O LA’U TALA FO’I

139 Hits

1. Matauina i Tala Fou le sasao o le afi ona o se tane penisini Iiluga o le Uafu i Matautu na mu.

E ui lava la ina faapea e tasi se soifua ua maumau ai-ae faafetai i le Atua-ona ua le ‘ausia e lea faalavelave- le tulaga sa tatau ona o’o i ai-o le pāpā uma  lea o ia tane i le taimi e tasi-aemaise ai o le le maua lea e le afi o alā-paipa ia o loo faata’oto atu i totonu o le Taualaga e pamu atu ai suau’u ma penisini i ia tane.

O le mea moni-ana faapea e satia ia paipa o loo faata’oto atu i totonu o le Taulaga-o le upu moni e matua liu efuefu le Taulaga atoa-faatasi ma afioaga e pei o Apia, Matautu ma Vaiala faasolo atu ai  Moataa-toe faasolo mai i sisifo-ae le faitauina ai le sosolo mai o lea mu i totonu o le Taulaga ma aga’i atu ai i sisifo ma faasolo atu ai lava i Mulinuu.

Talu ai la ona o lea ua tulai mai lea faalavelave ma e na o le tasi le soifua ua maumau ai-atonu ua talafeagai la ona toe silasila lelei lava le Malo i ana fuafuaga fai mo le lumana’i aemaise ai lava galuega mata’utia faapenei e pei o tane suau’u ma tane penisini tetele.

E mafua se faamatalaga ona ana faapea e aafia uma tane e lua ia o loo i luga o le uafu- e faapenei ua leai se uafu-ma le anoano o mea ua faaleagaina-aemaise ai o le lamatia ai o afioaga ma alalafaga e latalata ane i le Uafu i Matautu. O le a sou taofi? 

2. Matauina foi i Tala Fou aemaise ai o le vaai tino-le manaia, talafeagai ma le aoga o moli auala i vaitele! Ae paga lea-afai e le iloa e avetaavale le taugata o lea galuega ma le pogai na fai ai-e maumau tupe a le atunuu.

O lea la galuega- e le gata ina manaia-ae ua sili atu fo’i ona atoatoa lona lelei-pe afai e manaomia e Samoa ni feoaiga saogalemu i le laueleele. Ona o ia la moli auala fou-o le pine faamau lena-ua matua saogalemu lea auala mo tagata uma e faaaogaina-se’ia vagana ai le ‘au-mitamita vale –le ‘au-onanā ma tupulaga e le lava le aoaoina.

A silasila la i le sau mai Vailoa faasolo mai ai i Vaiusu-o lea e tumau pea ona avea ma malae tutu’u mo le ‘au-mitamita vale! Ua uma ona fai laupapa o faasilasilaga mo avetaavale ina ia o lemu-ae leai se mea faapena o faia. O le fesili la-o le a se faiga e mafai ai ona fai ia saogalemu le sau lea mai Lepea e tau mai i Vaitele? O le a sou taofi? 

Ia –o lea ua uma le Faiga-Palota Lautele-ua uma foi ona faatauto aloa’ia Sui Usufono o le Palemene –ae o lea foi ua toe tulai mai nisi talosaga e faasaga i faiga tau faasese ma le pi’opi’o na faatino e nisi o sui faatutu mo le faiga-palota.

E pei lava ona silafia e le atunuu-o nisi o ia talosaga e faasino i faiga pi’opi’o-ae o isi talosaga e faasino i faiga solitulafono na faatino e nisi o sui faatutu mo le faiga-palota. Ia-o lea foi o le a toe alo atu i isi faamasinoga-talu ai lava nei faiga tau faasese poo faiga pi’opi’o!

O le fesili la- afai la ua avea se sui faatu ma Minisita –Minisita Lagolago- ae o lea ua molia i faiga pi’opi’o ma faiga taufaasese solitulafono-e faapefea la ona avea ma taitai o le atunuu ni tagata faapenei?

Afai sa le faamaoni i le faiga-palota lea ua manumalo ai- e faapefea la ona faamaoni pe a MInisita, Minisita Lagolago pe avea foi ma Sui Usufono o le Palemene? Afai e le faatuatuaina-e faapefea ona faatuatuaina pe a avea ma taitai o le atunuu?

O le fesili la-aisea ua faapenei ai le fai o faiga tau faasese ma faiga pi’opi’o-ae mana’o e avea ma ta’ita’i o le atunuu? A toe tilotilo i tua i le 1962 na tuto’atasi ai Samoa e o’o mai le taimi na tulai mai ai le HRPP-e i ai se Palemia, Minisita, Minisita Lagolago poo se taitai o le atunuu na faia ni mea sese?

Na latou faaaogaina i ni faiga pi’opi’o se faitau miliona ma miliona o tupe a le atunuu?

Na matitiva le atunuu e pei o le taimi nei-i lena taimi? Afai o le tali o le –LEAI-aisea la ua matua fiafia ai nei faipule  poo sui faatutu mo le faiga-palota e fai mea sese ma faiga pi’opi’o? O le a sou taofi?

© Samoa Observer 2016

Developed by Samoa Observer in Apia