1.Matauina iTala Fou e faapea uma ona fai le Faaiuga a le Kapeneta e tapuni le Kolisi o Avele-talu ai fevesiaiga i le taimi nei- i le va o ni a’oga i Apia nei. O lea la faaiuga-ua le gata ina tapunia ai le Kolisi o Avele-ae ua faapea foi ona faate’a ai ma faia’oga o lea Kolisi-e aofia ai ma le Pule o le Kolisi-o Lesaisa’ea.

O lea la faaiuga a le Kapeneta e tapuni lea Kolisi-e faatali ai le taunuuga o su’esu’ega a Leoleo. Fai mai ua tonu foi i le Kapeneta e faapea e afua mai le 2017-o foa’i uma a le Malo mo A’oga a Ekalesia-o le a tu’u-sa’o atu i a’oga-ae le o Komiti Faatino a ia Aoga…..!

Ia, afai la o le finagalo lea o le Kapeneta-o le tulaga moni lava lea ua leva ona tatau ona fai! Aisea? O le a le pogai o le taua’imisa o nei tamaiti a’oga ae ua le fai na o le a’oga? O le pogai-ua le mafai e Pule A’oga o ia a’oga ona pulea nei fanau ma taofi le vevesi!

E matua leai lava ni mea faapenei sa tutupu i ia aso-leaga sa tufi taufao avanoa i a’oga ma sa matua finau tamaiti uma mo le poto ma le aoaoina e alu ai e sikolasipi i fafo ma saga faateleina ai le aoaoina! O le tulaga la e sili ona faanoanoa ai-ua o’o lava i a’oga a Ekalesia sa le tatau ona auai i nei mea valea- a ua aafia ai foi.

O lona uiga la-o loo i ai lava se mea o loo faaletonu-ma o lea faaletonu-e pogai mai faia’oga.Ua fai pito tasi le latou galuega- na o le aoaoina o le poto-ae ua le aoaoina le amio! E le gata i lea- ua na o le faavi’ivi’i foi o matua-ae ua le a’oa’o le tama ma le teine ina ia tu’u atu atoa le mafaufau i le aoaoina-ae le o mea mataga ma le faatupu vevesi.

Afai la ua faatupu vevesi nei tamaiti a’o lea e a’o’oga-o lona uiga-e o’o ane ina matutua-masalo ua sili atu i lo le ISIS lea o loo ona faavevesiina le lalolagi i le taimi nei! O le a sou taofi?

2.Matauina foi i Tala Fou se ulutala fai mai –“Ua uma le taimi mo tagata o Sogi”-ma o lea ulutala- e faasino i se tusi a le Faalapotopotoga o Eleele a Samoa ina ia tuua e i latou ia o loo nofoia Sogi i le taimi nei.

Ua manino mai la-o loo faauliulito lava finagalo o nisi o loo nofoia Sogi-ma ua latou ta’utino mai lava-o le nofoaga lava lea sa nofoia e o latou matua-i le taimi o Siamani; ma o Sogi lava latou te manana’o –“e tanu ai latou…….”!

O le fesili la-Aisea ae o le a le pogai ua tau’ave ese ai ia tagata mai Sogi? O i latou o ni tagata Samoa moni pe o ni tagata totolua? Afai o ni suli o nai tagata mai fafo ia na aumau faamalosi e Siamani e faia a latou faatoaga i Samoa nei-ma o le nofoaga lava lea na faa-nonofo ai latou e Siamani-aisea o le a aveese ai faamalosi-ae ua au-tupulagā o nonofo i Sogi?

O le a se feagaiga a Siamani ma ia tagata i le taimi na aumai ai i Samoa? O fea e nonofo tonu ai? O Sogi poo Falelauniu poo fea lava? Afai la ua mautu meatotino a ia tagata i Sogi-ae o lea ua fai mai le Malo e o ese-e i ai se galuega tele a le Malo o loo fia fai i Sogi?

O le a lea ituaiga o galuega? E leai lava se isi nofoaga e mafai ona fai ai- e ese mai Sogi? O le uafu fou lea ua fuafua e fai i Vaiusu- e mafua ai -pe o se isi lava galuega tele? Afai la o loo tatanu ai matua o ia tagata i Sogi-o le a ta’eli ese uma foi? O le a sou taofi?

3.Matauina pea le faateleina o taavale afi i totonu o Samoa i aso nei-ma ua matauina ai foi ma le saoasaoa o taavale. Ae o le itu ua sili ona faanoanoa ai- e foliga mai e le o faamalieina lava le toatele o avetaavale i le tulaga lelei o ata tetele ua i ai nei-ma le saoasaoa faatulagaina.

O le uiga o se manatu- e tiga lava ona i ai molī auala-ae taumafai lava e fai le mea e loto i ai-ae le faaaogaina molī ua i ai nei –pe musu foi e usita’i i molī-ae fia fai lava lona loto. O le itu foi i la’au-pese o taavale-ua pei o se tauvaga faaili-pu o le Tuto’atasi le mea o loo fai nei-poo ai e leotele le laau pese o lana taavale!

Ua tiga lava taimi o vavao a nuu ma faiga-lotu i afiafi ma le tuneva o le po- ma ua tofafā aiga ma nuu-ae fai lava le latou tauvaga poo le taavale a ai e saoasaoa- poo le taavale foi a ai- e sili ona leotele lana laau pese.

O le fesili la faamolemole-“O ai tonu ‘ea ae poo ai foi le matagaluega poo le faalapotopotoga e gafa tonu ma lenei mataupu?Aisea lava ua le mafai ai ona se’i silasila ane i lenei faafitaui? Afai e mafua ona fai- ona o le manatu faapea-‘o le alatele o le Malo’-e mafai e lena manatu ona taofi tagata mai le fai o le mea e tatau ona fai e taofi ai ia faiga le mafaufau-pe afai ua fai so’o ma ua aga’i foi ina lē malie!

E fā’i o le lē mafaufau i vavao a nuu-a’o le faasoesa i taimi o loo tofafā ai le atunuu! O nei ‘ea tagata o loo faia nei faiga-o ni tagata Samoa moni sa a’oa’oina faale-aganuu pe leai? O ni tagata Samoa poo ni Papalagi?

O le a se manatu o i latou e gafa tonu ma lea faafitauli-pe ana faapea la e avatu nei taavale ma latou la’aupese e ta i le po atoa i o latou lumāfale? O le a sou taofi?