TIA O LE VAVAU I PAIA-“O LE ANA O LE ‘AU-PUPU’U”-

589 Hits

Mai le Tusi o le “Suaga a le Vaatele”

O le auala e alu i le Ana lenei -e afua atu i le itu i uta o le aai- ma alu ai lava i le Ala Galuese’ia pa’ia le Ana lea e i totonu o se toganiu. O le mamao  o le Ana mai le mea e tu ai le taavale- pe tusa lea o le sefulu iata. 

O le telē o le gutu o le Ana pe tusa lea ma le tolu futu faataamilo- ma e tau faigata le ulufale i totonu-talu ai-e te ulufale faa-no’uno’u mo se mamao e tusa ma le luasefulu iata-ona faatoa mafai lea ona e tu sa’o.

 I se tasi faaupuga-, e na o le amataga o le ulufale i le Ana e faigata-ae o le faagasologa atoa o le malaga atu i totonu-e le faigata ona e maualuga i luga le tele o vaega o le Ana.

O le tala’aga atoa o le Ana lenei e faapea-na mua’i maua e le alii e suafa ia Maua’i-o le nuu o Paia. Fai mai le tala na alu Maua’i i le tasi aso ma lana ta’ifau e tutuli. A’o faagasolo le tuliga-sa faafuase’i ona leiloa lana ta’ifau, ua fiu le toeaina e su’e, a ua leiloa lava.Ua fai sina leva talu ona galo le ta’ifau-ae na te’i le toeaina ina ua toe sau. Sa faate’ia le toeaina ina ua vaai atu-ua ese lava le sagisagi fiafia o si ana ta’ifau. 

Ua tātā-solo lona si’usi’u ma ua vaaia e Maua’i-ua oneonea atoa le tino o le ta’ifau. E le gata i lea-ae ua tagi leoleoā ma fetamo’ea’i solo e peiseai- o loo tauanau mai ia Maua’i-ia mulimuli atu ia te ia. E umi se taimi o fai pea ia faiga a le ta’ifau- ma ua aga’i nei ina tosina atu i ai le loto o Maua’i. O le mea ua tupu-e ui lava ina musu le loto o Maua’i e mulimuli atu i le ta’ifau-ae ua alu pea. 

Ua taunuu Maua’i i le gutu o le Ana-ona tu lea ma fetilofa’i solo- e tau saili le mea ua alu i ai lana ta’ifau. E le’i umi ae ulufafo mai le ta’ifau sa i totonu o le Ana.Ua tamo’e atu ia Maua’i ma le fiafia-e iloa i le tātā o lona si’usi’u. 

Ua tamo’e faataamilo ia Maua’i-ua olo solo lona tino i vae o Maua’i ma tagi faatauanau- ia mulimuli atu ia te ia. Ua sŏsŏ atu Maua’i i totonu o le Ana-ae ua toe fetaia’i foi ma lana ta’ifau-ona toe fo’i lea o lana ta’ifau. 

Ona tu lea o Maua’i ua faaletonu poo fea tonu le itu e aga’i i ai. 

Ona o le popole o lona mafaufau-sa faafuase’i ai ona tu o le a toe fo’i. E liliu loa Maua’i o le a toe foi –ae alaga mai loa se leo-“Maua’i-faaauau mai iinei-aua e te popole-o lou nuu lenei ma ou tagata.” 

Sa ulufale loa Maua’i-ae na matua faate’ia ina ua vaai atu i le lalolagi o tagata- ua amata ona aga’i ane e faafeiloa’i ia te ia. Ua uma le feiloaiga-ona aga’i loa lea i le maota. 

O faaaloaloga na fai ia Maua’i e le mafai e upu ona faamatala. Ua uma le feiloaiga ma le osiga-feagaiga-ona latou fai ai lea o le tonu e faapea.

 “O le a mafai ona toe foi i tai Maua’i i luga o aiaiga ia- “na te le ta’ua-i se tasi le nofoaga o tagata pupu’u. 

O le a tuuina atu foi ia te ia ni auauna e faia ana fe’au. 

O soo se taimi foi e mana’omia ai se mea-tau lava ina alaga Maua’i-ona faia lava lea o mea uma. 

O aiaiga la ia ma tuutuuga na osia e Maua’i ma le Nuu o Tagata Pupuu. Ua toe foi Maua’i i tai i le aai-o se tagata ua tumu i le fiafia. 

Ua o’o i se tasi taeao-ona alaga lea o Maua’i i fafo-e avane se mea’ai-ma sa faate’ia o ia ina ua la’u ane taumafa o loo vevela pea- e peiseai-faatoa uma ona kuka. 

O le tasi mea-ua amata ona tupu i Paia i lea taimi-o soo se faalavelave lava e fai-e masani lava ona i ai le “tufaaga faasili.” O lona uiga-afai o se taligā-malo ma ua tonu i le nuu o Paia- e tofu le matai ma le mea-tuā-‘olŏ, e o’o ane i le taimi e faamaopoopo ai- e tasi lava le mea-tuā’olŏ-e sili ai.

 A tula’i mai la lea tulaga-ona faapea lea o le nuu-o lea saofaga faasili-e aumai le Ana. 

Ua ‘a’ave tala o Maua’i i totonu o le nuu ma ua o’o loa ina fono le nuu i le maota o Maua’i i aso fono uma. Fai mai o le taimi lava e uma ai le fono-e alaga ai Maua’i-“se aumai se mea’ai.” 

E faate’ia  le nuu i le vaai atu-ua sau le ‘sii-laulau’ ma le anoano o taumafa-ae leai se afi e pusa. Ua fai pea fono a le nuu ma vaai pea faiga a Maua’i. 

Ua oso le loto vale o le nuu ma ua aga’i ai ina latou faasufi Maua’i poo fea e aumai ai lenei manuia. E tele taimi sa tauanau ai Maua’i e le nuu-ae le gata i lea-ua faapea foi lona faletua. 

I se tasi aso a’o faia le fono a le nuu i le maota o Maua’i, sa faailoa atu ai e Maua’i le tala atoa e uiga i le Ana ma Tagata Pupu’u. 

Fai mai le faamatalaga maumaututū a le toeaina o Sooialo, “o le taimi lava na faailoa ai e Maua’i le faamatalaga i le Ana o Tagata Pupuu’-sa lagona e tagata uma sa auai i le fono-le pa’ŏ o le paepae-ina ua tula’i tagata o le Ana-sa faalogologo mai fafo. 

O tagata ia mai le Ana- sa auauna ia Maua’i e pei o upu na fai i totonu o le Ana-i le ulua’i aso na fetaia’i ai Maua’i ma Tagata Pupuu o le Ana

© Samoa Observer 2016

Developed by Samoa Observer in Apia