Fa’ailoga o le Matua (Vaega 1)

Tusia Fa’aliliu e Maiava ,

166 Hits

Toe mafaufau tasi lava…Na muli le isi tamaititi i se tu’uga-momo’e i le a’oga, ona alu fa’ali’i ai lava lea i lona aiga, ma le ita tele i isi tamaiti na mua i ā ia. Na va’aia e lona tama le lē-fiafia o lona atali’i ona fa’apea atu lea: “Se atali’i, e fiafia lava ma to’amalie so’o se tagata pe a manumalo, ma e malamalama-gofie lava lena mea.

Ae a faia’ina loa ae tumau pea lou fiafia i le ua manumalo, lona uiga e ta’u mai ai, ua fa’asolo ina e matua ma avea o se tagata-matua.” O nei ma taeao, o le a tatou tilotilo ai, i nisi o fa’ailoga o le tagata, ua matua moni.  

O le pulea-lelei o o tatou mana’oga fa’aleTino ma fa’ananauga, o le tasi lea fa’ailoga o lo tatou matutua. “O le tagata e mafai ona ia pulea ia lava, e mafai ona ia pulea o isi mau mea.” O le tagata matua, e mafai ona ia pulea lona tino atoa, e aunoa ma le tu’u i lona tino, e pule ma fa’atonu lona tagata.

E moni ma fa’amaoni lea tulaga, i mana’oga fa’aleTino, pe o lagona fa’afiafiaina, o lagona o le saogalemu ma to’amalie, o mea’ai, ma isi mau lagona e o’o lava i lagona o le fia malolo. O tagata ua matutua, e le soifua i se olaga e pulea e o latou mana’o ma lagona, talu ai, latou te le-mo’omia ni fiafiaga fa’atotope e fa’afiafiaina ai.  

E mafai fo’i e se tagata-matua ona pule ia lava, i tulaga o le fa’amaoni. O nisi, e matua lelei lava i le va’aiga lautele ae le o se tagata lelei. E lelei i luma o le lautele, a o le matua gaoi lava ma pepelo pe a na o ia.

O le tagata matua la, e pulea lelei e lona mafaufau sa’o ma lelei, ae le o le mea e sao ai ma le-tauvalea. Tusa lava la pe le iloa e se tasi sa e pepelo, sa e gaoi ma fai se mea sese, ae fai lava, aua o lo’o ia iloa lelei e le mana’o e ta’uvalea lona tagata ma le-aloa’ia ai e isi.

“O le tagata matua, e pulea e ia ia lava, ia ‘aua ai ne’i fa’atonua e isi.” O lona fa’amaoni ma le pulea lelei o lona mafaufau, e le gaua’i ai i so’o se fa’aosoosoa, se faiga fa’amalosi ma so’o se fa’afitauli lava, e ono sese-‘ese ai mai ona ala-masani, lona mamalu ma lona aloa’ia lelei e isi. 

O le tagata matua fo’i, e fa’atonu ma pulea lava e ia, ona lagona. E iloa-gofie lava se tagata malosi, i le fiu e fai se ‘auala e fa’aita ai. “O le matua lava o lou soifua, o le la’iititi fo’i lea o lou ma-ita-ita.”  O le tagata matua, e pulea lelei ona lagona ma malamalama lelei fo’i “O taunu’uga o le loto-ita, e masani lava ona leaga atu i lo le mea na mafua ai.”

Leai se mea aupito tiga ma fa’aleaga-mea, ae maise le afaina ai o latou e pele ma mamae, nai lo le tagata loto-ita.

Manatua, e tasi lava lou ola, aisea la e le avea ai o le soifua aupito lelei? Tatalo ia Iesu e pulea atoa e Ia lou soifua, aua e na o Ia lava e te maua ai le malosi e te mo’omia i aso uma, e avea ai o se tama a’o se tina-matua ua pulea lelei ma foafoaina e Le Atua ia iai.

O le a e soifua e atoatoa i le fiafia ma le manuia mai Lagi, pe a amata nei lou tagata-matua. Toe mafaufau tasi lava…                  

© Samoa Observer 2016

Developed by Samoa Observer in Apia