E fia ‘avea a’u ma foma’i

Tusia Fetalai Tuilulu’u ,

76 Hits

Le tama’ita’i i a Easter Asovale o Vaitele.

Le tama’ita’i i a Easter Asovale o Vaitele. (Photo: Iliā L Likou)

O lea le miti o lo’o fa’ananau i ai le loto o le tama’ita’i aoga i a Easter Asovale i le Fofoga o Samoa pe ā o’o ina matua.

“Ia o lea le fa’anaunauta’iga o lo’o o’u nofo ma a’u i le taimi lenei,” o lana tala mai lea.

O Easter o lo’o i le Tausaga 9 i le Kolisi o Avele ma o lo’o nonofo ma lona aiga i Vaitele.

“Ia o a’u ua 15 nei o’u tausaga, ma o lo’u lea mana’o o lo’o i ai le taimi lenei, ona e fia ofoina lo’u taimi e fesoasoani ai i so’o se tagata e na te mana’omia la’u fesoasoani pe ā o’o ina ou matua.

 “E pei na amata mai lava lo’u lea mana’o a’o 6 o’u tausaga, ia e pei o se itu fa’afiafia loto tele o lo’o ua i ai le taimi lenei, ona o lea ua maua le avanoa i luga o le Kolisi e fa’aauau ai lava ona tuli le mana’oga o lo’o i a te a’u.

Na ia ta’ua o le maitauina ai o le to’atele o le mamalu o le atunu’u aemaise o nai tagata matutua ua aga’i atu le falema’i mo se fesoasoani ona o gasegase o le tino e pei o lea le tulaga o le mana’omia tele ai se fesoasoani.

“E pei o lea lava le mafua’aga o le naunauta’iga o lo’o ua i ai le taimi lenei i totonu o si o tatou atunu’u.

“O le ala fo’i lea o le mana’o ai lava ina ia fai lelei le aoga ma usita’i i matua.

“Aua o lea le fa’amoemoega tele e mafai ona manuia ai le olaga ma so’o se taumafaiga pe a lelei lava le tulaga o i matou o le fanau i le aoga.

“E le gata la mo lea tulaga, ae tatau lava ona maua se  galuega lelei e fesoasoani ai i lo’u aiga ona ua le toe faigofie nei aso ua tatou i ai.

Na ia fa’ailoa le avea pea o galuega faiagat a matua e una’ia ai o ia ina ia taumafai pea i le aoga.

“Ia e pei o matua o lo’o fa’atupeina so’o se vaega aemaise lava i a’oa’oga.

“O nai o’u matua, ia o lea lava le tulaga o lo’o o la fa’atinoina, mo le lelei alu i luma o aemaise lava ia maua e i matou le lumana’i manuia.

“Ina ia aua ne’i o matou ola falolō i le lumana’i.

© Samoa Observer 2016

Developed by Samoa Observer in Apia