Mana’omia se nofoaga lelei e mapu ai

By Fetalai Tuilulu’u 06 April 2017, 12:00AM

A fa’apea ua e mauaina se maota e te mapu iai, ia e maua i le agaga fa’afetai. 

Aua i totonu o Samoa, o lo’o iai lava nai ‘aiga o mana’omia ni  fale lelei. 

O Tatia Reupena, o se tina e 44 le matua o lona soifua ma o se va’aiga lea i le fale o lo’o nofo ai o ia i le nu’u o Faleasi’u. 

Ua tatou iloa le tetele o timuga i lenei vaiaso, i le tele ai o i tatou o malu lelei nofoaga o lo’o nonofo ai, a’o lenei tina ma lona aiga e tau su’e se itu o le fale e malu ai pe’a o’o i vaitaimi timuga. 

Na maua atu e le Fofoga o Samoa lenei tina i le aso ananafi a’o taumafai o ia e fai se fuafuaga aua le tau tavaina o lona fale. 

“I taimi fa’apenei pe’a malolosi timuga, e sili atu ia a’u ona ou nofo se umukuka a sesi e fai se taualuga nai lo’o le nofo ii nei,” sa ia fa’apea mai. 

“Ou te le iloaina po’o le a le aso e te’a ai lenei timu aua o le umi ona timu, o le tele fo’i na o fa’afitauli matou te feagai ai.”

O le fola o le fale e le fa’asimaina ma o pepa malo o lo’o fa’aaogaina e nonofo ai i luga.

O ipu fo’i o lo’o fa’aaogaina o mea lava ua maua e lenei aiga. 

“E leai se matou seleni e toe fauina ai sesi fale,” sa ia fa’apea mai.

“Ae e sili atu ai lo’u popole i la’u tama laitiiti. Sa ou va’aia fo’i le mafatiaga sa feagai ma o’u matua aua o matou e le’o se aiga e u’u i ni ‘oa. 

E to’alua le fanau a Tatia ae o se mafatiaga tele le leai o sesi i le aiga e faigaluega. 

“E faigata lava le olaga,” sa ia fa’apea mai.

“O lo’o matou feola nei i mea matou te maua mai le si’osi’omaga ae o le itu faigata lava o le matou fale. Ia na ua outou taga’i mai, ua toetiti a le foliga fale. 

“O lo’o taumafai pea lo’u to’alua e su’e sana galuega i lenei taimi aua se lelei o lenei fale.

“Aua o le taimi nei o lea matou te mafatia i le tau su’eina o mea’ai mo aso uma aemaise fo’i le tau atina’eina o lenei fale.”

 Sa fa’aalia fo’i e le tina lona le fiafia i le taugata o le soifuaga. 

“Pei o se itu lena o lo’o atili matou mafatia ona o le taugata ua iai. 

“Ua matua taugata lava le soifuaga ia.

“I lo’u nei tagata ou te le maasiasi fo’i e talosaga atu mo se fesoasoani i le fausiaina o se fale e sefe atu nai lo’o le fale ua iai nei. Tau lava o sina fa’aleleiga ina ia matou malu mai ai i timuga.”

By Fetalai Tuilulu’u 06 April 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>