O LE TALA IA MUAGUTUTI’A, TUPUA MA GALUMALEMANA

By Fuimaono Na’oia Faasavalu Touli F. Tupua 06 May 2016, 12:00AM

Sa nofo Muagututi’a-sa sologa lelei lana nofo-aua sa leai se taua i Samoa. Ua faasolo ina afu lona soifua ma ua vaivai le Ali-ona fai ai lea o lana mavaega e faapea: “Lufilufi ma Leulumoega-‘o si o’u atalii o Tupua- o le a outou feagai, ae o si o’u atalii o Fepulea’i-o le a tautua!.

Sa Tuala ma Sa Levalasi-ia outou faafogafoga lelei mai i la’u upu:-“O oe Salevalasi-o le a tausi e Lufilufi; a’o oe Satuala-o le a tausi e Leulumoega”!

O oe Salevalasi- o le Aiga Pa’ia lea; ae o oe Satuala-o le Aiga “Faalagilagi lea”- o a oulua Toga-o le a igoa faatasi-‘o le Pulumaleleuleu o Satuala; o le Pulumaleleuleu foi Salevalasi; ae o Aiono -o le a faa’ele’elea-auā tuga o le tautuaina o si o’u atalii; ae o le toeaina lea o Taimalieutu-o le a alu i Lupese’ē e nofo ai- e fofoga ai Satuala-aua upu o si o’u atalii.

Ona uma lea o tofiga-ae gasolo ao ma taape pāpā ia Muagututi’a. Ona faapea lea o Lufilufi ma Leulumoega:” “O le tama lenei na aumai tatou te feagai?

Se’i faasoasoa maia poo fea ni ona aiga? Ia saua lava! “E tua Mulinuū nei i le Faleniutupu-tatala le lafo o Manuō-e tua Faleniutupu i le Vainiū-tatala le lafo o Molio’o; e tua Vainiū i Vaie’ē-tatala le lafo o Iuli; tua Vaie’ē i Vaiiliilī-tatala le lafo o Moe’ono; tua Vaiiliilī i Salani ma Alofisula-tatala le lafo o Ofo’ia; tua Salani ma Alofisula i Falefasa-tatala le lafo o Talo; e tua Falefasa i Faletoi-tatala le lafo o Faautagia.

Ona faapea lea o Lufilufi ma Leulumoega:- ‘Ua lava a tatou toga’”o le “Tama-a-Aiga” le tama nei. Ona nofo lea o le Tupu o Tupua i le nofoaiga-ua loto i ai Lufilufi ma Leulumoega, Tuisamau ma Safata-o le Alataua.

O le pogai lea e faaigoa ai le Toga a le Aiga Safenunuivao-“O le Toga o le Faasoasoaga a Tumua.” Ona i’u lea o le nofo a Tupua-‘ua gasolo Ao taape Pāpā, ae soloa’i ane lona atalii o Afoafouvale i le nofoaiga. Ua ui ane tagata i tafatafa o Galumalemana, ua lu’u nanā pe ua upuese e le ‘aumaga.

Ua pei ai foi Galumalemana ia o se Tupu-ona to’atama’i ai lea o le Tupu o Afoafouvale.Ona alu ai lea o le Tupu ua tago ‘au i Atua. Ua ui atu i le itu alofi; ae alu ane Galumalemana i le itu tuāfanua. Ona la fetaia’i ai lea i le Falepunaoa.

Ona fai lea o le alofi o le Tupu, ae faapea upu a Talo ia Galumalemana:’Alu ia ina solisoli aao o le Tupu’-ina ia mafai ai ona te’a lona to’atamai.Ona alu lea o Galumalemana ua solisoli-ae se’i le aao o le Tupu.

Ona faapea atu lea o le Tupu-“Ou te le mafai-se’iloga lava e uma ona tau o le ta taua-aua o oe -ua e fouvale ia te a’u. Ona ita ai lea o Satalo i le Tupu. Ona oso atu lea o Talo-ua tu i totonu o le alofi ma gagau le Tao ma faapea atu:-

O lou lena fasi tao, ae o lou foi lea fasi tao-“o laia ina tau i Leulumoega”. A malo se isi o oulua-o le a ia te ia pāpā. Ona tau lea o le taua. Ona to’ilalo lea o Afoafouvale, ae manumalo Galumalemana.

Ona fai ai lea o le ‘upu a Galumalemana: ‘Ai se fou, sau ia te a’u-aua le alofa i pāpā a la’u fanau. Ona nofo ai lea i le nofoaiga-ua tafa’ifa Galumalemana. “O le taua lenei na faatoa maua ai le igoa o Afoafouvale-aua e nofo i Pāpā-ae itu fua lava i lona uso. 

By Fuimaono Na’oia Faasavalu Touli F. Tupua 06 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>