O Samoa o lo’o sa’oloto mai le mativa

Tusia Pai Mulitalo Ale ,

151 Hits

Le tamā i a Ioane Sui Faatau o Siumu

Le tamā i a Ioane Sui Faatau o Siumu

O le talitonuga o le tama i a Ioane Sui Faatau, o le tagata lava ia e ala ai ona mativa. 

Ae o Samoa o lo’o sa’oloto mai le mativa.  

Na ta’ua foi e le tamā i a Ioane, o Samoa o se atunu’u e mauoa i lona lau’ele’ele. 

O le tamā i a Ioane o lo’o nonofo ma lona to’alua i a Losi ma lo la alo e to’atasi ua tolu tausaga le matua i Siumu. 

“E ala ona mativa le tagata o le lē galuega, o lo matou aiga i le fa’atoaga lea e i tua i ai lo matou aiga, aua o la’u lava lea matafaioi i aso uma o le ma’umaga.

Na saunoa Ioane e le’i leva ona toe foi mai ma lona to’alua ma la la tama mai Niu Sila. 

O le tausaga e 2007 lea na toe malaga mai ai i Samoa nei ma toe amata loa ona faato’a lona fanua i Siumu. 

“O le ma’umaga lava lea matou te ola ai i aso uma, e ala foi ona leai se tupe o le le’i matuā o i le ma’umaga. 

“E ala foi ona tigaina, o le tagata lava ia, ia e fua lava i le malosi le tele o la’u galue i aso taitasi.” 

Na saunoa Ioane e tusa e $100 le tupe maua mai lona ma’umaga i vaiaso ta’itasi ae ese ai le $50 o lo’o maua mai i le aoina o le nonu. 

“O lo’o lava ma totoe lea seleni e fa’asoasoa mo le aiga i le vaiaso atoa.

“E leai  se tupe e fa’aalu sese i sesi mea, e fa’amuamua lava le tausiga o le aiga, mea fai a le nu’u ma mea fai a le Ekalesia aua o le ala lea o fa’amanuiaga.” 

Na fesiligia fo’i  Ioane i le faigata o le olaga o loo i ai i nu’u i tua ma le olaga o i latou o lo’o alala ma papa’a’ao i le taulaga. 

 “Out e talitonu lava au ia, a tatou galulue e faato’a o tatou laueleele ailoga a tatou toe fa’alagolago i oloa auina mai fafo,

“Aua a tatou toe tepa i le olaga o tatou tua’a, sa taugofie mea uma, sa le i ai foi ni fa’ama’i pei o nei ona po. 

O le talitonuga o Ioane, e tatau ona toe tepa Samoa i tua i le olaga sa ola ai tagata i aso anamua. 

 “E ui sa matou feagai ma faigata ae peitai sa mafai lava ona tau atina’e le aiga.”

“Matou te leiloa ua leaga lo ma fale, aua sa ma i Afega i le aiga o lo’u to’alua, ae fa’ateia maua ina ua toe foi mai ua leai se fale.” 

“Ia o nai toega lava sa totoe i le afā lea na toe aoao mai ae fa’atu ai le fale lenei. 

“Sa matou nonofo i le umukuka, ona sa toe taumafai le fale, ae o le alofa o le Ali’i lea na toe mafai ai ona toe fo’i i le tulaga o loo iai nei.

“E ui lava la i fesoasoani a le malo, ae na tele lava fesoasoani e le’i faataunu’uina. 

“Na o’o mai foi le asiasiga a le polokalame o le ADRA aua le fausiaina o fale o aiga sa fa’aleagaina i le afā, aepeita’i e o’o mai ua uma ona toe fau lo ma fale, sa talosaga foi la i ai aepeita’i na fa’apea mai o lo’o ave lava la latou fa’amuamua i nai aiga e le’o i ai ni fale.” 

© Samoa Observer 2016

Developed by Samoa Observer in Apia