O LA’U TALA FO’I

168 Hits

1. Matauina i Tala Fou se Ulutala fai mai –“Fesili i le Atua-ae tumau lava le Palemia i lana faaiuga.”

O lea la tala fou – o sana tete’e aloa’ia lea e faamalumalu ai le faaiuga a le malo ina ia tofia ni faipule se to’alua ua leva ona tautua i le HRPP-i le Fono a Sui Tofia! Ona fai mai lea o le Palemia-o tofiga uma e mai le Atua-ma o lana faaaliga lea i le Samoa Observer ananafi. Ona fai mai lea- o le pogai lena e le tatau ai i le Itu Agai ona latou fesiligia lea faaiuga a le Malo! O le fesili la i le Palemia- e faapefea pe a matou fesili atu i le Atua-ae tali mai i se isi faiga e ese ai-e pei o le oti o le tagata? 

O lona uiga ‘ea o le manatu o le Palemia o se faatonuga lea mai le Atua! Aisea ua fai ai ma vaisu o le Palemia le fai o sia mea ta’u le suafa o le Atua? E atuga le Palemia ma le Atua? E faapefea pe afai o se faaiuga sese? O anafea na talanoa ai le Palemia ma le Atua? Afai o se faaiuga lea mai le Atua-o lona uiga- o se Atua faimea sese ma le pi’opi’o?

E faapefea ona faavae Samoa i le Atua-ae toe faatonu mai oe e le Atua e fai se mea sese ma le matuia? O le a la le pogai ua sasao faa-afi ai le fiapule o le Palemia i mea e gata i Aiga Tau Tupu o Samoa! Masalo ua faananau e fia avea ma Ao o le Malo ma o uiga ia o le tagata fiapule ma e leai sona faasinomaga!

Afai la o se faaiuga lea mai le Atua-ia manatua lelei la-ua e tuua’ina fua le Atua faimea tonu talu ai lou fiapule! Ua le lava ‘ea le mea na fai e Tofilau e fai ma a’oa’oga i le Palemia? Talu ai la ua satia fua le suafa o le Atua Soifua i nei faiga palapalā, fiapule ma le le migao i le atunuu-o le upu moni- e le o toe umi lava ae tali mai le Atua! O le a sou taofi? 

 

2. Matauina foi i Tala le feoa’i solo o sui faatutu mo le Faiga-Palota o loo loma nei mai lea vaega i lea vaega faa-upufai! O le fesili la-o le a le pogai o le feoa’i solo ae le taofi mau i se vaega e tasi! Afai la o le faiga lea o le a alu ai –o le alu i lea vaega ma lea vaega-e faapefea la ona maua le faamaoni atoatoa e tautua i lona itumalo lea o le a palota mo ia?

Masalo o le mea lenei e faaigoa e tamaitai ma fafine o le fela’ula’ua’i tala? Afai la o le faiga lea  o le tuu o le isi vaega ae alu i le isi vaega-o a manuia o le atunu e maua ai? Afai la ua matitiva masaesae le atunuu talu ai faiga pi’opi’o a le Malo-e ofo le loto pe afai e le o iloa e sui faatutu uma mo le faiga-palota nei mea? Afai la o nei sui faatutu e naunau e faaleleia le tulaga o le soifuaga o le atunuu-e tatau la ona latou lagolagoina se vaega latou te iloa e manuia ai le atunuu atoa ma o latou lava tagata! O le a sou taofi? 

 

3. Matauina foi o lea ua teena foi e le Matagaluega o le Soifua Maloloina le tagi a se aiga e ou se tamaitiiti lea na fai e le falema’i lona tui sese ma oti ai lava! O le tete’e la a le Faatonu Sili Aoao o le Falema’i-fai mai o lea tamaitiiti ua leva ona maua i le five rumatika ma ua leva ona faatonuina le aiga o lea tamaitiiti e ave lea tamaitiiti e fai lona ta’otoga i fafo. Ia afai la e moni lea faamatalaga-o le fesili-afai e matitiva le aiga o sia ‘alu’alutoto ma e leai se tupe e ave ai sia tamaitiiti mo togafitiga i fafo-aisea na le fesoasoani ai le falemai i le aiga o sia tamaitiiti. Faamata ana o se atalii o tama sasa’o e tou te faia i ai se faatonuga faapena?  

O le tasi lea o pinefaamau o le le lelei o le auaunaga a le Falemai mo le atunuu. Ae o le fesili taua lava-na faapefea la ona fai le tui o lea tamaititi pe afai na iloa e le Falemai- e lei faia sona taotoga i Niu Sila? E matua leai lava la se aoga o le tete’e  le tagi a lea aiga- aua sa tatau ona avatu le tamaititi ona fesiligia lea pe na ave e fai lona taotoga pe leai? Afai la na iloa e le Falemai e le’i faia sona taotoga, sa le tatau la ona faia se tui o lea tamaitiiti. O iinei la e matua faamaonia ai le faatamala o le Falemai ma lana auaunaga i le Atunu’u!

O ai la a tuua’ia i le oti o lea tamaitiiti? Ana avane la le faitau miliona ma miliona a le atunuu lea na goto i le moana i faiga piopi’o a le malo e faaleleia ai le auaunaga a le Falema’i-semanu e mafai ona faasaoina le ola o sia alualutoto. E tatau foi i le Falemai ona tapa le Palemia a toe faaune mai nisi miliona i le lumana’i- e tatau ona ave le faamuamua i le Soifua Maloloina-aua e leai lava se isi e le gasegase! O le a sou taofi? 

 

4. Matauina foi i nisi o Tala Fou fai mai ua amata ona vevesi le aufaipisinisi mai Saina-ia ma o nei eseesega e mafua lava ona o a latou pisinisi ma tagata faatau. Ae o le tulaga mata’utia ua i ai nei- na o mai e fai pisinisi-ae o lea foi ua peiseai ua latou pulea Samoa! Ia atonu o se tasi lea o itu e pesepese mai ai pea se tasi o tamaitai faipisinisi a Samoa-ona o le afaina tele o a latou pisinisi-talu ai pisinisi a nei Saina. 

O le fesili la-o le a le tulaga tonu lava o i ai nei Saina e tusa ai ma lo latou nofoia o Samoa. O i latou o ni tagata-nuu o Samoa pe leai? A fua la i le vave tele o le faateleina o nei pisinisi i totonu o le atunuu-ma le afaina ai o pisinisi a nai tagata vaivai o Samoa-ia atonu o se itu lea e tatau ona silafia e le atunuu atoa-ina nei faifai faiga a le Malo-emo ane le ata ua pulea Samoa e Saina! O le a sou taofi? 

© Samoa Observer 2016

Developed by Samoa Observer in Apia