Mana’omia se suāvai

By Fetalai Tuiluluu 06 March 2017, 12:00AM

O  le suāvai o le ola!

O lea le talitonuga o le tamā i a Vaiolo So’otaga i le Fofoga o Samoa o Faleasi’u i le fa’atalatalanoaga i le vaiaso ua tuana’i.

I le afea ai o le aiga, na ia fa’ailoa ai le tulaga faigata o lo’o feagai ai ona le leai lea o se  suāvai e o’o atu i le vaega tonu o lo’o aumau ai.

“Ia ua silia nei ma le sefulu tausaga talu ona o matou feagai ma le fa’afitauli lenei’ Vaiolo i le Fofoga o Samoa.

“E mo le silafia ai, e pei ua na’o aiga i pitonu’u tu lalata i le ‘a’ai ma le auala o lo’o mafai ona o’o atu ai le suāvai.

“Ae o ga’uta mai o le nu’u nei o lo’o matou i ai, ia e pagatia lava i le leai o se suāvai maua i taimi ma aso uma.

O le itu e pito sili ona faigata na ia fa’ailoa ‘o le mamao lea o le pitonu’u e matou te asamo  ai mo se suavai’

“Ia o nei aso, ia po o le a le fai mai o tagata o lo’u aiga, ia ua totogi lava mea uma.

“E pei fo’i la i vai e totogi le $10 ia fa’atoā mafai mai se vai mai nai aiga o lo’o ua mafai ona maua mai ai se fesoasoani.

“O le uiga o la’u tala , ona e fai le mamao ae o le tulaga fo’i…e pei o tupe lava mea uma.

“O le matua’i faigata lava ia aemaise ai lava o si a’u fanau, ia ma le soifua maloloina lelei o le aiga.

“E pei o vaega nei o lo’o polepole vale i ai ia aua a le lelei fo’i le vai maua ia o lona uiga o le a lelei fo’i ni vaega e fa’atinoina mo le tausiaina o le aiga i aso uma.

Na ia fa’ailoa o le timu o lo’o ua fai ma lavea’i.

 “Ia e pei lava o tupe lava e talanoa i ai le taimi lenei i le tau o le soifuaga o lo’o ua i ai nei.

 “E pei o si o matou nei fale, ia o lo’o taumafai atu lava i le mafai  e fa’atinoina ai lea tulaga.

 “I a te a’u ia e pei o le suavai lava ma le fale o lo’o va’ava’ai atu i ai mo lona fa’aleleiina.

 “Ia e pei o lenei taimi, ia e leai se eletise ae o moliga’o o lo’o fa’aaogaina, ia e matua’i le saogalemu lava le fale i le taimi lenei, ae ua pau o se mea ua o’o i ai le malosi.

O le taimi lenei o le tele o le fesoasoani mo lona aiga, o alagatupe mai talo, fa’i ma koko Samoa o lo’o fa’atauina.

“Ia o nisi o taimi o nai uso ma tuagane o lo’o fesoasoani mai.

 ‘E pei o si a’u fanau lava o lo’o una’ia ai lava e faigaluega mo le lelei o lo latou olaga.

 “E ao i a’i latou ona ola a’oa’oina lelei, ia atonu e va’ava’ai fo’i le tulaga o lo’o ua i ai nei le aiga, ia fai lea ma a’o’a’oga mo i latou i le aga’i atu ai le lumana’i.

 “Ia o le olaga lenei , ia o le galue lava, aua e pei o le tupe vave lea i le taimi lenei o le lauele’ele.

E mafai ona feso’ota’i Vaiolo i le telefoni, 7236437

By Fetalai Tuiluluu 06 March 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>