Tofia se Tama’ita’i e avea ma Failautusi-Aoao fou o le Taupulega

Tusia Fa’aliliu e Maiava ,

227 Hits

Ua iai nei se Failautusi Aoao fou a Malo o le Taupulega. O le tama’ita’i lea o Patricia Scotland QC.

I lona ulua’i aso i le Ofisa i Lonetona, sa ia ‘oto’oto mai ai vaega o le a ‘ave iai lana fa’amuamua, o le Failautusi Aoao a Malo o le Taupulega – e aofia ai le faia o ni fofo e taofia ai sauaga fa’asaga i tina ma tama’ita’i, o fa’atinoga e fa’afetaui ai suiga o le tau, o le fa’aleleia o fefa’ataua’iga ma pulega lelei, fa’apea le faia lelei o avanoa faigaluega mo tupulaga talavou.

O Patricia, na fa’atuina mai e le malo o Dominica, o le ulua’i tama’ita’i lea ua umia lea tofiga.

E selau ma selau malo-vala’aulia na fa’afeiloa’ia le Failautusi-Aoao fou, a’o tata leo-tetele fa’aili, o leo o ‘aufaipese-lotu ma le anoano o ‘au-fa’afiafia sa ‘auai, i le nofoaga ‘autu o Malo o le Taupulega i le Maota o Marlborough.

Sa ‘auai nisi iloga o le lalolagi, o ta’ita’i o malo, o nisi ta’uta’ua i ta’aloga ma vaega fa’asalalau. O lea fa’amoemoe sa talimalo ai Garth Crooks, le tama-soka ta’uta’ua a Egelani ma sa faia ai fo’i fa’afiafiaga a tagata-pepese lauiloa pei o Heather Smao o le M People, o le ato-maualuga o Franz Hepburn ma le fa’amatua o ata-tifaga, o Hugh Quarshie.   

 “Ua ‘ou nofo sauni tatou te galulue fa’atasi mo le fo’ia o sauaga fa’asaga i tina ma fanau-teine, fai ni faiga e fa’afetauia ai suiga ogaoga o le tau, ia una’ia malosi fefa’ataua’iga ma faia faiga-pulega lelei, ia si’itia tulaga o le soifua maloloina lelei, o le finauina o aia fa’aleTagata soifua o o tatou tagata ma ia fa’amautuina, ua maua ni avanoa faigaluega e mo’omia e o tatou tupulaga talavou mo lo latou lumana’i manuia,” o le saunoaga lea a le Failautusi-Aoao, i lana ulua’i malelega i Lonetona. 

Na taunu’u loa mai sana asiasiga i le Atu Karepiana, sa momoli aloa’ia loa ma fa’afeao atu i le Nofoaga ‘Autu o le Taupulega e le Hai Komesina o le Atu Keripiana ma fa’afeiloa’i atu e le Sui Hai Komisi o Dominica mo Peretania, o Janet Charles.  

Na fa’ailoa aloa’ia ai e le Failautusi-Aoao fou, ana fuafuaga-mamao mo le Taupulega a Malo ma fa’apea ai “O le galulue ma ‘auai o se tino e tasi – aiga e tasi – e mafai ai ona tatou faia o se suiga tele mo le lumana’i”. 

I lana saunoaga lea, sa ia fa’amatalaina ai o ia, o se “tama-fanau moni a Malo o le Taupulega” – na soifua ane i le Atu Keripiane ae na a’oa’oina ma ola i Lonetona. Sa ia fa’amatalaina fo’i lona soifua-galue ma “ulua’i-matati’a” ua ‘ausia– le ulua’i tama’ita’i-uli ua ‘auai i le Fono a le Tupu Tama’ita’i i le Malo o Peretania, le ulua’i tama’ita’i ua umia le tofiga o le Loia Sili a Malo o Peretania ma le ulua’i tama’ita’i fo’i ua avea ma Failautusi-Aoao a Malo o le Taupulega. A ua “toe popole” ai nei fo’i i le avea ma ulua’i Failautusi-Aoao tama’ita’i ma ua fa’ananau ai lava i le lagolago mai a isi auga-tupulaga fou o ta’ita’i-tama’ita’i, o lana fa’aaliga lea. 

Sa ia fa’alauiloa fo’i, o le a taumafai malosi e fo’ia sauaga i totonu o aiga ma lotoifale, o se tasi o ana fa’amuamua, a o se fa’afitauli na ia ta’ua, ua “’avea ai ai lo tatou lumana’i-manuia”. Sa ia fa’amamafaina fo’i, o le fa’aauau pea ona le-aloa’ia ma faia faiga-fa’atautala i tina ma tama’ita’i, o le a fa’aauau ai lava ona afaina le soifua maloloina lelei ma le ola o tagata, aiga, nu’u ma atunu’u.

Na ta’ua e Patricia – na soifua mai i le nu’u la’ititi o St. Joseph i Dominica -  e matua malamalama  lelei lava i fa’amata’u e afua mai fesuia’iga o le tau. Ua tatalo mai ai i sui uma o le Taupulega, ina ia galulue fa’atasi e fa’ataunu’u ta’utinoga sa malilie fa’atasi iai, i le fono mo fesuia’iga o le tau o le lalolagi sa faia i Pale ia Tesema o le 2015. “E mafai lava ona tatou fa’ailoa atu i le lalolagi, le fausia o ‘auala e tete’e ai i a’afiaga ma sa’ili ni fofo talafeagai.” 

O le una’ia o fefa’ataua’iga i Malo o le Taupulega ma le faia o avanoa faigaluega mo tupulaga talavou – lea ua ‘ausia le 60 pasene o le faitau-aofa’i o tagata o le Taupulega, o le a avea ma aupito i luga o ana galuega o fuafua.

“’Ou te matua talitonu lava, e mafai ona tatou suia mea uma mo le lelei. ‘Ou te mana’o, ia avea le Taupulega ma leo o tagata uma e tutusa o tatou talitonuga ma mana’o ma iai le fa’amoemoe,” o le fa’ai’uga lea o lana ulua’i saunoaga ina ua pale mai i le tofi.

© Samoa Observer 2016

Developed by Samoa Observer in Apia