Manatu O Le Fa’atonu - Faatiga o le mea moni e uiga i le leai o ni galuega

Tusia Mata’afa Keni Lesa ma Faaliliu e Seagaitumua Tupuola ,

96 Hits

O loo pulato’a mai le mea moni e aunoa ma se ‘emo i o tatou foliga. O le leai o ni galuega i totonu o lenei atunuu o loo faatupula’ia pea i se fua uiga ese faatasi ai ma le matua leai lava o se vaifofo o vaaia. O lenei mataupu ua matua manino mai i totonuo nuu o i tua atu o Apia lea o loo faateleina ai pea tagata  o loo lolofi atu i totonu e saili se olaga lelei.

O loo outou silasila i nei tagata i aso uma, aemaise ai lava alii ma tamaitai ua matutua-ia e leai ni a latou mea e fai vagana ai le moe miti i ni auala e gaoi ai mai se tasi-talu ai-ona pau lava lea o le mea e mafai ona latou faia. O taimi nei o le popole. 

O le faafitauli e faapea o i tatou uma lava-i se tasi itu ma le isi itu-e faiā i ai poo na te iloa se tasi o ia lea e le o faigaluega, poo saili se galuega. O le mea moni matuiā lena e tatau ona tatou soifua faatasi i totonu o lenei parataiseo ua tatou faaigoaina o loo tatou aiga.

E toatele tupulaga talavou faatoa i’u mai se Kolisi, Iunivesite ma isi lava nofoaga tau aoaoga o loo i tua, e saili ni galuega.  Ae peitai-e le na o i latou.

O tagata ia sa galulue muamua i isi nofoaga o loo faapea foi ona faia lea tulaga faigata o le tau sailia lea o se galuega. E tusa ai ma lenei tulaga, atonu e talafeagai ona faapea atu –ua toatele tagata faigaluega, ae paga lea-e itiiti galuega.

Ma ae tatou te le’i faaputuina lauga o le paia male faapalapala i o latou luga, i le tele lava o itu, ua matua noatia lava o latou lima. O fea e te alu i ai e saili se mea e le o i ai? O fea o le a maua ai e nei tagata uma ni galuega pe afai e leai ni galuega o avanoa?

Ae ui o lea, o le itu e sili ona faanoanoa ai, e faapea o loo filo ia tatou tupulaga talavou le anoano i le taimi nei e leai ni a latou mea o faia. Ua na o na tafafao solo i luga o ala tetele ae leai ni mea e fai. E matua anoano tamaiti ua tuua a’oga ae itiiti avanoa tau galuega o loo maua mo i latou e fai i ai a latou filifiliga.

O le vaifofo tulaga muamua i lenei faafitauli o le mea moni e tatau ona afua mai le Malo. O lo latou tiute o le faatulaga lea o se siosiomaga e mafai ai  lea o loo ola lelei ai pisinisi ina ia mafai ai ona tupu ma ofo atu nisi avanoa faigaluega.

Ae o le mea moni-e leai se mea faapena. 

O le mea moni e le mafai ona matou faaleaogaina  taumafaiga ia o loo fai e fo’ia ai lenei mataupu. O loo filo i ia mea le anoano o fono, mafutaga tau aoaoga ma fuafuaga e uiga i le faia o ni avanoa tau galuega aloa’ia mo le toatele. O nei taumafaiga e faatupu malosi.

E ui lava ina le mafai ai ona fo’ia atoa le faafitauli, ae o ia mea o se vaega lea o le vaifofo. O le mea matou te fia faamanatu atu i le asō o le sootaga lea i le va o le leai o ni galuega ma le faateleina o faiga solitulafono ia o loo matua faamaumau lelei.

Matou te le o faapea atu ia avea lenei ma mea e ‘alo i ai –e aloa’ia ai soligatulafono poo le faapea o tagata taitoatasi uma e leai ni galuega o le a tua i le solitulafono e avea ma se isi faiga e ese ai.

Ae peitai, o le itu e faanoanoa ai-o loo tua i ai isi.

Ma o se mea lena tatou te le manana’o uma i ai. Ae tatau ona matua avea ma mea e una’ia ai tagata uma e aafia ai ina ia mautinoa e faapea o galuega e mafai ona maua mo tagata ina ia maua ai se soifuaga lelei.Afai e leai, o le a latou tua loa i isi auala ina ia mafai ai ona ola.

Mulimuli ane, e fo’i mai lava i le Malo ma lona gafatia ona sailia ni galuega. I le taimi nei, o le vaega o pisinisi o loo i ai se matafaioi tele e tatau ona faatino. E le mafai ona matou faamamafaina ina ia lava le taua o le faiga-paaga i le va o le malo ma le vaega o pisinisi.

O le manatu e faapea e tatau i le malo ona tuina mai se siosiomaga lea e lelei mo le aufaipisinisi e faatupu-tele ai ma ofo atu ni avanoa tau galuega se tele. I se tasi faaupuga, e tatau i le malo ona fai soo se taumafaiga e mafai ai ona mau-alafia le tuputupu a’e o pisinisi, ae le o le taofiofi o ana taumafaiga.

O le leai o ni galuega o se mea faatiga matou te le manaomia. Ae peitai-e le mafai ona alu ese se’ia vagana ai ua fai e le Malo se mea e fo’ia ai. I le taimi nei, matou te le o vaaia lava lava soo se mea. Ma o le mea moni faatiga lena, lea o loo faaauau pea ona pulato’a mai i o matou foliga, i taimi uma matou te mafaufau ai e uiga i le leai o ni galuega.

O le a la sou manatu? Tusi mai e faasoa mai ou mafaufauga ia i matou.

© Samoa Observer 2016

Developed by Samoa Observer in Apia