O LA’U TALA FO’I

104 Hits

1. Matauina i Tala Fou se ulutala fai mai –“Ua fesiligia e se Sui Minisita le pogai o le faatuai…..! O le la ulutala e faasino i le fesiligia e le Minisita Lagolago o le Ofisa o le Palemia-o Peseta Tevaga Vaifou-le pogai ua tuai ai ona tagofia e le Matagaluega o Leoleo-o lana tagi na tuuina atu i le tausaga talu ai-e faasaga i le Fofoga Fetalai muamua o le Maota-lea ua avea nei ma Minisita o Faatoaga ma Faigafaiva -o Laaulialemalietoa Leuatea Polataivao Fosi.

E tusa ai la ma le faaaliga a Peseta i le Samoa Observer-na ia faamaonia ai ua uma ona tuuina atu faamaumauga uma i Leoleo ma pulega uma e aafia ai-ae pau lava le latou faamatalaga o loo tuuina mai-‘o loo faaauau pea a latou suesuega……! Ia-e tatau ona i ai se mafuaga tatau o loo naunau ai Peseta-e faatino lenei mataupu! Ia manatua foi-poo le a lava lota sa’o ma le naunau e fai le amiotonu-ae o upu ia e fe’avea’i e le matagi-e le masino!

Ae ui o lea-ia manatua foi e leai se mea e tasi o lilo i le Atua-ae pau lava le mea ia manatua-fai mai upu a le atunuu-“Ia ‘aua ne’i avea le Se ma mea mamafa,”-o lona uiga-a o’o lava i le taimi e tulai mai le mea tonu ma le sa’o-e leai se malosi na te mafai ona faafitia! O le a sou taofi?

2. Matauina i Tala Fou se ulutala fai mai ua faagasolo e le Malo le fuafuaga o le siitia o ni tagata- e nofoia se isi nofoaga fou.O lea la ulutala- e faasino i le siitia o le nofoaga o i latou sa nofoia Sogi –i se isi vaega-eleele…! Fai mai la le faatomuaga o lea Tala Fou-“Ua sauni aiga uma….. se’ia vagana ai se aiga e tasi-e se’e atu e nofoia se isi vaega-eleele-e tusa ai ma le faaaliga a se tasi o alii ofisa o le Malo.

E aliali mai la i lea tala-o le aiga e tasi lea e le fia tuua Sogi e tusa ai ma le mana’o o le Malo-o le aiga lea o le Afioga a Nanai Lui Tokuma lea ua na faailoa mai-o le saunoaga a Mataafa-le Palemia muamua o Samoa i lona tamā-“O e nonofo ma lau fanau i luga o lea fanua…….-“e le mafai e le Malo ona taui atu le mea na fai e lou tamā-o le mea lea-“o le fanua lena o oe e o’o i le faavavau”!

A fua la i le mafuaga o le nonofo o Nanai ma lo latou aiga i Sogi-aemaise ai o le tau faasalaina o lona tama i le oti-ona o se faiga sese-o se mea tatau la pe leai-ona faaauau pea upu ma tuutuuga na fai e taitai o Samoa ua mavae-e pei o Mataafa le Palemia muamua o Samoa-e taui a’i le mea sese na tau fai i le tua’ā o Nanai ? O le a sou taofi? 

3. Matauina foi i Tala Fou nisi o mea mata’utia na tupu i se tasi o a’oga i le va o se faia’oga-ma sana amio lē taupulea na fai i se tamaitiiti talavou….! Ia-e ui lava ina faate’ia le vaai ma le faitau i lea tala-ae atonu e tatau lava ona i ai se mafuaga!

Afai e le o faaletonu le mafaufau o lea faia’oga-ia poo maua foi i se gasegase mata’utia o le faananau i mea e le tatau ona faia! Ae ui o lea-atonu o se mea fou lenei ua tulai mai-ae mafai foi ona faapea- o loo tupu foi i isi aoga- ae le o iloa!

Afai la ua aliali mai lenei mea mata’utia-o lona uiga-e mafai ona aafia ai soo se tamaitiiti a’oga-ona o faia’oga faapenei! Sa faaita lava e na o e faaletonu mafaufau e faia ia mea-ae o lea ua iloa nei-e o’o lava i e sa aoaoina lelei-o loo pisia ai foi ma i latou! Atonu la o se itu lea e talosagaina ai o tatou taitai ina ia silsila toto’a i ai-ina ia mafai ona malu ma faasaoina ai fanau mai nei mea leaga! O le a sou taofi? 

4. Matauina foi se ulutala fai mai o loo feagai se Tamā-fai ma se moliaga tau toso teine-ma o lea la tamā-fai, ua 59 tausaga le matua-ma o le vaiaso talu ai na ia faamalosia ai lona afafine fai. O lea teineititi e 18 tausaga le matua-ma ua saisai nei e Leoleo lea tamā.

O le isi mataupu tau toso-teine-o loo aafia ai se alii e 35 tausaga le matua-ma o le a tulai i luma o le Faamasinoga i le aso 8 o Aokuso 2016. O se taineitiiti la na aafia i lenei faalavelave -e 14 tausaga lona matua. Ia –a tatou tilotilo la i le sasao o lenei faama’i o le toso teine i totonu o Samoa-o le fesili-o le a le pogai? Aisea ua amio ai faapenei matua tusa lava poo ni matua fai? Aisea ua fai ai lenei solitulafono i fanau teine laiti?

O le faamanatu lava ma le faaaloalo e faapea-“O le i’a lea o le laumeni-a tu’ufua-ona alu lea i se motu tuufua o loo i ai se faga oneone-ona matua ‘eli lea o se Pu loloto ae tuufua ai. O le tele o fua o le Laumei- e mafai ona o’o i le selau poo le sili atu. A uma-ona tanu lea ae toe foi le Laumei i le sami-E faitau lelei e le Laumei le aso e fofoa ai. E fofoa lava fua o le laumei-ona taitasi lea ona fetolofi tamaitai laumei i le sami-ona o lea i le gutu o le ava o loo faatali mai ai lo latou tina.

O le mea mata’utia la-pe selau pe sili atu laumei laiti na fofoa-e uma lava ona toe ‘ai e le Launei-ae totoe ai lava na o le tasi. E na o le laumei lava na fai e le Atua-e toe nofo lava ia ma toe ‘ai lana fanau! O le fesili la-aisea ua amio ai faa-laumei isi  o matua- o le toe nonofo ma toe ‘ai a latou lava fanau? O le a sou taofi?

© Samoa Observer 2016

Developed by Samoa Observer in Apia