Fa’aoga tatau lau taleni

By Aruna Lolani 08 May 2017, 12:00AM

E fa’apea le tasi o alaga’upu ‘o lau taleni e aumai mai le Atua, o lo’u fa’aogaina tatauina o lea taleni, o lau meaalofa lea i le Atua.

O le talitonuga lea a se tasi o tama, 25 le matua o lona soifua, Lino Feo mai le Sauano, Fagaloa ma sa ia ta’ua o ia e le faigaluega ae e fa’aaoga lelei lana taimi i le atina’eina o lana taleni e fausia ai pe ta ai mea taulima Samoa.

O lana taleni o lo’o iai, o lana galuega fo’i lena.

“E tele a meataulima ua ou faia ma fa’atau atu aua le su’eina o se seleni.

“I lo’u a ia manatu e sili atu ai le tele o la’u tupe maua mai lea taleni nai lo’o sesi galuega ou te faigaluega ai.

“Ou te leiloa pe manatuaina e se tasi le fa’afiafiaga a le kolisi a Pesega lea sa fai, ia o a’u lea sa taina meataulima ia sa fa’aogaina mo le latou siva sa fai mo le Aso ole Fu’a i le 2016.

“O se galuega pito sili na tele, ae sa tele la’u tupe sa maua mai ai ma o se fesoasoani tele lena mo lo’u aiga.

O Lino e to’atolu lana fanau ma o latou uma e a’o’oga, to’alua e a’o’oga i Vaitele ma le isi to’atasi e a’o’oga i Anoama’a.

“O lenei taleni e le’o se galuega faigofie, e mana’omia le sa’o o lou mafaufau i le taimi e fa’atino ai, e mana’omia lou malosi ma e mana’omia fo’i le iai o lou loto ma lou fatu i taimi uma e fa’atino ai.

“O la’u taleni a la o se galuega lea ou te fia fa’aauauina i le lumana’i ma ou te talitonu, o se tasi lea o taleni a Samoa, o lo’o to’atele tagata latou te mana’omia mo le tele o meataulima e fia fausiaina.

“Ou te fa’afetai a a’u ia i le Atua mo lenei taleni ua ou maua.”

By Aruna Lolani 08 May 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>