Naunau aua se lelei o aiga
O le olaga lenei a le aunoa ma le naunau ma le tauivi e leai se mea lelei tatou te maua.
O lea tonu lava le mafaufau o Toetu Maifala o Fasito’o i le fa’atalatalanoag ma le Fofoga o Samoa i le taimi a’o foi atu lona aiga ua manava mai ana galuega.
“Ia na ou latu foi gauta e mai sina talo aua le fa’alifu,” o lana lea tala.
“Ia o feau masani lava o aso uma ma le fanau, e fa’amama le maumaga ma toto lava talo e tua iai le aiga.
O le tamā e 69 tausaga le matua le soifua ia ma o le faifa’atoaga lava lana taleni.
“O lo’u lava lea olaga, e tusa lava po le a le faigata i fea o le fa’atinoina o lo’o taumafai lava le mea e gata ai le mafai.
“O lo’u maumaga foi e tusa ma le 3 eka le tele ia ae o a’u lava o lo’o tu malosi i le galueina.
“E taua lava lo’u maumaga ia te a’u ma ou et tausi lava iai ma fa’alagolago ai.
I le saunoaga le tamā ia Toetu e faigata lava le atina’eina o aiga.
“O lo’o atia’e lava le fanua ma faalagolago lava iai i mea ua maua mai tusa lava pe e le tele se tupe e maua mai ai ae o le mea taulia ia maua lava sina seleni mo aiga ma fanau
O leisi tulaga taua i le mafaufau o Toetu ina ia maua e lona aiga le ola fiafia
“Tusa lava po o le a le faigata o lea e iai, ia ola fiafia le aiga ma fanau” o lana tala mai lea
O mea fai i totonu o le nuu ma ekalesia ua taugata tele pe a faatusa atu iai
“O faalavelave faale-aiga ua taugata tele ma e faia lava aua ua masani ai o tatou tagata
“Matou te iloa lava e lelava ae e taumafai atili lava iai i le malosi e gata mai ai ina ia manuia aiga ma fanau
“E faigata le olaga ua iai nei ma e le mafai foi ona tatou faia nisi tulaga aua ua masani ai”.