga uma ma ua faapena on nonofo lava I aiga o lo’o maupaolo ai ma atina’e o latou aiga.

Na fa’aalia e Elepa e matua leai lava se Suavai maua ma se eletise I lona fale.

“Mai lava le taimi fa’atoa matou taunu’u mai I lenei nofoaga, e matou te ki vai mai lava I isi nofoaga ma aiga o lo’o iai vai ona o le leai o se suavai e o’o mai I le mea ua matou nonofo ai nei, toe leai se eletise”.

“Matua lagona lava le faigata o le olaga iinei ona o le toatele o le fanau ae ua leai se suavai ma se eletise iinei, ae o lo’o matou faaogaina moli e faaoga ai le karasini ma le moli fa’ala”.

E le gata ai I iina.

I le leaga ai o foliga vaaia ma le le saogalemu o le fale o lo’o nonofo ai nei ma le fanau, ua ia talosaga ai foi mo se fesoasoani aua le toe fia fa’aleleia o le latou fale ona o le le saogalemu mo le ola maloloina o lana fanau.

Na fa’aalia e le tina ia Elepa o lo’o ia taumafaia malosi e saili se fesoasoani e mafia ai ona maua mai se tupe aua le toe fia fa’aleleia o latou fale ma lana fanau.

“Ou te talitonu ua matua toatele le fanau ma ua matua le talafeagai foi le matou fale mo le latou soifua maloloina ma le latou ola tuputupu a’e talu ai le le saogalemu o le matou fale”.

Na ia saunoa foi o le koko Samoa lava o lo’o fai lea ma auala e maua ai latou tupe.

“E tutuli lava le fanau I le farmer Joe e kulei ai matou koko Samoa aua se seleni o lea aso ma lea aso, aemaise ai le meaai aua le tausia ina lea o le fanau nei”.

Na ia toe fa’aalia foi o le leai ai o se suavai I le latou fale o se auala faigata lea mo ia ma le fanau talu ai le ki ina mai lea o vai ma isi aiga .

O lo’o mana’omia vave lava e Elepa se fesoasoani mo ia ma lona aiga.

O le numera lenei e maua ai le tina ia Elepa pe a fia fesoota’i I se fesoasoani tusa poo le a se auala e fesoasoani iai, fa’afeso’ota’i le +685 7234807

By Ulimasao Fata 06 October 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>