Avanoa lē ‘au-maua mo fai-fa’ato’aga Samoa

Tusia Pai Mulitalo Ale ma Fa’aliliu e Maiava ,

274 Hits

KOKO-SAMOA MONI, SEKI A MO SUKALATI: Le Pule o le Kamupani Fai-Sukalati mai Niu Sila, o Rochelle Harrison ma le Fai-fa’ato’agā-koko, o Suemalo Talie Epati a’o siakia fatu-koko mo le ‘auina atu i Niu Sila

KOKO-SAMOA MONI, SEKI A MO SUKALATI: Le Pule o le Kamupani Fai-Sukalati mai Niu Sila, o Rochelle Harrison ma le Fai-fa’ato’agā-koko, o Suemalo Talie Epati a’o siakia fatu-koko mo le ‘auina atu i Niu Sila

O lo’o i Samoa i le vaiaso nei, le pule o se Fale Fai-Sukalaki mai Ueligitone i Niu Sila, le tama’ita’i o Rochelle Harrison.

O lo’o malaga mai e fia feiloa’i, e fia talatalanoa ma fai-fa’ato’aga, ma se’i fa’atofo fo’i latou i sukalati o lo’o gaosia i koko mai a latou fa’ato’aga.

Na ta’ua e Rochelle, talu ona tatala le latou pisinisi i le lua ma le ‘afa tausaga talu ai, ua silia nei i le tausaga atoa, o avatu lava i Samoa nei a latou uta-koko, a’o le malaga la lenei, ua manana’o ai e feiloa’i ma fai-fa’ato’agā-koko o lo’o avatu ai a latou koko.

O lo’o maua fo’i e le kamupani lea i Niu Sila, koko mai isi atunu’u e pei o le Atu Solomona, o le malo o Dominican ma Bougainville peita’i, o lona fa’amoemoe  ‘autu, o le fia galulue fa’atasi lea ma atunu’u o le Pasefika. 

 “I Niu Sila, matou te fia galulue fa’atasi ma atunu’u e tu-lalata atu ia matou, e faigofie ai ona fa’agasolo ma fa’aauau ai pea lea atina’e, ma o Samoa la le isi atunu’u o lo’o naunau iai,” o lana fa’aaliga lea. 

Na ta’ua fo’i, e sili atu le galulue tu’u-sa’o ma fai-fa’ato’aga.

“A mafai ona fa’apena, o le a matou fesoasoani i le fa’atinoga o mea uma ma fa’amautu ai fo’i le va’aia lelei o a matou fai-fa’ato’aga ma fai fo’i iai ni taui lelei.” 

Na fa’aalia fo’i e le Fa’atonu o le kamupani o le Maiden South Pacific mai Niu Sila, o Tiana Epati, o lo’o latou iloa, le tele o se sao o Samoa e ‘auina atu ai vaega ia i maketi i Niu Sila a o le mea e tatau ona fai, o le ‘aumai lea o le maketi i Samoa nei.

Fai mai Tiana, o le tau o le sukalati e gaosia mai fatu-koko Samoa mao’i, e sefululua tala Niu Sila (NZ$12.00) i le 75 kalama. 

Na ta’ua fo’i, e lua isi fale-gaosi sukalati lapopo’a i Niu Sila o lo’o avatu a latou fatu-koko mai Samoa, ma e tele lava le mana’o mo fatu-koko mai Samoa.

Sa fa’afiafiaina tele le fai-toga-koko o Su’emalo Talie, ina ua feiloa’i tonu i le pule o le kamupani, ua silia i le tausaga, o la’u iai ana koko. 

“Ua fiafia le agaga ona ua maua le avanoa e ‘ave ai a’u koko i fafo, e le gata ua fesoasoani i lo’u aiga, ae fa’apea fo’i lo matou nu’u ma Samoa atoa,” o le fa’aaliga lea a Su’emalo. 

Na ta’ua fo’i, o se alaga-manuia lelei tele e maua ai tupe, lea e tusa o le $400.00 i le taga-koko (na o fatu).

Sa asiasi atu fo’i Rochelle i le isi fai-fa’atoaga-koko i Sale’imoa, lea e fai lana togafa’i, e le fa’aaogaina ai ni vaila’au. Na ta’ua ai e Rochelle, e le o toe mamao ae fa’atau atu a latou sukalati e gaosi mai le fa’i.

E lua vaiaso o lo’o iai Rochell ma le vaega i Samoa nei.

© Samoa Observer 2016

Developed by Samoa Observer in Apia